បាត់ដំបង ថ្ងៃទី០២ ខែមីនា ឆ្នាំ២០២១ -- នៅថ្ងៃ៣រោច ខែផល្គុន ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃចន្ទទី០១ ខែមីនា ឆ្នាំ២០២១ ឯកឧត្តម ងួន រតនៈ អភិបាលខេត្តបាត់ដំបង បានអញ្ជើញជាគណៈអធិបតីភាពក្នុងពិធីបើកការដ្ឋានជួសជុលផ្លូវខេត្តលេខ ១៥៦ BB២ ស្ថិតក្នុងភូមិបឹងទឹម ឃុំតាប៉ុន ស្រុកសង្កែ ខេត្តបាត់ដំបង ។ លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបង បានមានប្រសាសន៍ថា ផ្លូវខេត្តមួយខ្សែដែលយើងកំពុងតែបើកការដ្ឋានជួសជុលនាពេលនេះ គឺមានប្រវែង ៤.៦៥០ម៉ែត្រ ទទឺង ៥ម៉ែត្រ ជាប្រភេទផ្លូវក្រាលដីល្បាយថ្ម ហើយនៅពេលដែលការរៀបចំជួសជុលផ្លូវមួយខ្សែនេះបានបញ្ចប់ទៅ ប្រជាពលរដ្ឋដែលរស់នៅតាមបណ្ដោយផ្លូវនេះនឹងមានការធ្វើដំណើរកាន់តែមានភាពងាយស្រួលជាងមុន អាចធ្វើការដឹកជញ្ជូនដំណាំកសិផលនានាទៅលក់ដូរនៅឯទីផ្សារកាន់តែមានភាពងាយស្រួល ព្រមទាំងចំណាយថវិកាតិចជាងមុនផងដែរ ។ ទន្ទឹមនឹងនោះលោក ព្រួញ រិទ្ធថា បានសំណូមពរដល់ប្រជាពលរដ្ឋដែលរស់នៅតាមបណ្ដោយផ្លូវខេត្តនេះ សូមចូលរួមសហការជាមួយក្រុមការងារស្ថាបនាផ្លូវ ដោយសូមកុំរំលោភលើដីចំណីផ្លូវរបស់រដ្ឋ ធ្វើឱ្យក្រុមការងារពិបាកក្នុងការដោះស្រាយ និងធ្វើឱ្យមានផលប៉ះពាល់ដល់ប្រយោជន៍ប្រជាពលរដ្ឋផងដែរ ។ លោកបន្តថា នឹងជំរុញដល់ក្រុមការងារឱ្យខិតខំស្ថាបនាផ្លូវនេះឱ្យកាន់តែឆាប់រហ័ស និងប្រកបដោយគុណភាពខ្ពស់ តែក៏ត្រូវមានការចូលរួមសហការរវាងក្រុមការងារ និងប្រជាពលរដ្ឋដែរ ទើបដំណើរការនៃការស្ថាបនាប្រកបដោយរហ័សនិងរលូនទៀតផង។ ឯកឧត្តម ងួន រតនៈ អភិបាលខេត្តបាត់ដំបង បានមានប្រសាសន៍សាទរចំពោះការរីកចម្រើនជាច្រើននៅឃុំតាប៉ុន នេះ ជាពិសេសគឺផ្លូវកៅស៊ូដែលសល់តែជាង៤.០០០ម៉ែត្រនេះតែប៉ុណ្ណោះគឺទៅដល់ចុងភូមិចុងក្រោយគេបង្អស់ហើយ ហើយនេះក៏ជាទីតាំងទី១ដែលមានផ្ឡូវកៅស៊ូឈានជិតទៅដល់ចុងភូមិបែបនេះ ។ ឯកឧត្តមបានអំពាវនាវដល់ប្រជាពលរដ្ឋ ដែលព្យាយាមយកដីមកចាក់នៅតាមប្រឡាយដើម្បីធ្វើជាតូបលក់ដូរ ឬរស់នៅ ដែលការធ្វើបែបនេះវាអាចធ្វើឱ្យប្រឡាយកាន់តែរួមតូចជាងមុន ទឹកកាន់តែរាក់ បាត់បង់ទឹកដែលសម្រាប់ប្រើប្រាស់ផ្ទាល់ខ្លួនផង និងផ្នែកកសិកម្មផង ហើយផ្លូវដឹកជញ្ជូនតាមមាត់ប្រឡាយនេះក៏នឹងត្រូវបាត់បង់ទៀត បើអាជ្ញាធរចង់ធ្វើការស្ដារប្រឡាយនេះទៀតសោត ក៏ពិបាកក្នុងការស្ដារដែរ ពីព្រោះតែប្រជាពលរដ្ឋនាំគ្នាយកដីមកបំពេញដើម្បីតែផលប្រយោជន៍ផ្ទាល់ខ្លួន មិនគិតពីផលប្រយោជន៍រួមបែបនេះ ។ ​ឯកឧត្តម អភិបាលខេត្ត បានបន្តទៀតថា នាពេលបច្ចុប្បន្ននេះ បញ្ហាជំងឺកូវីដ-១៩កំពុងតែផ្ទុះរីករាលដាលពីមួយថ្ងៃទៅមួយថ្ងៃ ដូចនេះសំណូមពរដល់ប្រជាពលរដ្ឋដែលមានសាច់ញាតិនៅក្រៅប្រទេសជាពិសេសប្រទេសថៃ ត្រូវជូនដំណឹងដល់ពួកគាត់បើមិនចាំបាច់ទេកុំទាន់ត្រឡប់ស្រុកកំណើតអី ជាពិសេសថ្ងៃចូលឆ្នាំខាងមុខនេះ។ ព្រោះបើសិនជាមកក៏អាជ្ញាធរនៅតែយកគាត់ទៅមណ្ឌលចត្តាឡីស័ក១៤ថ្ងៃ ហើយបើមានរោគសញ្ញាសង្ស័យទៀតបន្ត១៤ថ្ងៃទៀត ធ្វើឱ្យផុតថ្ងៃចូលឆ្នាំបាត់ហើយ។ ដូច្នេះសូមពលករដែលរស់នៅប្រទេសថៃអាចនៅក្នុងប្រទេសថៃចូលឆ្នាំថ្មីនៅប្រទេសថៃសិន ព្រោះប្រពៃណីទំនៀមទម្លាប់ប្រហាក់ប្រហែលគ្នា យើងអាចចូលឆ្នាំថ្មីនៅប្រទេសថៃក៏បាន ហើយអាចប្រកបរបររកប្រាក់ចំណូលបានទៀត ប្រសើរជាងមកក្នុងប្រទេសវិញ ជាប់នៅមណ្ឌលចត្តាឡីស័កហើយមិនបានចូលឆ្នាំ បាត់បង់ចំណូលថែមទៀតផងដែរ៕