ភ្នំពេញ ថ្ងៃទី១១ ខែមិថុនា ឆ្នាំ២០២១ -- ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ថា បញ្ហាសុវត្ថិភាពចរាចរណ៍គឺជាបញ្ហាគួរឱ្យព្រួយបារម្ភបំផុតរបស់កម្ពុជា ក៏ដូចជាអាស៊ានទាំងមូល ដោយសារតែបច្ចុប្បន្ននេះមានមនុស្សចំនួនពី៤ ទៅ ៥នាក់ គិតជាមធ្យម បានស្លាប់ដោយសារគ្រោះថ្នាក់ចរាចរ ណ៍នៅកម្ពុជា។ បើយោងតាមការប៉ាន់ស្មានរបស់ធនាគារពិភពលោក(WB) ដោយក្នុងនោះបានបង្កឱ្យខូចខាតទ្រព្យសម្បត្តិប្រមាណ៣០០លានដុល្លារអាម៉េរិក ក្នុងមួយឆ្នាំ ខាតបង់ពេលវេលា និងប៉ះពាល់ដល់សេដ្ឋកិច្ចជាតិផងដែរ និងបានសម្ដែងបំណងចង់ធ្វើការ យ៉ាងជិតស្និទ្ធជាមួយវេទិកាដឹកជញ្ជូនអន្តរជាតិ ដើម្បីដោះស្រាយបញ្ហានេះឱ្យមានប្រសិទ្ធភាព។ ការថ្លែងបែបនេះធ្វើឡើង ក្នុងឱកាសនៃកិច្ចពិភាក្សាតាមប្រព័ន្ធវីដេអូពីចម្ងាយ ជាមួយលោក Young Tae Kim អគ្គលេខាធិការនៃវេទិកាដឹកជញ្ជូនអន្តរជាតិ (International Transport Forum) កាលពីថ្ងៃ១កើត ខែបឋមាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃព្រហស្បតិ៍ ទី១០ ខែមិថុនា ឆ្នាំ២០២១ មានការចូលរួមដោយផ្ទាល់ពីថ្នាក់ដឹកនាំក្រសួង ទទួលបន្ទុក និងមន្ត្រីជំនាញបច្ចេកទេសពាក់ព័ន្ធ ដើម្បីពិភាក្សាអំពីកិច្ចសហប្រតិបត្តិការ រវាងកម្ពុជា អាស៊ាន និងវេទិកាដឹកជញ្ជូនអន្តរជាតិ។ នៅក្នុងឱកាសនោះ ឯកឧត្តមទេសរដ្ឋមន្ត្រី ក៏បានគូសបញ្ជាក់ថា កម្ពុជាចង់រៀនសូត្របទពិសោធន៍របស់វេទិកាដឹកជញ្ជូនអន្តរជាតិ ទាក់ទងនឹងគោលនយោបាយ យុទ្ធសាស្ត្រការដឹកជញ្ជូនបៃតង ដោយសារកម្ពុជាសព្វថ្ងៃនេះមិនទាន់មានយានយន្តដើរដោយអគ្គិសនី(Electric Vehicle) នៅឡើយទេ។ ប៉ុន្តែកម្ពុជាកំពុងធ្វើដំណើរឆ្ពោះទៅកាន់ទិសដៅនោះហើយ ។ ឯកឧត្តមបានមានប្រសាសន៍ ស្នើសុំការចែករំលែកព័ត៌មាន ពីវេទិកាដឹកជញ្ជូនអន្តរជាតិ លើការប្រើប្រាស់ប្រព័ន្ធGPS បំពាក់លើយានយន្តដើម្បីតាមដានស្ថានភាពយានយន្តដែលកំពុងបើកបរលើដងផ្លូវ ដោយសារបច្ចុប្បន្ននេះមានប្រព័ន្ធច្រើនមិនដឹងថាប្រព័ន្ធណាមួយល្អអាចទទួលយកបានសម្រាប់កម្ពុជា ក៏ដូចជាបណ្តាប្រទេសអាស៊ាន ដើម្បីយកបញ្ហានេះទៅសិក្សាឈ្វេងយល់ និងពិភាក្សានៅក្នុងកិច្ចប្រជុំថ្នាក់រដ្ឋមន្ត្រីដឹកជញ្ជូនអាស៊ាន សំដៅអនុម័តយកបទដ្ឋានរួមមួយ សម្រាប់ប្រើប្រាស់ទាំងអស់គ្នា។ ជាមួយគ្នានេះដែរ ឯកឧត្តមទេសរដ្ឋមន្ត្រី បានគូសបញ្ជាក់អំពីការបិទបញ្ចប់កិច្ចប្រជុំឧត្តមមន្ត្រីដឹកជញ្ជូនអាស៊ាន(STOM) ដែលកម្ពុជាបានធ្វើជាម្ចាស់ផ្ទះចាប់ពីថ្ងៃទី០៨ ដល់ថ្ងៃទី០៩ ខែមិថុនា ឆ្នាំ២០២១នាពេលថ្មីៗកន្លងទៅនេះ និងបានសម្ដែងការស្វាគមន៍ចំពោះការចូលរួមដោយផ្ទាល់របស់វេទិកាដឹកជញ្ជូនអន្តរជាតិ នៅក្នុងកិច្ចប្រជុំថ្នាក់រដ្ឋមន្ត្រីដឹកជញ្ជូនអាស៊ាន ដែលកម្ពុជាគ្រោងនឹងធ្វើជាម្ចាស់ផ្ទះនៅក្នុងខែវិច្ឆិកា ឆ្នាំ២០២១ខាងមុខនេះ នៅពេលទទួលបានការយល់ព្រមជាទូទៅពីរដ្ឋសមាជិកអាស៊ានទាំងអស់ នៅក្នុងបរិបទនៃការរាតត្បាត ជំងឺកូវីដ-១៩។ ទន្ទឹមនឹងនេះ លោក Young Tae Kim បានធ្វើបច្ចុប្បន្នភាព អំពីសមាជិកភាពនៃវេទិ កាដឹកជញ្ជូនអន្តរជាតិ (ITF) និងបានសម្តែងការស្វាគមន៍ចំពោះទំនាក់ទំនង រវាងបណ្តាប្រទេសអាស៊ីអាគ្នេយ៍ ជាពិសេសកម្ពុជា ដែលមានបំណងចង់ចូលជាសមាជិករបស់វេទិកាដឹកជញ្ជូនអន្តរជាតិ តាមរយៈអង្គការ UNSCAP រួមជាមួយធនាគារអភិវឌ្ឍន៍អាស៊ី និងលេខាធិការដ្ឋានអាស៊ានផងដែរ។ សូមបញ្ជាក់ថា ជំនួបនេះបានពិភាក្សាលើរបៀបវារៈមួយចំនួនដូចជា ការចូលរួមរបស់វេទិកាដឹកជញ្ជូនអន្តរជាតិ នៅក្នុងកិច្ចប្រជុំរដ្ឋមន្ត្រីដឹកជញ្ជូនអាស៊ាន២០២០-២០២១ ដែលកម្ពុជាធ្វើជាម្ចាស់ផ្ទះ បច្ចុប្បន្នភាពសមាជិកភាពរបស់វេទិកាដឹកជញ្ជូនអន្តរជាតិ និងការចែករំលែកព័ត៌មាន របស់វេទិកាដឹកជញ្ជូនអន្តរជាតិ ជាមួយនឹងកម្ពុជា និងអាស៊ាន៕