[Rasmei Kampuchea Daily News] - ក្រសួងធនធានទឹកស្នើដល់ក្រសួងសាធារណការឲ្យបើកមុខទឹកចំនួន២កន្លែង នៅលើផ្លូវក្រវ៉ាត់ក្រុងទី៣
ភ្នំពេញ: មន្ទីរធនធានទឹកនិងឧតុនិយមខេត្តកណ្តាល កាលពីថ្ងៃទី១០ខែកញ្ញាឆ្នាំ២០២១ បានធ្វើលិខិតទៅមន្ទីរសាធារណការនិងដឹកជញ្ជូនខេត្តកណ្តាល សុំបើកមុខទឹកចំនួន ២កន្លែង ដោយមួយកន្លែងៗប្រវែង៥០ម៉ែត្រលើផ្លូវក្រវ៉ាត់ក្រុងទី៣ ត្រង់ចំណុចទំនប់ប្រឡាយ៩៤និង៩៦ ស្ថិតក្នុងភូមិសាស្ត្រក្រុងតាខ្មៅ ខេត្តកណ្តាល។
នៅក្នុងលិខិតដែលចុះហត្ថលេខាដោយលោក ប្រាក់ ឡាក់ អនុប្រធានមន្ទីរធនធានទឹកនិងឧតុនិយមខេត្តកណ្តាល ជំនួសលោក អ៊ុក វណ្ណា ប្រធានមន្ទីរធនធានទឹកនិងឧតុនិយមខេត្តកណ្តាល ដែលជាប់ចត្តាឡីស័កនោះ បានជម្រាបប្រាប់ប្រធានមន្ទីរសាធារណការនិង ដឹកជញ្ជូនខេត្តកណ្តាលថា មន្ទីរនិងសហការជាមួយក្រសួងធនធានទឹកនិងឧតុនិយម ធ្វើការសិក្សាគម្រោងរំដោះទឹកជំនន់ទឹកភ្លៀងស្ទឹងព្រែកត្នោតសម្រាប់ពេលអនាគត ក្នុងការបញ្ចៀសការលិចលង់ភូមិសាស្ត្រខណ្ឌមួយចំនួនក្នុងរាជធានីភ្នំពេញ និងឃុំ សង្កាត់មួយចំនួនក្នុងភូមិសាស្ត្រស្រុកកណ្តាលស្ទឹង និងក្រុងតាខ្មៅតាមច្រកទំនប់ប្រឡាយ៩៤និង ៩៦ ដើម្បីរំដោះទឹកជំនន់ទឹកភ្លៀងទម្លាក់ចូលបឹង ព្រែក អូរធម្មជាតិមួយចំនួនធ្លាក់ចូលទន្លេបាសាក់ និងមួយច្រកទៀតធ្លាក់ចូលបឹងជើងលោង ឬបឹងប្រាំរយ ក្នុងភូមិសាស្ត្រឃុំក្រាំងយ៉ូវ ស្រុកស្អាងខេត្តកណ្តាល ដែលចាំបាច់ត្រូវបើកមុខទឹកតាមផ្លូវក្រវ៉ាត់ក្រុងទី៣ ត្រង់ចំណុចប្រឡាយ៩៤និង៩៦ក្នុងមួយកន្លែងប្រវែង៥០ម៉ែត្រ។
លោក ជា សុខនី នាយស្តីទីខុទ្ទកាល័យក្រសួងធនធានទឹក និងឧតុនិយម បានប្រាប់ឱ្យរស្មីកម្ពុជាដឹងនៅថ្ងៃទី១៥ខែកញ្ញាថា សំណើរបស់មន្ទីរធនធានទឹកខេត្តកណ្តាល សុំបើកមុខទឹកនៅផ្លូវក្រវ៉ាត់ក្រុងទី៣នោះ ត្រូវបានក្រុមការងារចម្រុះរបស់ខេត្តកណ្តាល ដោយមានទាំងមន្ត្រីក្រសួងសាធារណការ និងដឹកជញ្ជូនកាលពីប៉ុន្មានថ្ងៃមុននេះ បានចុះទៅពិនិត្យមើលដល់ទីតាំងហើយ តែមិន ទាន់មានលទ្ធផលទេព្រោះចំណុងដែលមន្ទីរស្នើបើកមុខទឹកស្ថិតនៅក្នុងគម្រោងសាងសង់ផ្លូវក្រវ៉ាត់ក្រុងទី៣ ដែលកំពុងអនុវត្តដោយក្រុមចិន ដោយត្រូវរង់ចាំខាងក្រសួងសាធារណការទៅធ្វើការពិភាក្សាជាមួយនឹងក្រុមហ៊ុនសិន។
នាយកខុទ្ទកាល័យមិនទាន់ពេញសិទ្ធិជាង២ឆ្នាំមកហើយនេះ បាននិយាយឱ្យដឹងទៀតថា តាមគម្រោងរបស់ក្រុមហ៊ុនធ្វើផ្លូវ ចំណុចដែលមន្ទីរបានស្នើគេមានគម្រោង សង់ស្ពានមួយកន្លែងៗ២០ម៉ែត្រ តែដោយសារបច្ចុប្បន្នការដ្ឋានសាងសង់ផ្លូវកំពុងដំណើរសាងសង់ មុខទឹកដែលត្រូវហូរចេញពីក្រុងតាខ្មៅត្រូវបានគេបង្វែរទិសឱ្យទៅតាមច្រក ផ្សេងដែលមុខទឹកតែពីពីរទៅបីម៉ែត្រ ជាហេតុនាំឱ្យមានការលិចលង់ក្នុងពេលមានភ្លៀងខ្លាំងកាលពីប៉ុន្មានថ្ងៃមុននេះ។ ក្រសួងចង់បានមុខទឹកទំហំ៥០ម៉ែត្រក្នុងមួយកន្លែង សម្រាប់ដោះទឹកចេញពីក្រុងតាខ្មៅ ដែលមានប្រភពទឹកពីស្ទឹងព្រែកត្នោត។
សំណើខាងលើនេះ ត្រូវបានគេឃើញមានបន្ទាប់ពីផ្នែកខ្លះរបស់ក្រុងតាខ្មៅ ត្រូវបានលិចលង់ដោយទឹកភ្លៀងយ៉ាងជ្រៅ និងច្រើនថ្ងៃបន្ទាប់ពីមានភ្លៀងធ្លាក់ដល់កម្រិត ១១០មីលីម៉ែត្រ នៅព្រមពេលជាមួយគ្នានោះ លោក លឹម គានហោ រដ្ឋមន្ត្រីក្រសួងធនធានទឹកនិងឧតុនិយមក៏បានសម្រេចឱ្យធ្វើការជីកកាយស្តារផ្លូវទឹកខាងលើជាបន្ទាន់ដោយបានបញ្ជូនគ្រឿងចក្រ ទៅជួយអន្តរាគមន៍ភ្លាមៗ។
ការងារខាងលើនេះ ដឹកនាំអនុវត្តផ្ទាល់ដោយលោក ថាំង វីយុទ្ធដា ប្រធាននាយកដ្ឋានធារាសាស្ត្រកសិកម្ម និងជាប្រធានមុខព្រួញខេត្តកណ្តាល។ ប្រឡាយដែលត្រូវធ្វើការជីកស្តារនេះ មានឈ្មោះប្រឡាយក្របៅ មានទីតាំងស្ថិតនៅសង្កាត់កំពង់សំណាញ់ ក្រុងតាខ្មៅខេត្តកណ្តាល។ ប្រឡាយក្របៅ មានតួនាទីសំខាន់ក្នុងការរំដោះទឹក ចេញពីក្រុងតាខ្មៅទាំងមូល ដោយបង្ហូរទម្លាក់ចូលទៅក្នុងបឹងរាន បន្តដល់បឹងជើងលោង ក្នុងភូមិសាស្ត្រឃុំក្រាំងយ៉ូវ ស្រុកស្អាងខេត្តកណ្តាល។
ប្រឡាយដែលជាផ្លូវរំដោះទឹកដ៏សំខាន់ចេញពីក្រុងតាខ្មៅ ដែលកន្លងទៅគ្មានអ្នកថែទាំនេះ ដោយសាររដ្ឋបាលខេត្តថាជាគម្រោងដែលបានលើកឡើងដោយមន្ទីរសាធារណការខេត្តច្រើនឆ្នាំមកហើយ តែមិនបានអនុវត្តទើបធ្វើឱ្យផ្លូវទឹកនេះមិនអាចបំពេញមុខងាររបស់ខ្លួនបាន។ ពេលនេះក្រសួងធនធានទឹក និងឧតុនិយម បានចាប់ផ្តើមធ្វើជា បន្ទាន់ដោយគ្មានការគ្រោងទុកធ្វើយ៉ាងណាបញ្ចប់ការលិចលង់ក្រុង នៅចំពោះមុខសិន និងលើកជាគម្រោងធ្វើទៅជាប្រឡាយបេតុង សម្រាប់ដោះស្រាយបញ្ហាទឹកប្រើប្រាស់និងទឹក ភ្លៀងនិងទឹកជំនន់ស្ទឹងព្រែកត្នោតផងដែរ៕
