បន្ទាប់ពីផ្លូវល្បឿនលឿនដំបូងគេនៅកម្ពុជា ដែលភ្ជាប់ពីរាជធានីភ្នំពេញ ទៅកាន់ក្រុងព្រះសីហនុ រាជរដ្ឋាភិបាល ក៏មានគម្រោងសាងសង់ផ្លូវល្បឿនលឿនមួយខ្សែទៀត ភ្ជាប់ទៅកាន់ក្រុងបាវិត ដែលគម្រោងមួយនេះ ដែលត្រូវបានរាជរដ្ឋាភិបាលបង្ហើបជាយូរមកហើយ ខណៈពេលនេះ​ កំពុងឋិតក្នុងការពិចារណាបន្ថែមឱ្យគ្រប់ជ្រុងជ្រោយ មុនដំណើរសាងសង់មកដល់។ កន្លងមក គម្រោងផ្លូវល្បឿនលឿននេះ ក៏បានពិចារណា និងប្រៀបធៀបប្លង់ ដែលស្នើដោយចិន និងជប៉ុន ដែលកាលពីខែ កញ្ញា ឆ្នាំមុន ក្រុមហ៊ុន China Railway International Group Co., Ltd បានបង្ហាញគំរូរប្លង់ចំនួន ៣ សម្រាប់គម្រោងសាងសង់ផ្លូវល្បឿនលឿនភ្នំពេញ-បាវិត ដែលល្បឿនលឿនបំផុតបានត្រឹម ១២០គ.ម ក្នុងមួយម៉ោង។ ក្នុងនោះ JICA ក៏បានបញ្ចប់ការសិក្សាលើគម្រោងល្បឿនលឿនភ្នំពេញ-បាវិតនេះ ផងដែរ ប៉ុន្តែដោយសារថ្លៃនៃការស្ថាបនាខ្ពស់ រាជរដ្ឋាភិបាលកំពុងពិចារណា ជ្រើសរើសយកគម្រោងដែលមានតម្លៃទាបជាង ហើយកាលពីខែកក្កដា ឆ្នាំ២០២០ សម្តេចតេជោ ហ៊ុន សែន បានចេញសេចក្ដីសម្រេច ស្ដីពី ការបង្កើតគណៈកម្មការអន្ដរក្រសួង ដើម្បីជំរុញដំណើរការអនុវត្ដគម្រោងហេដ្ឋារចនាសម្ព័ន្ធ ផ្លូវល្បឿនលឿន តភ្ជាប់ពីរាជធានីភ្នំពេញ ទៅក្រុងបាវិត។ ពេលនេះ ជាសញ្ញាណល្អមួយ ឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង កាលពីថ្ងៃចន្ទ ទី១០ ខែឧសភា ឆ្នាំ២០២១ រួមទាំងលោកជំទាវអភិបាលរងខេត្ត លោកប្រធានមន្ទីរសាធារណការ និងដឹកជញ្ជូនខេត្ត ព្រមទាំងមន្ត្រីពាក់ព័ន្ធមួយចំនួនទៀត បានអញ្ជើញចូលរួមកិច្ចប្រជុំគណៈកម្មការអន្តរក្រសួង ដោយជំរុញដំណើរការអនុវត្តគម្រោងហេដ្ឋារចនាសម្ព័ន្ធផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងបាវិត ខេត្តស្វាយរៀង ក្នុងនោះក៏មានក៏ចូលរួមពីឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន តាមរយៈZoom។ គួរបញ្ជាក់ផងដែរថា គម្រោងផ្លូវល្បឿនលឿន ភ្នំពេញ-បាវិត មានប្រវែងសរុបប្រហែល ១៣៥ គ.ម ដោយចេញពីរាជធានីភ្នំពេញ ឆ្លងកាត់ខេត្តកណ្តាល ព្រៃវែង និងស្វាយរៀង ឆ្ពោះទៅទីក្រុងបាវិត ព្រំដែនកម្ពុជា-វៀតណាម និង​មាន​តម្លៃ​ជាង ២ ​ពាន់​លាន​ដុល្លារ៕