ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី១៥ ខែមិថុនានេះ បានជួបពិភាក្សាជាមួយនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ លើកម្មវិធីដកពិន្ទុបណ្ណបើកបរលើទូរស័ព្ទដៃ (Driver’s License Point Deduction Mobile App) ដែលបង្កើតឡើងដោយក្រសួងសាធារណការ។បើតាមលោកទេសរដ្ឋមន្ត្រី ស៊ុន ចាន់ថុល បានបញ្ជាក់ថា ដើម្បីដោះស្រាយបញ្ហាបទល្មើសនៅលើដងផ្លូវ ខាងក្រសួងសាធារណការ បានបង្កើតកម្មវិធីដកពិន្ទុបណ្ណបើកបរលើទូរស័ព្ទដៃនេះ ដើម្បីគ្រប់គ្រងទិន្នន័យទំាងនោះ និងត្រូវការការសហការពីមន្ត្រីនគរបាលអនុវត្តច្បាប់ផងដែរ។ លោក បានបន្ថែមឲ្យដឹងថា រាល់សកម្មភាពបើកបរលើដងផ្លូវ ជាពិសេសបទល្មើសនានា ត្រូវបានប្រព័ន្ធរបស់ក្រសួង បាន Capture ទំាងអស់ ដើម្បីយកមកពិនិត្យ។ លោក បានលើកឡើងជាឧទាហរណ៍ តំបន់ណាអត់មានពាក់ខ្សែក្រវ៉ាត់ច្រើនជាងគេ ក្រសួងនឹងអនុវត្តតាមជាក់ស្តែងលើតំបន់នោះ ផ្លូវក្នុងភូមិសាស្ត្រណាបើកបរលឿនជាងគេ ក្រសួងនឹងចុះទៅអនុវត្តច្បាប់កន្លែងនោះ ដើម្បីដោះស្រាយបញ្ហា។ គួរបញ្ជាក់ថា កម្មវិធីដកពិន្ទុបណ្ណបើកបរ គឺជាកម្មវិធីនៅលើទូរស័ព្ទដៃ គ្រោងនឹងសម្ពោធដាក់ឲ្យប្រើប្រាស់នៅដើមឆ្នាំ២០២២ខាងមុខ ដែលក្នុងនោះក្រសួងសាធារណការ និងដឹកជញ្ជូន នឹងធ្វើបទបង្ហាញជូនសម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ នៅខែកក្កដា ហើយនិងមានការបណ្តុះបណ្តាលដល់មន្ត្រីនគរបាលចរាចរណ៍ ព្រមទាំងការដាក់កម្មវិធីថ្មីឲ្យដំណើរការសាកល្បងផងដែរ។ កម្មវិធីនេះអនុញ្ញាតឲ្យសមត្តកិច្ច (នគរបាលចរាចរណ៍) ធ្វើការដកពិន្ទុបណ្ណបើកបរដោយស័្វយប្រវត្តិ និងជូនដំណឺងទៅកាន់ស្ថាប័នចេញបណ្ណបើកបរ និងម្ចាស់បណ្ណដែលប្រព្រឹត្តខុសនិងច្បាប់ចរាចរណ៍ផ្លូវគោក។ កម្មវិធីនេះក៏អនុញ្ញាតឲ្យសមត្ថកិច្ចស្គាល់បណ្ណបើកបរត្រឹមត្រូវ ឬក្លែងក្លាយ កត់ត្រាការដកពិន្ទុនិងបទល្មើសដែលត្រូវផាកពិន័យ ភូមិសាស្ត្របទល្មើស ក្នុងបណ្ណបើកបរមួយអាចមានពិន្ទុពេញចំនួន១២យោងតាមមាត្រា៤៣ នៃច្បាប់ចរាចណ៍ផ្លូវគោក ហើយហ្នឹងត្រូវធ្វើការកាត់នៅពេលអ្នកប្រើប្រាស់ប្រព្រឹត្តកំហុសធ្ងន់ ឬស្រាលចាប់ពី១ពិន្ទុ រហូតដល់៦ពិន្ទុ៕