[Rasmei Kampuchea Daily News] - ទេសរដ្ឋមន្ត្រី ស៊ុន ចាន់ថុល៖ បញ្ហាសុវត្ថិភាពចរាចរណ៍គឺជាបញ្ហាគួរឱ្យព្រួយ បារម្ភបំផុតរបស់កម្ពុជាក៏ដូចជាអាស៊ានទាំងមូល
ភ្នំពេញ៖ បញ្ហាសុវត្ថិភាពចរាចរណ៍គឺជាបញ្ហាគួរឱ្យព្រួយបារម្ភ បំផុតរបស់កម្ពុជា ក៏ដូចជាអាស៊ានទាំងមូល ដោយហេតុថា បច្ចុប្បន្ននេះមានមនុស្ស ចំនួនពី៤ ទៅ ៥នាក់ គិតជាមធ្យមបានស្លាប់ដោយសារគ្រោះថ្នាក់ចរាចរណ៍ នៅកម្ពុជាបើយោងតាមការប៉ាន់ស្មានរបស់ធនាគារពិភពលោកដោយក្នុងនោះបានបង្កឱ្យខូចខាតទ្រព្យសម្បត្តិប្រមាណ៣០០ លានដុល្លារ ក្នុងមួយឆ្នាំខាតបង់ ពេលវេលា និងប៉ះពាល់ដល់សេដ្ឋកិច្ចជាតិផងដែរ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូនបាន ថ្លែងដូច្នេះក្នុងពេលជួបពិភាក្សា ការងារជាមួយលោក យ៉ាង តេ គីម ( Young Tae Kim) អគ្គលេខាធិការនៃវេទិកាដឹកជញ្ជូនអន្តរជាតិ (International Transport Forum) តាមប្រព័ន្ធវីដេអូពីចម្ងាយកាលពីថ្ងៃទី១០ខែមិថុនាឆ្នាំ២០២១ ខណៈកម្ពុជាទើបតែ បិទបញ្ចប់កិច្ចប្រជុំឧត្តមមន្ត្រីដឹកជញ្ជូនអាស៊ាន(STOM) ដែលខ្លួនបានធ្វើជា ម្ចាស់ផ្ទះចាប់ពីថ្ងៃទី៨ ដល់ថ្ងៃទី៩ ខែមិថុនា នាពេលថ្មីៗកន្លងទៅនេះ។
ក្នុងកិច្ចពិភាក្សាអំពីកិច្ចសហប្រតិបត្តិការរវាងកម្ពុជាអាស៊ាននិងវេទិកាដឹកជញ្ជូនអន្តរជាតិនេះលោកទេសរដ្ឋមន្ត្រីបានលើកឡើងថា៖កម្ពុជាចង់ធ្វើការយ៉ាងជិតស្និតជាមួយវេទិកាដឹកជញ្ជូនអន្តរជាតិដើម្បីដោះស្រាយបញ្ហានេះឱ្យមានប្រសិទ្ធភាព។
សូមជម្រាបថា៖ជំនួបនេះបានពិភាក្សាលើរបៀបវារៈមួយចំនួនរួមមាន៖ ការចូលរួម របស់វេទិកាដឹកជញ្ជូនអន្តរជាតិនៅក្នុងកិច្ចប្រជុំរដ្ឋមន្ត្រីដឹកជញ្ជូនអាស៊ាន២០២០-២០២១ ដែលកម្ពុជាធ្វើជាម្ចាស់ផ្ទះ បច្ចុប្បន្នភាពសមាជិកភាពរបស់វេទិកាដឹកជញ្ជូន អន្តរជាតិ និងការចែករំលែកព័ត៌មានរបស់វេទិកាដឹកជញ្ជូនអន្តរជាតិជាមួយនឹង កម្ពុជា និងអាស៊ាន។
កិច្ចប្រជុំតាមប្រព័ន្ធវីដេអូពីចម្ងាយនេះ លោក គីម បានធ្វើបច្ចុប្បន្នភាពអំពីសមា ជិកភាពនៃវេទិកាដឹកជញ្ជូនអន្តរជាតិ(ITS)ដោយក្នុងនោះលោកបានបញ្ជាក់ថា៖ ប៉ុន្មានឆ្នាំកន្លងទៅនេះ ITFទទួលបាន សមាជិកថ្មីមួយចំនួនទៀតរួមមាន ប្រទេស Mongolia ប្រទេសObekistan និងបណ្តាប្រទេសចំនួន៧ទៀតមកពីទ្វីបអាស៊ី និងបានសម្តែងនូវការស្វាគមន៍ចំពោះទំនាក់ទំនងរវាងបណ្តាប្រទេសអាស៊ីអាគ្នេយ៍ ជាពិសេស កម្ពុជា ដែលមានបំណងចង់ចូលជាសមាជិករបស់វេទិកាដឹកជញ្ជូន អន្តរជាតិ តាមរយៈ អង្គការUNSCAP និងធនាគារអភិវឌ្ឍន៍អាស៊ី និងលេខាធិការ ដ្ឋានអាស៊ានផងដែរ។
ឆ្លៀតក្នុងឱកាសនោះផងដែរលោកទេសរដ្ឋមន្ត្រីក្នុងនាមជាប្រធានកិច្ចប្រជុំរដ្ឋមន្ត្រីដឹកជញ្ជូនអាស៊ានបានសម្តែងនូវការស្វាគមន៍ចំពោះការចូលរួមដោយផ្ទាល់របស់វេទិកាដឹកជញ្ជូនអន្តរជាតិនៅក្នុងកិច្ចប្រជុំថ្នាក់រដ្ឋមន្ត្រីដឹកជញ្ជូនអាស៊ានដែលកម្ពុជាគ្រោងនឹងធ្វើជាម្ចាស់ផ្ទះនៅក្នុងខែវិច្ឆិកាឆ្នាំ២០២១នេះនៅពេលទទួលបានការយល់ព្រមជាទូទៅពីរដ្ឋសមាជិកអាស៊ានទាំងអស់ នៅក្នុងបរិបទនៃការរាតត្បាត ជំងឺកូវីដ-១៩។
លោកទេសរដ្ឋមន្ត្រី ក៏បានជម្រាបជូនផងដែរថា៖ កម្ពុជាចង់រៀនសូត្របទពិសោធន៍ របស់វេទិកាដឹក ជញ្ជូនអន្តរជាតិ ទាក់ទងនឹងគោលនយោបាយ យុទ្ធសាស្ត្រ ការដឹកជញ្ជូនបៃតង ដោយសារកម្ពុជា សព្វថ្ងៃនេះមិនទាន់មានយានយន្តដើរ ដោយអគ្គិសនី(Electric Vehicle) នៅឡើយទេ ប៉ុន្តែកម្ពុជាកំពុងធ្វើដំណើរឆ្ពោះទៅ កាន់ទិសដៅនោះហើយ។
ទេសរដ្ឋមន្ត្រី ស៊ុន ចាន់ថុល ក៏បានស្នើសុំអនុសាសន៍និងការចែករំលែកព័ត៌មាន ពីវេទិកាដឹកជញ្ជូនអន្តរជាតិលើការប្រើប្រាស់ប្រព័ន្ធGPSបំពាក់លើយានយន្តដើម្បីតាមដានស្ថានភាពយានយន្តដែលកំពុងបើកបរលើដងផ្លូវដោយសារបច្ចុប្បន្ននេះ មានប្រព័ន្ធច្រើនមិនដឹងថាប្រព័ន្ធណាមួយល្អអាចទទួលយកបានសម្រាប់កម្ពុជាក៏ដូចជាបណ្តាប្រទេសអាស៊ាន ដើម្បីយកបញ្ហានេះទៅសិក្សាស្វែងយល់ និងពិភាក្សា នៅក្នុងកិច្ចប្រជុំថ្នាក់រដ្ឋមន្ត្រីដឹកជញ្ជូនអាស៊ានសំដៅអនុម័តយកបទដ្ឋានរួមមួយសម្រាប់ប្រើប្រាស់ទាំងអស់គ្នា៕
