កាលពីពេលថ្មីៗកន្លងមកនេះ ក្រសួងសាធារណការ និងដឹកជញ្ជូន បានស្នើ និងទទួលបានគោលការណ៍ឯកភាពពីសម្តេច ហ៊ុន ​សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយប្រកាសលុបចោលការជ្រើសរើសមន្ត្រីក្របខណ្ឌថ្មី ចំនួន១៣៣កន្លែង សម្រាប់ឆ្នាំ២០២១ នេះបើយោងតាមផេកហ្វេសប៊ុករបស់ ក្រសួងសាធារណការ និងដឹកជញ្ជូន។ ក្នុងនោះ មូលហេតុធំនោះគឺ ដើម្បីចូលរួមសន្សំសំចៃលុយជាតិ សម្រាប់ទ្រទ្រង់ស្ថិរភាពសេដ្ឋកិច្ច និងសង្គមក្នុងគ្រាលំបាក ដោយសារតែការរីករាលដាលនៃជំងឺកូវីដ១៩។ ហើយការនេះ គឺជាការរួមចំណែកជាមួយរាជរដ្ឋាភិបាលក្នុងការប្រយុទ្ធប្រឆាំង នឹងការរីករាលដាលនៃជំងឺកូវីដ១៩ ដែលកំពុងបន្តរាតត្បា តនៅក្នុងពិភពលោក ក៏ដូចជានៅក្នុងប្រទេសកម្ពុជាយើងផងដែរ។ សូមបញ្ជាក់ផងដែរថា គិតត្រឹមថ្ងៃព្រឹកថ្ងៃទី៣ ខែមីនា ឆ្នាំ២០២១ ចំនួនអ្នកឆ្លងជំងឺកូវីដ១៩ នៅទូទាំងប្រទេសកម្ពុជាគឺមាន ៨៧៨ នាក់ ដោយក្នុងនោះស្រ្ដីមានចំនួន ៣៧២ នាក់ និងបុរសចំនួន ៥០៦ និងអ្នកជាសះស្បើយមាន ៤៨២ នាក់ ខណៈអ្នកកំពុងសម្រាកព្យាបាលមានចំនួន ៣៩៦ នាក់ នេះបើយោងតាមផេកហ្វេសប៊ុករបស់ ក្រសួងសុខាភិបាលនៃព្រះរាជាណាចក្រកម្ពុជា៕