(ព្រះសីហនុ)៖ ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី០៦ ខែកុម្ភៈ ឆ្នាំ២០២១ បានដឹកនាំក្រុមការងារជំនាញបច្ចេកទេសក្រោមឱវាទក្រសួង ចុះពិនិត្យមើលវឌ្ឍនភាពនៃការស្តារអូរសំខាន់ៗនៅក្នុងក្រុងព្រះសីហនុ ដោយមានការចូលរួមពីមន្ត្រីជំនាញបច្ចេកទេសក្រោមឱវាទក្រសួង និងភាគីពាក់ព័ន្ធផងដែរ។ ក្នុងដំណើរបេសកកម្មចុះពិនិត្យនេះធ្វើឡើងក្នុងគោលបំណងដើម្បីពិនិត្យមើលវឌ្ឍនភាពការងារស្ដារអូរប្រឡាយប្រព័ន្ធចម្រោះទឹកកខ្វក់ និងស្ថានីយបូមទឹក ​ដែលសាងសង់ដោយអគ្គនាយកដ្ឋានប្រព័ន្ធចម្រោះទឹកកខ្វក់ និងក្រុមហ៊ុន BUCG ដោយក្នុងនោះរួមមានបឹងព្រែកទប់ ស្ថានីយបូមអេម៉ារីអូ ស្ថានីយបូមមុខសាលាខេត្ត និងស្ថានីយច្រោះសម្អាតទឹកកាកសំណល់ក្រុងព្រះសីហនុ ជាដើម។ គោលបំណងនៃការស្តារអូរធម្មជាតិសំខាន់ៗទាំងនេះ គឺដើម្បីការពារជំនន់ទឹកភ្លៀងនៅតាមតំបន់ងាយរងគ្រោះក្នុងទីក្រុង ក៏ដូចជារៀបចំកសាងប្រព័ន្ធប្រឡាយទឹកនៅទីក្រុងមួយនេះឱ្យមានបរិស្ថានស្អាត និងអនាម័យល្អដែលអាចទាក់ទាញភ្ញៀវទេសចរណ៍ជាតិ និងអន្តរជាតិបានកាន់តែច្រើនថែមទៀត។ សូមជម្រាបថា៖ យោងតាមរបាយការណ៍របស់អគ្គនាយកដ្ឋានប្រព័ន្ធចម្រោះទឹកកខ្វក់នៃក្រសួងសាធារណការ និងដឹកជញ្ជូន បានឲ្យដឹងថា គម្រោងអភិវឌ្ឍន៍ និងស្ដារអូរប្រឡាយធម្មជាតិស្ថិតក្នុងខេត្តព្រះសីហនុ ក្នុងក្របខណ្ឌប្រើប្រាស់កញ្ចប់ថវិកាសន្សំរបស់ជាតិ គិតត្រឹមថ្ងៃទី៣១ ខែមករា ឆ្នាំ២០២១ នេះសម្រេចបាន ៩៣,៤២%ហើយ។ ក្នុងដំណើរអញ្ជើញចុះពិនិត្យស្ថានីយច្រោះសម្អាតទឹកកាកសំណល់ក្រុងព្រះសីហនុ ដែលមានផ្ទៃក្រឡាចំនួន១៦ហិកតា ឯកឧត្តមទេសរដ្ឋមន្ត្រី បានណែនាំឲ្យក្រុមការងារជំនាញបច្ចេកទេសរៀបចំសំណើសុំថវិកាប្ដូរម៉ូទ័រ និងដំឡើងផ្ទាំងថាមពលសូឡាទៅក្រសួងសេដ្ឋកិច្ច និងហិរញ្ញវត្ថុ ដើម្បីធ្វើឲ្យប្រសើរឡើងដល់ប្រសិទ្ធភាពនៃការសម្អាតសារជាតិកខ្វក់នៅក្នុងទឹក និងកាត់បន្ថយការចំណាយថាមពលអគ្គិសនី ដែលជួយដល់ការសន្សំសំចៃថវិកាជាតិបានមួយកម្រិត ជាពិសេសធានាបាននូវបរិស្ថានស្អាតប្រកបដោយផាសុខភាពជូនប្រជាពលរដ្ឋ ភ្ញៀវជាតិនិងអន្តរជាតិ មុននឹងបញ្ចេញទឹកកខ្វក់ទាំងនោះចូលទៅក្នុងឆ្នេរសមុទ្រផងដែរ។ សូមជម្រាបជូនថា ស្ថានីយប្រព្រឹត្តិកម្មតាមបែបធម្មជាតិក្រុងព្រះសីហនុ ខេត្តព្រះសីហនុ គឺជាស្ថានីយច្រោះសម្អាតទឹកសំណល់ធំទី២ បន្ទាប់ពីស្ថានីយច្រោះសម្អាតទឹកកង្វក់តាមបែបធម្មជាតិក្រុងសៀមរាប ខេត្តសៀមរាប។ គួរកត់សំគាល់ផងដែរថា ដោយសារតែមានការហូរចូលនូវវិនិយោគចម្រុះតាមរយៈការសាងសង់អគារខុនដូ រមណីយដ្ឋាន និងអគារពាណិជ្ជកម្ម ព្រមទាំងរោងចក្រកាត់ដេរជាច្រើន ខេត្តព្រះសីហនុ បាននិងកំពុងអភិវឌ្ឍយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ ទន្ទឹមនឹងការអភិវឌ្ឍបរិមាណទឹកកខ្វក់មានការកើនឡើងលើសពីការរំពឹងទុក ដើម្បីដោះស្រាយបញ្ហាចំពោះមុខជាបន្ទាន់ ក្រសួងសាធារណការ និងដឹកជញ្ជូន បានសហការជាមួយក្រសួងស្ថាប័នពាក់ព័ន្ធ ព្រមទាំងអាជ្ញាធរដែនដីបានស្ដារឡើងវិញនូវហេដ្ឋារចនាសម្ព័ន្ធគ្រប់គ្រងទឹកកខ្វក់ និងសាងសង់ស្ថានីយបូមទឹកមួយចំនួនបន្ថែមទៀតផងដែរ។ ឆ្លៀតក្នុងឱកាសនោះផងដែរ ឯកឧត្តមទេសរដ្ឋមន្ត្រី បានអញ្ជើញចុះពិនិត្យគម្រោងពង្រីក និងធ្វើឱ្យប្រសើរឡើងកំណាត់ផ្លូវជាតិលេខ៤ ចាប់ពីPK២១៥+៨០០ ដល់ PK២២២+៧០០ អនុវត្តដោយអគ្គនាយកដ្ឋានសាធារណការនៃក្រសួងសាធារណការ និងដឹកជញ្ជូន ប្រវែង៦,៧គីឡូម៉ែត្រ មានទិសចរាចរណ៍ចំនួន៦គន្លង បីគន្លងទៅ បីគន្លងមក និងបានណែនាំឲ្យក្រុមការងារបច្ចេកទេសកែសម្រួល ពង្រីក និងដាក់ភ្លើងសញ្ញាឲ្យបានត្រឹមត្រូវដើម្បីបញ្ចៀសគ្រោះថ្នាក់ចរាចរណ៍៕