ថ្ងៃព្រហស្បតិ៍ ២រោច ខែភទ្របុទ្រ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២៣ ខែកញ្ញា ឆ្នាំ២០២១ នៅទីស្តីការក្រសួង ឯកឧត្តម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួងអញ្ជើញចូលរួមពិធីផ្សព្វផ្សាយសៀវភៅរដ្ឋធម្មនុញ្ញ នៃព្រះរាជាណាចក្រកម្ពុជា និងសៀវភៅគុណតម្លៃរដ្ឋធម្មនុញ្ញកម្ពុជា តាមប្រព័ន្ធវីដេអូពីចម្ងាយ ក្នុងឱកាសអបអរសាទរទិវារំលឹកខួប២៨ឆ្នាំនៃការប្រកាសឱ្យប្រើរដ្ឋធម្មនុញ្ញនៃព្រះរាជាណាចក្រកម្ពុជា ក្រោមអធិបតីភាពឯកឧត្តមកិត្តិនីតិកោសល បណ្ឌិត អ៊ឹម ឈុនលឹម ប្រធានក្រុមប្រឹក្សាធម្មនុញ្ញ។ គួរកត់សម្គាល់ផងដែរថា៖ សមិទ្ធផលជាប្រវត្តិសាស្ត្រនេះកើតចេញពីកិច្ចព្រមព្រៀងនៃដំណោះស្រាយ នយោបាយរួមមួយនៃជម្លោះកម្ពុជានៅក្នុងសន្និសីទទីក្រុងប៉ារីសថ្ងៃទី២៣ ខែតុលា ឆ្នាំ១៩៩៣ ហើយអត្ថិភាពនៃកិច្ចព្រមព្រៀងនេះមានការចូលរួមពីតួអង្គប្រវត្តិសាស្ត្រ ដែលជាស្ថាបនិកដំបូងនៃព្រះករុណា ព្រះបាទសម្ដេចព្រះនរោត្តម សីហនុ (ព្រះបរមរតនកោដ្ឋ) និងសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា។ ជាទីបញ្ចប់នៃពិធីនោះ ក៏មានការរៀបចំថ្វាយ ប្រគេន និងចែកជូនសៀវភៅរដ្ឋធម្មនុញ្ញចំនួន១០ម៉ឺនក្បាល និងសៀវភៅគុណតម្លៃរដ្ឋធម្មនុញ្ញកម្ពុជាចំនួន៧០០ក្បាល ផ្សព្វផ្សាយនៅទូទាំងប្រទេស ដើម្បីអបអរសាទរទិវារំលឹកខួបទី២៨ឆ្នាំ នៃការប្រកាសឱ្យប្រើរដ្ឋធម្មនុញ្ញនៃព្រះរាជាណាចក្រកម្ពុជាផងដែរ៕