ថ្ងៃសុក្រ ២រោច ខែជេស្ឋ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២៨ ខែឧសភា ឆ្នាំ២០២១ នៅទីស្តីការក្រសួងសាធារណការ និងដឹកជញ្ជូន មានកិច្ចប្រជុំពិភាក្សារវាងតំណាងក្រសួងសាធារណការ និងដឹកជញ្ជូនដែលមានលោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ និងជាប្រធានក្រុមការងារបច្ចេកទេស ដើម្បីដឹកនាំអនុវត្តគម្រោងទំនើបកម្ម ប្រព័ន្ធបច្ចេកវិទ្យាគ្រប់គ្រងយានយន្តដឹកជញ្ជូនលើសទម្ងន់កម្រិតកំណត់ លោក ឈឹម ផល្លា ប្រធាននាយកដ្ឋានផ្លូវថ្នល់ និងលោក Makoto Usami ប្រធានគម្រោងនៃក្រុមហ៊ុន P.E.Jp (Civil Engineering) នៃគម្រោងធ្វើឱ្យប្រសើរឡើងផ្លូវជាតិលេខ៥។ កិច្ចពិភាក្សានេះ បានផ្តោតសំខាន់លើការប្រើប្រាស់ប្រព័ន្ធបច្ចេកវិទ្យាសម្រាប់សម្រួលដល់ការ​គ្រប់គ្រងយានយន្តដឹកជញ្ជូន​លើសទម្ងន់កម្រិតកំណត់។ លោកប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ បានធ្វើបទបង្ហាញពីប្រព័ន្ធគ្រប់គ្រងយានយន្តដឹកជញ្ជូនលើសទម្ងន់កម្រិតកំណត់ AI Camera and Weigh in Motion Sensor Centralized Database Solution System ដែលនឹងដាក់ប្រើប្រាស់សាកល្បងលើផ្លូវជាតិមួយចំនួន​ ដែលនេះជាគំនិតផ្តួចផ្តើម ក្រោមការចង្អុលបង្ហាញ​របស់​ឯកឧត្តម​ ទេសរដ្ឋមន្ត្រី​ ស៊ុន​ ចាន់ថុល​ រដ្ឋមន្ត្រីក្រសួងសាធារណការ​ និងដឹកជញ្ជូន​ ដើម្បីសម្រួលដល់ក្រុមការងារត្រួតពិនិត្យ​ ងាយស្រួលតាមដាន​ រីឯប្រជាពលរដ្ឋ​ និងក្រុមហ៊ុន​ដឹកជញ្ជូន​ ក៏មានភាពងាយស្រួល​ក្នុងការទទួលបាន​ដំណឹងពីទម្ងន់យានយន្តរបស់ខ្លួន​នៅតាមដងផ្លូវភ្លាមៗ​ផងដែរ។ លោកប្រធាននាយកដ្ឋានផ្លូវថ្នល់​ បានធ្វើការសាទរ​ចំពោះការរៀបចំ​ ជ្រោមជ្រែងទៅលើចក្ខុវិស័យផ្តល់គុណតម្លៃដល់ការធានាអាយុកាលយូរអង្វែងដល់ផ្លូវថ្នល់​សាធារណៈជាប្រយោជន៍សាធារណៈ​ និងសេដ្ឋកិច្ចជាតិ ដែលផ្លូវនីមួយៗ​ ទំរាំធ្វើការស្ថាបនាឡើងបាន​ ពិជាត្រូវឆ្លងកាត់ដំណាក់កាលលំបាកៗ​ជាច្រើន និងចំណាយធនធានថវិកាដ៏សន្ធឹកសន្ធាប់។ លោក Makoto Usami ក៏បានវាយតម្លៃខ្ពស់លើបច្ចេកថ្មីរបស់ក្រសួងសាធារណការ និងដឹកជញ្ជូន ដោយប្រើប្រាស់ជញ្ជីង និងកាមេរ៉ាស្វ័យប្រវត្តិ (AI Camera and Weigh in Motion Sensor) ហើយលោកក៏បានចែករំលែកបទពិសោធន៍ នៃការប្រើប្រាស់ជញ្ជីងស្វ័យប្រវត្តិកន្លងមក។ ជាចុងបញ្ចប់ លោក Makoto Usami នឹងលើកយកប្រើប្រាស់បច្ចេកវិទ្យាគ្រប់គ្រងយានយន្តដឹកជញ្ជូនលើសទម្ងន់កម្រិតកំណត់ AI Camera and Weigh in Motion Sensor Centralized Database Solution System របស់ក្រសួងសាធារណការ និងដឹកជញ្ជូន ពិភាក្សាជាមួយភាគីពាក់ព័ន្ធលើគម្រោងធ្វើឱ្យប្រសើរឡើងផ្លូវជាតិលេខ៥ ​៕