នាថ្ងៃទី១ ខែមិថុនា ឆ្នាំ២០២១ ក្រសួងសាធារណការ និងដឹកជញ្ជូន និងក្រសួងពាណិជ្ជកម្ម បានពិភាក្សាពីលទ្ធភាព ក្នុងការពង្រឹងយន្តការគ្រប់គ្រងទិញលេខចុះបញ្ជីលេខពិសេសផ្ទាល់ខ្លួនដែលពាក់ព័ន្ធនឹងឈ្មោះម៉ាកពាណិជ្ជកម្ម ក្រោមអធិបតីភាព ឯកឧត្តម ឈួន វ៉ន់ អគ្គនាយក អគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន ឯកឧត្តម ហូ ស៊ីវយ៉ុង អគ្គនាយក អគ្គនាយកដ្ឋានសេវាពាណិជ្ជកម្ម នៃក្រសួងពាណិជ្ជកម្ម និងមានការចូលរួមពី ឯកឧត្តម សួន វិជ្ជា ប្រធាននាយកដ្ឋានកម្មសិទ្ធិ បញ្ញា លោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ លោកស្រី ម៉ែន ច័ន្ទសុកុល ប្រធាននាយកដ្ឋានដឹកជញ្ជូនផ្លូវគោក និងមន្ត្រីពាក់ព័ន្ធផ្សេងៗទៀត។ កិច្ចប្រជុំនេះ បានផ្តោតសំខាន់ ទៅលើការប្រើប្រាស់យន្តការបច្ចេកវិទ្យា ដែលមានលក្ខណៈស្វ័យប្រវត្តិ ដើម្បីធានាគ្រប់គ្រង ផ្ទៀងផ្ទាត់រាល់ការទិញលេខចុះបញ្ជីសេសផ្ទាល់ខ្លួន ទាំងឡាយណាដែលមានពាក់ព័ន្ធនឹងឈ្មោះម៉ាកពាណិជ្ជកម្ម។ សូមបញ្ជាក់ផងដែរថា ជាលក្ខណៈបច្ចេកទេស កិច្ចប្រជុំបានវាយតម្លៃថា ការដាក់ចេញនូវយន្តការបច្ចេកវិទ្យារួមគ្នានេះ គឺមានលទ្ធភាពអាចធ្វើទៅបាន។ ជាជំហានបន្ទាប់ ក្រសួងស្ថាប័នទាំងពីរ នឹងធ្វើការស្នើសុំគោលការណ៍ពីថ្នាក់ដឹកនាំ និងកំណត់ពេលវេលាសមស្របមួយ រៀបចំតភ្ជាប់ប្រព័ន្ធ និងបទដ្ឋានគាំទ្រគំនិតផ្តួចផ្តើមនេះ ឱ្យមាននិរន្តរភាព សុវត្ថិភាព និងមានស្មារតីទទួលខុសត្រូវខ្ពស់ ដើម្បីធានាគ្រប់គ្រងការប្រើប្រាស់លេខសម្គាល់យានយន្តពិសេសផ្ទាល់ខ្លួន ឱ្យមានលក្ខណៈសមស្រប ផ្តល់ជាប្រយោជន៍ជូនប្រជាពលរដ្ឋ និងជំរុញការប្រមូលចំណូលមិនមែនសារពើពន្ធ៕