ថ្ងៃពុធ ១៥រោច ខែបុស្ស ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៣ ខែមករា ឆ្នាំ២០២១ នៅទីស្ដីការ ក្រសួង ឯកឧត្ដម តូច ចាន់កុសល រដ្ឋលេខាធិការប្រចាំការ និងជាប្រធានគណៈកម្មការរៀបចំសន្និបាត នៃក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំគណៈកម្មការសម្រាប់ត្រៀមរៀបចំសន្និបាតបូកសរុបលទ្ធផលការងារឆ្នាំ២០២០ និងទិសដៅការងារឆ្នាំ២០២១ របស់ក្រសួងសាធារណការ និងដឹកជញ្ជូន ដោយមានការអញ្ជើញចូលរួមពីថ្នាក់ដឹកនាំគណៈកម្មការ អនុគណៈកម្មការ និងសមាជិក សមាជិកាផងដែរ។ កិច្ចប្រជុំនេះធ្វើក្នុងគោលបំណងបែងចែកគណៈកម្មការ និងអនុគណៈកម្មការទទួលបន្ទុកភារកិច្ចរៀបចំសន្និបាត ក៏ដូចជាប្រមូលធាតុចូល និងផ្ដល់អនុសាសន៍ដល់អនុគណៈកម្មការនីមួយៗ សំដៅឱ្យការរៀបចំសន្និបាតបូកសរុបលទ្ធផលការងារឆ្នាំ២០២០ និងទិសដៅការងារឆ្នាំ២០២១។ ថ្លែងទៅកាន់អង្គប្រជុំនាឱកាសនោះ ឯកឧត្តមរដ្ឋលេខាធិការប្រចាំការ បានណែនាំឱ្យថ្នាក់ដឹកនាំ និងសមាជិកសមាជិកាអនុគណៈកម្មការទទួលបន្ទុកត្រៀមរៀបចំពិធីនេះ បំពេញភារកិច្ចរបស់ខ្លួនតាមការចាត់តាំង និងសហការឱ្យបានជិតស្និទ្ធជាមួយភាគីពាក់ព័ន្ធទាំងអស់ សំដៅធ្វើយ៉ាងណាឱ្យការរៀបចំសន្និបាតបូក សរុបលទ្ធផលការងារឆ្នាំ២០២០ និងទិសដៅការងារឆ្នាំ២០២១ ប្រព្រឹត្តទៅដោយរលូនតាមផែនការដែលបានគ្រោងទុក៕