ថ្ងៃអង្គារ ៧កើត ខែភទ្របទ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី២៨ ខែកញ្ញា ឆ្នាំ២០២១ នៅ ទីស្តីការក្រសួង លោកជំទាវ ឥម នីថារ៉ា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំក្រុមប្រឹក្សាភិបាលនៃមន្ទីរពិសោធន៍សំណង់ និងសាធារណការ (មពសស) អាណត្តិទី៥ លើកទី៣ ដោយមានការអញ្ជើញចូលរួមដោយផ្ទាល់ និងតាមប្រព័ន្ធវីដេអូពីចម្ងាយពីលោកអគ្គនាយកមន្ទីរពិសោធន៍សំណង់ និងសាធារណការ តំណាងក្រសួង-ស្ថាប័នពាក់ព័ន្ធដែលជាសមាជិកសមាជិកានៃក្រុមប្រឹក្សាភិបាលរបស់មន្ទីរពិសោធន៍សំណង់ និងសាធារណការ និងមន្ត្រីជំនាញក្រោមឱវាទមន្ទីរពិសោធន៍ផងដែរ។ អង្គប្រជុំបានពិភាក្សាលម្អិតលើរបៀបវារៈចំនួនប្រាំក្នុងនោះរួមមាន៖ ទី១. ពិនិត្យនិងអនុម័តលើរបាយការណ៍អនុវត្តការងារអាជីវកម្ម សេវាកម្ម និងការងារវិនិយោគរយៈពេល១២ខែ ឆ្នាំ២០១៩ ទី២. ពិនិត្យ និងអនុម័តលើរបាយការណ៍អនុវត្តការងារអាជីវកម្ម សេវាកម្ម និងការងារវិនិយោគរយៈពេល១២ខែ ឆ្នាំ២០២០ ទី៣. ពិនិត្យនិងអនុម័តលើ របាយការណ៍នៃការអនុវត្តការងារអាជីវកម្ម សេវាកម្ម និងការងារវិនិយោគត្រីមាសទី១ ឆ្នាំ២០២១ និងទី៤. ពិនិត្យ និងអនុម័តលើរបាយការណ៍នៃការអនុវត្តការងារអាជីវកម្ម សេវាកម្ម និងការងារវិនិយោគឆមាសទី១ ឆ្នាំ ២០២១។ ថ្លែងក្នុងកិច្ចចាប់ផ្តើមនាឱកាសនោះ លោកជំទាវរដ្ឋលេខាធិការ បានជំរុញលើកទឹកចិត្តឱ្យអង្គប្រជុំផ្តល់ធាតុចូល ក៏ដូចជាមតិយោបល់ឱ្យបានផុលផុស ដើម្បីធ្វើឱ្យប្រសើរឡើង ក៏ដូចជាឈានទៅអនុម័តរបាយការណ៍ខាងលើ។ ជាមួយគ្នានេះផងដែរ លោកជំទាវរដ្ឋលេខាធិការ បានថ្លែងអំណរគុណ និងកោតសរសើរយ៉ាងជ្រាលជ្រៅ ដល់សមាជិកសមាជិកានៃអង្គប្រជុំដែលបានចំណាយពេលដ៏មានតម្លៃចូលរួមជាមតិយោបល់យ៉ាងផុលផុសគ្រប់របៀបវារៈ និងដែលបានខិតខំប្រឹងប្រែងបំពេញការងារប្រកបដោយការទទួលខុសត្រូវខ្ពស់ ដើម្បីមន្ទីរពិសោធន៍៕