(ភ្នំពេញ)៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅរសៀលថ្ងៃទី០១ ខែតុលា ឆ្នាំ២០២១នេះ បានអញ្ជើញចុះសាកសួរសុខទុក្ខមន្រ្តីរាជការ ដែលកំពុងបម្រើការងារនៅទីស្តីការក្រសួង ដើម្បីសម្តែងអំណរគុណ និងការកោតសរសើរចំពោះពួកគាត់ ដែលបានខិតខំប្រឹងប្រែងបំពេញការងារ និងសម្រេចបាននូវសមិទ្ធផលសំខាន់ៗជូនក្រសួង។ ក្នុងឱកាសអញ្ជើញសួរសុខទុក្ខនេះលោកទេសរដ្ឋមន្ត្រី ក៏បានផ្តល់ថវិកាលើកទឹកចិត្តបន្តិចបន្តួចជូនដល់មន្ត្រីគ្រប់រូប ដែលធ្វើការនៅទីស្តីការក្រសួងផងដែរ។ លោកទេសរដ្ឋមន្ត្រី ក៏បានជូនពរមន្ត្រីរាជការក្រសួងទាំងអស់ ក៏ដូចជាប្រជាពលរដ្ឋខ្មែរទូទាំងប្រទេស ទទួលបាននូវសំណាងល្អ សុខសុវត្ថិភាពរាល់ពេលធ្វើដំណើរ និងជួបប្រទះពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។ ជាមួយនឹងឱកាសឈប់សម្រាកការងារទៅកាន់ស្រុកកំណើត លោកទេសរដ្ឋមន្ត្រី បានផ្តាំផ្ញើដល់មន្ត្រីទាំងអស់ ឱ្យប្រកាន់ខ្ជាប់ខ្ជួននូវវិធានការ «៣ការពារ ៣កុំ» និងវិធានសុខាភិបាលនានា ដើម្បីការពារឆ្លងជំងឺកូវីដ១៩។ សូមបញ្ជាក់ថា លោកទេសរដ្ឋមន្ត្រី ស៊ុន ចាន់ថុល ជាថ្នាក់ដឹកនាំក្រសួងមួយរូប ដែលតែងមានទម្លាប់ចុះសួរសុខទុក្ខ និងផ្តល់ថវិកាលើកទឹកចិត្តជូនដល់មន្ត្រីក្រោមឱវាទរបស់ខ្លួនក្នុងឱកាសបុណ្យជាតិផ្សេងៗ ជាពិសេសបុណ្យចូលឆ្នាំថ្មី និងបុណ្យភ្ជុំបិណ្ឌ៕