ភ្នំពេញ៖ យោងតាមរបាយការពីនាយកដ្ឋាននគរបាល ចរាចរណ៍ និងសណ្តាប់ធ្នាប់ សាធារណៈ នៃអគ្គស្នងការដ្ឋាននគរបាលជាតិ នារសៀលថ្ងៃទី២៨ ខែមករា ឆ្នាំ២០២១ នេះ បង្ហាញអោយដឹងថា រយៈពេលមួយឆ្នាំ នៃឆ្នាំ២០២០ ការរឹតបន្ដឹងច្បាប់ចរាចរណ៍របស់កងកម្លាំងនគរបាលចរាចរណ៍ផ្លូវគោក រួមសហការជាមួយសមត្ថកិច្ចពាក់ព័ន្ធដ៏ទៃទៀត គឺទទួលបានលទ្ធផលយ៉ាងល្អប្រសើរ ក្នុងនោះ ត្រួតពិនិត្យយានយន្ដសរុប ១លាន ៧សែនគ្រឿង រួមមាន ម៉ូតូ ៦៥ភាគរយ រកឃើញយានយន្ដល្មើសចំនួន ៣៥៥,៨៨៥គ្រឿង ស្មើនឹង ២០ភាគរយ ដែលបទល្មើសភាគច្រើនមិនពាក់មួកសុវត្ថិភាព ។សម្រាប់រថយន្ដដែលល្មើសភាគច្រើន លើសល្បឿនកំណត់ មានរហូតដល់ ៦០ភាគរយ ក្នុងចំណោមរថយន្ដល្មើសទាំងអស់។ គ្រោះថ្នាក់ចរាចរណ៍នៅឆ្នាំ២០២០ កើតឡើងចំនួន ៣,១៧៩ករណី ធៀបនឹងឆ្នាំ២០១៩ កើតឡើង ចំនួន ៤,១២១ករណី ថយចុះចំនួន ៩៤២ករណី។ អ្នកស្លាប់ដោយសារគ្រោះថ្នាក់ កាលពីឆ្នាំ២០២០ ចំនួន ១,៦៤៦នាក់ ធៀបនឹងឆ្នាំ២០១៩ ចំនួន ១,៩៨១នាក់ ថយចុះចំនួន ៣៣៥នាក់។ មូលហេតុដែលនាំឲ្យមានគ្រោះថ្នាក់ បណ្ដាលមកពីល្បឿន ៣៣ភាគរយ, មិនគោរពសិទ្ធិ ២៤ភាគរយ, មិនប្រកាន់ស្ដាំ ១៥ភាគរយ, ប្រជែងគ្រោះថ្នាក់ ១០ភាគរយ, បត់ឆ្វេង ស្ដាំ មិនប្រយ័ត្ន ៩ភាគរយ, ស្រវឹង ៥ភាគរយ, កត្តាយាន ៣ភាគរយ និងងងុយ ១ភាគរយ ៕