[Rasmei Kampuchea Daily News] - រដ្ឋបាលខណ្ឌដង្កោ ប្រជុំដាក់ផែនការ ពង្រឹងកិច្ចការត្រួតពិនិត្យ អាវុធជាតិផ្ទុះ ការអនុវត្តច្បាប់ចរាចណ៍ផ្លូវគោក
ភ្នំពេញៈ នៅព្រឹកថ្ងៃទី១៣ ខែមករា ឆ្នាំ២០២១ រដ្ឋបាលខណ្ឌដង្កោ បានបើក កិច្ចប្រជុំ គណៈបញ្ជាការឯកភាព រដ្ឋបាលខណ្ឌដង្កោ ក្រោមវត្តមានលោកស្រី គឹម ញឹប អភិបាលខណ្ឌដង្កោ និងជាប្រធានគណៈបញ្ជាការឯកភាព រដ្ឋបាលខណ្ឌដង្កោ ដើម្បីដាក់ ផែនការ ពង្រឹងកិច្ចការត្រួតពិនិត្យ អាវុធជាតិផ្ទុះ ការអនុវត្តច្បាប់ ស្តីពីចរាចណ៍ផ្លូវគោក។
មន្ត្រីរដ្ឋបាលខណ្ឌ បានឱ្យដឹងថាៈ កិច្ចប្រជុំគណៈបញ្ជាការឯកភាព រដ្ឋបាលខណ្ឌដង្កោ លោកស្រី អភិបាលខណ្ឌដង្កោ បានណែនាំដល់ចៅសង្កាត់ទាំងអស់ និងសមត្ថកិច្ច នគរបាល និងកងរាជអាវុធហត្ថខណ្ឌ ត្រូវផ្តោតការយកចិត្តទុកដាក់សំខាន់ ទៅលើការ ត្រួតពិនិត្យ និងពង្រឹង កិច្ចការត្រួតពិនិត្យ អាវុធជាតិផ្ទុះ គ្រឿងញៀន គ្រឿងស្រវឹង និងការ អនុវត្តច្បាប់ ស្ដីពីចរាចណ៍ផ្លូវគោក ឱ្យបានជាប់ជាប្រចាំ និង ជាពិសេស ការអនុវត្តតាម វិធានការ របស់ក្រសួងសុខាភិបាល ដើម្បីចូលរួមបង្ការ និងទប់ស្កាត់ ការឆ្លងជំងឺកូវីដ-១៩ និងកិច្ចការការពារសន្ដិសុខ សណ្ដាប់ធ្នាប់ និង របៀបរៀបរយសាធារណៈជូនបងប្អូន ប្រជាពលរដ្ឋ ក្នុងខណ្ឌដង្កោ៕
