នៅព្រឹកថ្ងៃអង្គារ ១៣កើត ខែអស្សុជ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១៩ ខែតុលា ឆ្នាំ២០២១ ឯកឧត្តម លី រស្មី អនុរដ្ឋលេខាធិការ ក្រសួងដែនដីនគរូបនីយកម្ម សំណង់ និងសុរិយោដី លោក ជាវ វិជ្ជាក់ អភិបាលរងខេត្តព្រះសីហនុ អញ្ជើញដឹកនាំកិច្ចប្រជុំ ស្តីពីការ ចុះត្រួតពិនិត្យការស្ថាបនាផ្លូវ៣៤ខ្សែក្នុងក្រុងព្រះសីហនុ ដោយមានការចូលរួមពីក្រុមហ៊ុន អង្គភាពទទួលការស្ថាបនាផ្លូវ ៣៤ខ្សែ ក្នុងក្រុងព្រះសីហនុ មន្ទីរ និងអង្គភាព ពាក់ព័ន្ធ។ ឯកឧត្តម លី រស្មី បានមានប្រសាសន៍ថា ការបើកកិច្ចប្រជុំ ពិនិត្យមើលសមិទ្ធផល ដែលក្រុមហ៊ុន និងអង្គភាពនីមួយៗស្ថាបនាតាមនីតិវិធី ដើម្បីត្រៀមរៀបចំការប្រគល់ ទទួលនូវសមិទ្ធផលដែលបានស្ថាបនារួចរាល់នេះ តើយើងត្រូវធ្វើអ្វីខ្លះ ក្នុងការប្រគល់ទទួល និងផ្ទេរជូនរដ្ឋបាលខេត្តព្រះសីហនុ ជាអ្នកគ្រប់គ្រងបន្ត ដើម្បីធានានិរន្តរភាពក្នុងការថែទាំប្រើ ប្រាស់បានយូរ។ ម្យ៉ាងទៀតការខិតខំស្ថាបនាផ្លូវរបស់ក្រុមហ៊ុន និងអង្គភាពនីមួយៗមានការ សហការការទទួលខុសត្រូវ និងទទួលបានសមិទ្ធផលល្អដូចថ្ងៃនេះ ពិសេសការវាយតម្លៃ ការស្ថាបនា ទោះបីយើងបានជួបប្រទះនៃការរីករាលដាលនៃជំងឺកូវីដ-១៩ក៏ដោយ យើងនៅ តែទទួលខុសត្រូវក្នុងការស្ថាបនាផ្លូវទាំង ៣៤ខ្សែ ក្នុងក្រុងព្រះសីហនុទទួលបានជោគជ័យ។ ឯកឧត្តមបន្តថា យើងត្រូវបង្កើតក្រុមការងារវាយតម្លៃផ្លូវចំនួន ៤ក្រុម ដែលមានក្រុម ការងាររបស់រដ្ឋបាលខេត្ត មន្ទីរ អង្គភាពពាក់ព័ន្ធចូលរួម និងក្រុមការងាររបស់ គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ក្រុមការងារនីមួយៗមាន ភារកិច្ចចុះបំពេញភារកិច្ចពិនិត្យ វាយតម្លៃគុណភាពកាស្ថាបនាផ្លូវទាំង ៣៤ខ្សែ ក្នុងក្រុង ព្រះសីហនុ ដោយផ្តោតសំខាន់មានដូចជា៖ ១.កម្រាលផ្លូវ, ២.ប្រព័ន្ធលូទឹកភ្លៀង, ៣.លូទឹកកខ្វក់, ៤.ចិញ្ចើមផ្លូវ, ៥.ការងារក្រាលថ្មក្រានីត, ៦.បង្គោលភ្លើងបំភ្លឺផ្លូវសាធារណៈ, ៧.ជញ្ជាំងថ្មនៅតាមបណ្តោយឆ្នេរ , ៨.លូចំហរ, ៩.បេតុងអ៊ុតកៅស៊ូ, ១០.គំនូសចរាចរណ៍ និង១១.ការងារដាំដើមឈើលម្អផ្លូវជាដើម។ លោក ជាវ វិជ្ជាក់ អភិបាលរងខេត្តព្រះសីហនុ បានថ្លែងអំណរគុណ ចំពោះក្រុមហ៊ុន និងអង្គភាព ដែលបានសាងសង់ផ្លូវ ៣៤ខ្សែ ក្នុងក្រុងព្រះសីហនុ ស្របតាមបទដ្ឋាន លក្ខណបច្ចេកទេស យើងនឹងបន្តត្រួតពិនិត្យអំពីគុណភាពមុននឹងផ្ទេរមកឱ្យរដ្ឋបាល ខេត្តព្រះសីហនុជាគ្រប់គ្រងវិញ។ ព្រោះផ្លូវ ៣៤ខ្សែនេះ ជាអំណោយ ដ៏ថ្លៃថ្លារបស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជូនចំពោះ ប្រជាពលរដ្ឋខេត្តព្រះសីហនុ ដែលមានក្រុមហ៊ុន និងអង្គភាពបានស្ថាបនាបញ្ចប់ទាំងស្រុង។ ក្នុងឱកាសនោះលោកអភិបាលរងខេត្ត បានសំណូមពរឱ្យក្រុមការងារចុះពិនិត្យវាយ តម្លៃនៃការខូចខាត និងចន្លោះខ្វះ ខាតដែលនៅសេសសល់ ដើម្បីឱ្យក្រុមហ៊ុន និងអង្គភាព ទទួលកាស្ថាបនាផ្លូវ៣៤ខ្សែ ក្នុងក្រុងព្រះសីហនុ ធ្វើការជួសជុលឱ្យមានគុណភាព ១០០ភាគរយ ម្យ៉ាងទៀតខេត្តព្រះសីហនុ និងត្រូវបើកទទួលភ្ញៀវទេសចរ និងបើកសេដ្ឋកិច្ច សង្គមឡើងវិញនៅចុងឆ្នាំ២០២១ខាងមុខនេះ ខេត្តព្រះសីហនុ នឹងត្រូវធ្វើជាម្ចាស់ផ្ទះ ក្នុងកិច្ចប្រជុំវេទិការអាស៊ាននៅខែមករា ឆ្នាំ២០២២ និងបន្តបើកកិច្ចប្រជុំកំពូលផ្សេងៗទៀត នៅពេលខាងមុខ៕