ភ្នំពេញ៖ នៅព្រឹកថ្ងៃទី២០ ខែសីហា ឆ្នាំ២០២១នេះ ក្រសួងសាធារណការ និងដឹកជញ្ជូនបានចេញសេចក្តីជូនដំណឹងស្ដីពីការបើកឱ្យដំណើរការស្ថានីយជញ្ជីងអចល័ត ព្រែកហូរ-រាជធានីភ្នំពេញស្ថិតនៅលើកំណាត់ផ្លូវក្រវ៉ាត់ក្រុងទី២ ក្នុងភូមិបត្តាជី សង្កាត់ជើងឯក ខណ្ឌដង្ក រាជធានីភ្នំពេញ។ នេះបើយោងតាមសេចក្តីជូនដំណឹងរបស់ក្រសួងសាធារណការនិងដឹកជញ្ជូនដែលសកម្មជនហ្វេសប៊ុកកម្ពុជាទើបទទួលបាននៅមុននេះបន្តិច។ ជាមួយគ្នានោះដែរក្រសួងសាធារណការ និងដឹកជញ្ជូន សូមជូនដំណឹងដល់សាធារណជន ក៏ដូចជាសមាគមដឹកជញ្ជូនទំនិញផ្លូវគោក សមាគម ភ្នាក់ងារបញ្ចូនទំនិញកម្ពុជា ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ អ្នកបើកបររថយន្តធុនធ្ងន់ និង អ្នកពាក់ព័ន្ធទាំងអស់ ជ្រាបថា ក្រសួងនឹងដាក់ដំណើរការសាកល្បង និងផ្លូវការស្ថានីយជញ្ជីងអចល័ត ព្រែកហូរ-រាជធានីភ្នំពេញ ដូចខាងក្រោម៖ *-ដំណើរការសាកល្បង ចាប់ពីថ្ងៃទី ១៨-៣១ ខែសីហា ឆ្នាំ២០២១ *-ដំណើរការផ្លូវការតាមបទបញ្ញាត្តិច្បាប់ ចាប់ពីថ្ងៃទី ០១ ខែកញ្ញា ឆ្នាំ២០២១ តទៅ អាស្រ័យហេតុនេះ សូមសាធារណជនមេត្តាជ្រាប និងសហការជាមួយមន្រ្តីមានសមត្ថកិច្ច៕