[Rasmei Kampuchea Daily News] - អន្តរក្រសួង និងធនាគារពិភពលោក ពិភាក្សាលើគម្រោង រៀបចំគោលនយោបាយ ទឹកស្អាត និងអនាម័យ ជូនប្រជាពលដ្
ភ្នំពេញ៖ ក្រសួងសាធារណការ និងដឹកជញ្ជូន និងក្រសួងពាក់ព័ន្ធ ព្រមទាំងធនាគារពិភពលោក បានពិភាក្សាគ្នា លើការវាយតម្លៃ ពីវឌ្ឍភាពការងារគ្រប់គ្រង គម្រោងកែលម្អ ការផ្គត់ផ្គង់ទឹកស្អាត និងអនាម័យ នៅកម្ពុជា ដោយមានការចូលរួម ដោយផ្ទាល់ និងតាមប្រព័ន្ធវីដេអូ ពីចម្ងាយ ពីក្រុមការងារជំនាញ របស់អគ្គនាយកដ្ឋាន ប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន តំណាងក្រសួង-ស្ថាប័ន តំណាងធនាគារពិភពលោក និងភាគីពាក់ព័ន្ធផងដែរ។
លោក កឹម បូរី អនុរដ្ឋលេខា ក្រសួងសាធារណការ និងដឹកជញ្ជូន នៅថ្ងៃទី១៨ ខែតុលា ឆ្នាំ២០២១ កន្លងទៅថ្មីៗនេះ បានដឹកនាំកិច្ចប្រជុំនេះ នៅទីស្តីការក្រសួង។
ប្រភពពីក្រសួងសាធារណការ និងដឹកជញ្ជូន បានឱ្យដឹងថាៈ អង្គប្រជុំបានជជែកពិភាក្សា អំពីបញ្ហាបច្ចេកទេសជាមួយអ្នកអនុវត្តគម្រោង , ស្ថានភាពនៃការគ្រប់គ្រងហិរញ្ញវត្ថុ, ការងារលទ្ធកម្ម និងការវាយតម្លៃវឌ្ឍនភាព ការងារបេសកកម្ម ក្រុមការងារពាក់ព័ន្ធ និងផែនការសកម្មភាព សម្រាប់ការពន្លឿន ការអនុវត្តគម្រោងផងដែរ។
ថ្លែងទៅកាន់អង្គប្រជុំ នាឱកាសនោះ លោកអនុរដ្ឋលេខធិការ បានថ្លែងអំណរគុណ យ៉ាងជ្រាលជ្រៅដល់ ក្រសួង-ស្ថាប័ន ដែលបានចូលរួមវាយតម្លៃ ការអនុវត្តគម្រោង ប្រកបដោយស្មារតីទទួលខុសត្រូវ ជាពិសេសទីប្រឹក្សាគម្រោង នៃអង្គភាពគ្រប់គ្រងគម្រោង សមាសភាគ២(CMU-2) ទាំងពីរ ដែលបានខិតខំប្រឹងប្រែង បំពេញការងាររបស់ខ្លួន យ៉ាងសកម្ម និងសង្ឃឹមជឿជាក់ថា គ្រប់ភាគីពាក់ព័ន្ធទាំងអស់ នឹងបន្តកិច្ចសហការល្អ ដើម្បីសម្រេចលទ្ធផល តាមផែនការ ដែលបានគ្រោងទុក។
ទន្ទឹមគ្នានោះដែរ លោកអនុរដ្ឋលេខាធិការ បានជំរុញលើកទឹកចិត្ត ឱ្យក្រុមការងារពាក់ព័ន្ធ យកចិត្តទុកដាក់រៀប ចំផែនការសកម្មភាព ឱ្យបានច្បាស់លាស់ ដើម្បីធានាឱ្យដំណើរការ គម្រោងបញ្ចប់ តាមការគ្រោងទុក និងបន្តទៅអនុវត្តកញ្ចប់ការងារ ប្រឹក្សាគម្រោងលើការងារ រៀបចំគោលនយោបាយ និងការកំណត់សេវាកម្មកម្រៃទឹកកខ្វក់ (MPWT-CW-3) រហូតដល់MPWT-CS-5 ដែលបានកំណត់ ក្នុងឆ្នាំ ២០២២ និងឈានទៅសម្រេចបាន នូវគោលដៅអភិវឌ្ឍន៍គម្រោង នៅឆ្នាំ២០២៤ ជាពិសេសធានា សម្រេចបាននូវ សមិទ្ធផលទឹកស្អាត អនាម័យ ជូនបងប្អូនប្រជាពលរដ្ឋ ស្របតាមចក្ខុវិស័យ និងផែនការព្រមព្រៀង នៃគោលដៅអភិវឌ្ឍន៍ ប្រកបដោយចីរភាព របស់សហប្រជាជាតិ ឆ្នាំ២០៣០៕
