បាត់ដំបង៖ ខណៈរាជរដ្ឋាភិបាល បានសម្រេចឲ្យតាមបណ្ដាខេត្តបើកឲ្យដំណើរការឡើងវិញ នូវរមណីយដ្ឋាន តំបន់ទេសចរណ៍ផ្សេងៗនោះ រដ្ឋបាលខេត្តបាត់ដំបង និងមន្ទីរសាធារណការ និងដឹកជញ្ជូនខេត្ត បានជួសជុលកែលម្អផ្លូវក្រាលកៅស៊ូប្រភេទ Overlay AC បង្កើនសោភ័ណភាពក្នុងក្រុង និងដើម្បីទាក់ទាញភ្ញៀវទេសចរ ក៏ដូចជាសម្រួលចរាចរណ៍ជូនពលរដ្ឋឲ្យស្រួលធ្វើដំណើរ។ លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបង លើកឡើងថា ក្រោយទឹកជំនន់ចុងឆ្នាំ២០២០ មន្ទីរបានធ្វើការជួសជុលកែលម្អ នូវហេដ្ឋារចនាសម្ព័ន្ធមួយចំនួន នៅក្នុងក្រុង និងតាមបណ្ដាស្រុក មានដូចជា ធ្វើផ្លូវក្រាលកៅស៊ូប្រភេទ Overlay AC, ផ្លូវក្រាលកៅស៊ូប្រភេទ DBST, ការរៀបចំប្រអប់លូ និងជួសជុលស្ពានជាដើម ។ លោកបានបន្តថា នៅពេលនេះ មន្ទីរកំពុងធ្វើផ្លូវក្រាលកៅស៊ូចាប់ ពីខាងមុខរូបសំណាកលោកតាដំបងគ្រញូង រហូតដល់រង្វង់មូលព្រាបស (ផ្លូវជាតិលេខ៥) ដើម្បីបង្កើនសោភ័ណភាពក្នុងក្រុងបាត់ដំបង និងកាន់តែធ្វើឲ្យការធ្វើដំណើរ របស់ប្រជាពលរដ្ឋបានស្រួលជាងមុន ហើយផ្លូវនេះមានប្រវែងសរុបប្រមាណ ២០០០ម៉ែត្រ ហើយក៏បានចាក់កៅស៊ូប្រភេទនេះជិតរួចហើយ ពីរង្វង់មូលព្រាបស ទៅដល់ជិតចំណុចបំបែកផ្លូវល្បឿនលឿន។ ជាមួយគ្នានេះ លោកប្រធានមន្ទីរ បានអំពាវនាវដល់ប្រជាពលរដ្ឋ ជួយថែរក្សាសមិទ្ធផលទាំងអស់នេះ ប្រើប្រាស់ឲ្យបានយូរ ព្រមទាំងរួមគ្នាបន្តអនុវត្តគោរពច្បាប់ចរាចរណ៍ ដើម្បីឲ្យការធ្វើ ដំណើរតាមដងផ្លូវ មានសុវត្ថិភាពទាំងអស់គ្នា និងកុំឲ្យមានគ្រោះថ្នាក់ចរាចរណ៍ ។ គួរបញ្ជាក់ថា នៅក្នុងក្រុងបាត់ដំបង រដ្ឋបាលខេត្តក៏ទើបបានដាក់ឲ្យដំណើរការនូវ សមិទ្ធផលស្ពានថ្មថ្មី ខាងមុខសាលាខេត្ត និងនៅទន្ទឹមស្ពានថ្មចាស់ បន្សល់ទុកតាំងពីសម័យអាណានិគមនិយមបារាំង មានអាយុកាលជាង ១០០ឆ្នាំ ដោយស្ពាននេះ អាចជួយកាត់បន្ថយនូវការកកស្ទះចរចរាណ៍តាមស្ពាន និងដងផ្លូវមួយចំនួនក្នុងក្រុង ហើយបង្កើនជាសោភ័ណភាពបន្ថែមទៀត សម្រាប់ខេត្តបាត់ដំបង បើទោះបីជាកំពុងជួបវិបត្តិកូវីដ-១៩ក៏ដោយនោះ ៕