កណ្តាល៖ ឯកឧត្តមទេសរដ្ឋមន្ត្រី ស៊ុន ចាន់ថុល ប្រធានក្រុមការងារថ្នាក់ជាតិរបស់រាជរដ្ឋាភិបាល ចុះមូលដ្ឋានស្រុកកោះធំ នាព្រឹកថ្ងៃសៅរ៍ ទី២៦ ខែមិថុនា ឆ្នាំ២០២១នេះ បានអញ្ជើញដឹកនាំកិច្ចប្រជុំផ្សព្វផ្សាយសេចក្តីសម្រេចស្ដីពីផែនការរួមឆ្ពោះទៅ កាន់ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្ដិទី៥ ឆ្នាំ២០២២។ ក្នុងកិច្ចប្រជុំនោះក៏មានការចូលរួមពីសមាជិកគណៈអចិន្ត្រៃយ៍ក្រុមការងារគណបក្សចុះជួយមូលដ្ឋានស្រុកកោះធំ អនុប្រធានក្រុមការងារគណៈបក្សចុះជួយមូលដ្ឋានស្រុកកោះធំ ប្រធានគណៈអចិន្រ្តៃយ៍ក្រុមការងារគណបក្សចុះមូលដ្ឋានឃុំទាំង១១ គណៈអចិន្ត្រៃយ៍គណបក្សស្រុក ប្រធាន អនុប្រធានគណៈកម្មាធិការគណៈបក្សឃុំ ស្រុកទាំងអស់ប្រមាណ៤០នាក់។ ក្នុងកិច្ចប្រជុំបានឲ្យដឹងថាគណៈអចិន្ត្រៃយ៍នៃគណៈកម្មាធិការកណ្ដាល បានកំណត់ផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ២០២២ តាមយុទ្ធសាស្ត្រមួយចំនួនរួមមាន៖ *១-ការពង្រឹងមូលដ្ឋាននិងការគ្រប់គ្រងសមាជិកគណបក្ស *២-ការរៀបចំគណៈបញ្ជាការយុទ្ធនាការបោះឆ្នោត *៣-ការស្រាវជ្រាវ បណ្ដុះបណ្ដាល និងផ្សព្វផ្សាយច្បាប់ *៤-ការចុះឈ្មោះបោះឆ្នោតនិងរៀបចំបញ្ជីបោះឆ្នោតឆ្នាំ២០២១ *៥-ការរៀបចំគោលនយោបាយអភិវឌ្ឍន៍ឃុំសង្កាត់ *៦-ការជ្រើសរើសបេក្ខជនឈរឈ្មោះបោះឆ្នោត *៧-ការរៀបចំសន្និបាតគណៈកម្មាធិការគណបក្សឃុំសង្កាត់ *៨-ការចុះបញ្ជីគណបក្សនយោបាយនិងបញ្ជីបេក្ខជនឈរឈ្មោះបោះឆ្នោត *៩-ភ្នាក់ងារគណបក្សនយោបាយនិងអ្នកសង្កេតការណ៍ *១០-ការត្រៀមរៀបចំសម្រាប់យុទ្ធនាការឃោសនាបោះឆ្នោត។ នាឱកាសនោះ ឯកឧត្តមទេសរដ្ឋមន្ត្រី ស៊ុន ចាន់ថុល បានជំរុញលើកទឹកចិត្ត ក៏ដូចជាណែនាំឱ្យសមាជិក សមាជិកា ក្រុមការងារគណបក្សយកសេចក្តីសម្រេចនេះទៅផ្សព្វផ្សាយបន្តតាមមូលដ្ឋានរៀងៗខ្លួនឱ្យបានទូលំទូលាយ ដើម្បីយកប្រៀបឈ្នះនៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ដែលនឹងប្រព្រឹត្តទៅនៅថ្ងៃទី៥ ខែមិថុនា ឆ្នាំ ២០២២ខាងមុខនេះ។ ឯកឧត្តមទេសរដ្ឋមន្ត្រី បានស្នើឱ្យអង្គប្រជុំផ្ដល់មតិយោបល់ និងពិនិត្យសម្រេចលើជម្រើសនីតិវិធីនៃការជ្រើសរើសបេក្ខជនឈរឈ្មោះបោះឆ្នោត តាមរយៈការប្រជុំពិភាក្សាជ្រើសរើសដោយប្រធាន អនុប្រធានក្រុមការងារស្រុក គណៈអចិន្ត្រៃយ៍នៃគណៈកម្មាធិការគណបក្សស្រុក និងប្រធាន អនុប្រធានក្រុមការងារឃុំ និងការបោះឆ្នោតស្ទាបស្ទង់មតិ។ ជាលទ្ធផល អង្គប្រជុំបានសម្រេចជ្រើសរើសការបោះឆ្នោតស្ទាបស្ទង់មតិដើម្បីធានាថាបេក្ខជនមានលក្ខណៈសម្បត្តិគ្រប់គ្រាន់មានឥទ្ធិពល មានការគាំទ្រពីប្រជាពលរដ្ឋ និងអាចធានាបាននូវការយកប្រៀបឈ្នះនៅក្នុងការបោះឆ្នោតក្រុមប្រឹក្សាឃុំសង្កាត់ អាណត្តិទី៥នេះ។ ទន្ទឹមគ្នានេះ ឯកឧត្តមទេសរដ្ឋមន្ត្រីបានបន្តអំពាវនាវដល់បងប្អូនប្រជាពលរដ្ឋទាំងអស់ សូមបន្តយកចិត្តទុកដាក់ថែរក្សាសុខភាពឲ្យបានល្អប្រសើរ និងសូមចូលទប់ស្កាត់ការឆ្លងរាលដាលនៃជំងឺកូវិដ-១៩ ដោយអនុវត្តន៍តាមវិធានការរបស់ក្រសួងសុខាភិបាល ជាពិសេសត្រូវអនុវត្តន៍ឲ្យបានខ្ជាប់ខ្ជួននូវប្រសាសន៍ផ្តាំផ្ញើណែនាំរបស់សម្តេចតេជោ ហ៊ុន សែន នាយករដ្ឋមន្ត្រី ៣កុំ ៣ការពារ៕