ភ្នំពេញ ថ្ងៃទី២២ ខែមករា ឆ្នាំ២០២១ -- អគារទីស្តីការក្រសួងសាធារណការ និងដឹកជញ្ជូន និងវិទ្យាស្ថាន តេជោសែន សាធារណការ និងដឹកជញ្ជូន ត្រូវបានដាក់សម្ពោធបើកឱ្យប្រើប្រាស់ជាផ្លូវការហើយ នាថ្ងៃ៩កើត ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃសុក្រ ទី២២ ខែមករា ឆ្នាំ២០២១នេះ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា អមដំណើរដោយឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន។ នៅក្នុងឱកាសនោះ ឯកឧត្តមទេសរដ្ឋមន្ត្រី បានមានប្រសាសន៍ថា ដោយផ្អែកលើការអភិវឌ្ឍ និងការរីកចម្រើនរបស់ប្រទេសជាតិ ក្រសួងសាធារណការ និងដឹកជញ្ជូន បានរៀបចំកែទម្រង់រចនាសម្ព័ន្ធ​របស់ខ្លួន ហើយការផ្លាស់ប្តូរទីតាំងអគារទីស្តីការក្រសួងសាធា រណការ និងដឹកជញ្ជូនមកទីតាំងថ្មី និងការដាក់ឱ្យដំណើរការវិទ្យាស្ថាន តេជោសែន សាធារណការ និងដឹកជញ្ជូននេះ គឺបញ្ជាក់​អំពីប្រវត្តិសាស្ត្រថ្មីមួយទៀត ដែលបង្ហាញឱ្យឃើញពីការផ្លាស់ប្តូរ និងការរីកចម្រើនលើវិស័យសាធារណការ និងដឹកជញ្ជូន ក្នុងសម័យតេជោដ៏រុងរឿងពោរពេញដោយសុខសន្តិភាព និងការអភិវឌ្ឍ។ ជាមួយគ្នានេះដែរ ឯកឧត្តមទេសរដ្ឋមន្ត្រីបានគូសបញ្ជាក់ថា សមិទ្ធផលថ្មីលើទឹកដីសន្តិភាពដែលលេចចេញជារូបរាងឡើងនេះ គឺជាចំណងដៃដ៏ថ្លៃថ្លាមិនអាចកាត់ថ្លៃបានរបស់រាជរដ្ឋាភិបាលកម្ពុជា ជូនដល់បងប្អូនមន្ត្រីរាជការទាំងអស់ ក៏ដូចជាប្រជាពលរដ្ឋ និងសង្គមជាតិទាំងមូល ក្រោមការដឹកនាំប្រកបដោយគតិបណ្ឌិត និងទស្សនទានវែងឆ្ងាយរបស់សម្ដេចតេជោនាយករដ្ឋមន្ដ្រី ដែលជា​អគ្គមគ្គុទេ្ទសក៍ និងជាប្រតិបត្តិករនយោបាយឈ្នះ-ឈ្នះ ដែលបានតស៊ូរំដោះប្រទេសជាតិឱ្យរួចផុតពីរបបប្រល័យពូជសាសន៍ និងបានពុះពារកសាងសន្តិភាព លទ្ធិប្រជាធិបតេយ្យ ខឿនសេដ្ឋកិច្ច វឌ្ឍនភាពសង្គមដ៏គាប់ប្រសើរ និងការអភិវឌ្ឍលើគ្រប់វិស័យ ជាពិសេសបានដឹកនាំនាវាកម្ពុជាឆ្ពោះទៅរកភាពជោគជ័យថ្មី ៗជាបន្តបន្ទាប់ជាច្រើន សម្រាប់ជាប្រវត្តិសាស្ត្រនៃប្រជាជាតិកម្ពុជាទាំងមូល។ ទន្ទឹមនឹងនេះ ឯកឧត្តមទេសរដ្ឋមន្ត្រីក៏បានមានប្រសាសន៍ថ្លែងអំណរគុណផងដែរដល់ក្រសួងសេដ្ឋកិច្ច និងហិរញ្ញវត្ថុ ក្រសួង-ស្ថាប័នពាក់ព័ន្ធផ្សេងៗទៀត ទីភ្នាក់ងារ JICAជប៉ុន ដៃគូអភិវឌ្ឍន៍នានា រួមទាំងក្រុមហ៊ុន គមនាគមន៍ និងសំណង់ចិន (CCCC)/(CRBC) និងក្រុមហ៊ុនសំណង់សៀងហៃ(SCG) ដែលបានចូលរួមចំណែកក្នុងការសម្រេចបានជោគជ័យ និងលទ្ធផលជាផ្លែផ្កាជាច្រើនស្របតាមចក្ខុវិស័យ និងបេសកកម្មរបស់ក្រសួង។ ជាពិសេស ឯកឧត្តមទេសរដ្ឋមន្ត្រីបានសម្តែងការអបអរសាទរចំពោះការទទួលបានតំណក់ប្រេងជាលើកដំបូងរបស់កម្ពុជា ចំថ្ងៃខួបលើកទី២២នៃការបញ្ចប់សង្គ្រាមរុាំរ៉ៃនៅកម្ពុជា និងបាននាំមកនូវការឯកភាពជាតិ និងបូរណភាពទឹកដី ក្រោមម្លប់ដ៏ត្រជាក់ត្រជុំ នៃ “សន្តិភាព” ដែលជាកត្តាសារវន្តមិនអាចខ្វះបាន ក្រោមការដឹកនាំរបស់សម្តេចតេជោនាយករដ្ឋមន្ត្រី និងបានប្តេជ្ញាចិត្តយ៉ាងមុះមុតថា នឹងខិតខំប្រឹងប្រែងបំពេញភារកិច្ចរបស់ខ្លួនឱ្យកាន់តែខ្លាំងក្លា និងប្រកបដោយការទទួលខុសត្រូវខ្ពស់ ដើម្បីធានាបានគុណភាព និងប្រសិទ្ធភាពលើការ​កសាងហេដ្ឋារចនាសម្ព័ន្ធដឹកជញ្ជូន ការអភិវឌ្ឍធនធានមនុស្ស និងការផ្តល់សេវាសាធារណៈជូនបងប្អូនប្រជាពលរដ្ឋ ជាមួយនឹងអគារទីស្តីការថ្មីរបស់ក្រសួង វិទ្យាស្ថានតេជោសែន មណ្ឌលផ្តល់សេវាសាធារណៈថ្មី និងគ្រឿងចក្រជាច្រើនដែលក្រសួងមាន៕