លោក ជាវ តាយ អភិបាលខេត្តពោធិ៍សាត់ កាលពីម្សិលមិញបានអំពាវនាវដល់ក្រុមហ៊ុនដែលបានផ្តល់កិច្ចសន្យាសាងសង់ផ្លូវជាតិលេខ៥ ក្នុងខេត្តនេះឱ្យបញ្ចប់ការសាងសង់ឲ្យបានលឿនជាងមុន ដើម្បីសម្រួលដល់ការធ្វើដំណើររបស់ប្រជាពលរដ្ឋ និងការដឹកជញ្ជូន។ លោកបាននិយាយថា៖«ខ្ញុំបានកត់សម្គាល់ឃើញថា ការងារសាងសង់នៅលើផ្លូវនេះ គឺយឺតយ៉ាវណាស់ ហើយខ្ញុំត្រូវដឹងពីមូលហេតុ រួមទាំងផលប៉ះពាល់»។ លោកបានបន្តថា ផ្លូវ​ត្រូវ​សាងសង់​ឲ្យ​បាន​លឿន ស្រប​តាម​ការ​គ្រោងទុក ហើយ​ខ្ញុំ​យល់​ឃើញ​ថា មាន​គ្រឿងចក្រ​តិចតួច​ណាស់​សម្រាប់​ការងារសាងសង់​ផ្លូវនេះ។ លោកបានណែនាំឲ្យក្រុមការងារអន្តរក្រសួង ជូនដំណឹងដល់ក្រុមហ៊ុននោះឲ្យនាំយកគ្រឿងចក្របន្ថែមទៀត ដើម្បីពន្លឿនដល់ការងារសាងសង់ឱ្យរួចរាល់ និងដាក់ឱ្យដំណើរការបានមុនបុណ្យចូលឆ្នាំខ្មែរខាងមុខនេះ។ ជាមួយគ្នានេះ ក្រសួងសាធារណការ និង ក្រសួងសេដ្ឋកិច្ចនិងហិរញ្ញវត្ថុ បានជូនដំណឹងថា ការពន្យារពេលនេះ គឺដោយសាររដូវវស្សា។ មន្ត្រីក្រសួងទាំងពីរ ក៏បានជម្រាបជូនផងដែរថា កំណាត់ផ្លូវនេះត្រូវសិក្សា និងសាងសង់ឱ្យបានហ្មត់ចត់ដោយសារតែសាងសង់នៅចន្លោះក្រុង ហើយត្រូវសាងសង់ស្ថានីយ៍ថ្លឹងរថយន្តក្រុង ស្ពានអាកាសឆ្លងកាត់ស្ទឹងពោធិសាត់ ការរកទីតាំងត្រឹមត្រូវសម្រាប់ការសាងសង់ និងការ​សាងសង់​រង្វង់​មូល​ថ្មី ដោយសាររង្វង់​មូល​នៅ​ចំណុច​ប្រសព្វ​វិមាន​ឃ្លាំងមឿង មិន​អំណោយផល​ទេ៕