[ក្រសួងព័ត៌មាន] - គម្រោងពង្រីកសួនច្បារខេត្តកំពតត្រូវធ្វើរួមគ្នាជាមួយគម្រោងដាក់ប្រព័ន្ធលូរបស់ ADB
2021-01-12
ទៅកាន់ទំព័រចុះផ្សាយក្នុង ក្រសួងព័ត៌មាន
កំពត ថ្ងៃទី១២ ខែមករា ឆ្នាំ២០២១ -- ដើម្បីកាត់បន្ថយការចំណាយមិនចាំបាច់ ចំណេញពេលវេលា និងរក្សាបានសោភណភាពទាក់ទាញភ្ញៀវទេសចរឱ្យមកកម្សាន្តខេត្តកំពតកាន់តែច្រើន រដ្ឋបាលខេត្តកំពត និងមន្ត្រីជំនាញក្រសួងសាធារណការនិងដឹកជញ្ជូនបានសម្រេច ឯកភាពអនុវត្តន៍គម្រោងពង្រីកសួនច្បារខេត្តកំពត និងគម្រោងដាក់ប្រព័ន្ធលូរបស់ធនាគារអភិវឌ្ឍន៍អាស៊ី (ADB) នៅក្នុងពេលដំណាលគ្នា។ ថ្លែងនៅក្នុងកិច្ចប្រជុំពិភាក្សា និងធ្វើបទបង្ហាញអំពីវឌ្ឍនភាពការងារ សម្រាប់ការអនុវត្តគម្រោងសាងសង់ប្រព័ន្ធលូប្រមូលទឹកកខ្វក់ ស្ថានីយអាងប្រព្រឹត្តិកម្មទឹកកខ្វក់ និងប្រព័ន្ធរំដោះទឹកភ្លៀង នៃគម្រោងអភិវឌ្ឍន៍ក្រុងរបៀង២នៅព្រឹកថ្ងៃ១៣រោច ខែបុស្ស ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃចន្ទ ទី១១ ខែមករា ឆ្នាំ ២០២១ ឯកឧត្តម ជាវ តាយ អភិបាលខេត្តកំពត រួមជាមួយឯកឧត្តម វង្ស ពិសិដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន បានលើកឡើងថា រយៈពេលចុងក្រោយនេះ ខេត្តកំពតក្លាយជាគោដៅទេសចរណ៍មួយយ៉ាងសំខាន់ និងអាចនិយាយបានថា ជាគោលដៅទេសចរណ៍លំដាប់ទី២ នៅក្នុងប្រទេសបន្ទាប់ពីខេត្តសៀម រាប ហើយលំហូរការធ្វើចរាចរដឹកទំនិញឆ្លងកាត់តាមផ្លូវនៃខេត្តនេះ ក៏ច្រើនជាងផ្លូវជាតិលេខ៤។
ជាមួយនឹងគម្រោងដូចខាងលើក្រសួងសាធារណការ និងដឹកជញ្ជូនបានបង្វែរមកកាន់ខេត្តកំពតមុន។ ជាក់ស្តែងដូចជាការពន្លឿន ការងារស្ថាបនាផ្លូវជាតិលេខ៣ និងលេខ២ គឺសុទ្ធសឹងតែបម្រើដល់វិស័យទេសចរណ៍ និងការដឹកជញ្ជូនទំនិញចេញចូលឆ្លងកាត់ខេត្តកំពត។ ទទ្ទឹមគ្នានេះដែរក្រុងកំពត គ្រោងពង្រីកសួនច្បារ ពីចំណុចគល់ស្ពានចាស់ដល់គល់ស្ពានថ្មី គឺត្រួតកន្លែងគ្នា ជាមួយនិងគម្រោងសាងសង់ប្រព័ន្ធលូប្រមូលទឹកកខ្វក់ ស្ថានីយអាងប្រព្រឹត្តិកម្មទឹកកខ្វក់ និងប្រព័ន្ធរំដោះទឹកភ្លៀង នៃគម្រោងអភិវឌ្ឍន៍ក្រុងរបៀង២របស់ ADB ដែរ។ ដើម្បីកាត់បន្ថយការចំណាយមិនចាំបាច់ និងចំណេញពេលវេលា ធានាបាននូវអនាម័យបរិស្ថានស្អាត នាំមកនូវសោភណភាព ផាសុកភាពទាក់ទាញទេសចរឱ្យកាន់តែច្រើន អាជ្ញាធរ ខេត្ត ក៏ដូចជាជំនាញបានសម្រេចថា នឹងធ្វើការស្ថាបនាគម្រោងទាំងពីរនេះព្រមជាមួយគ្នាតែ ម្តង។
អាជ្ញាធរខេត្តកំពត និងមន្ត្រីជំនាញក្រសួងបានផ្តល់នូវអនុសាសន៍ និងគោលការណ៍មួយចំនួន ដូចជា ១-ណែនាំឱ្យមន្ទីររៀបចំដែនដី នគរូបនីយកម្ម សំណង់និងសុរិយោដី ពន្លឿនការគូសប្លង់ពង្រីកសួនច្បារតាមបណ្តោយមាត់ព្រែក ចន្លោះស្ពានទាំងពីរ ឱ្យបានឆាប់រហ័ស និងយកមកបង្ហាញក្រុមការងារនៅសប្តាហ៍ក្រោយក្នុងនាមរដ្ឋបាលខេត្ត។
ជាមួយនេះឯកឧត្តម ក៏សូមឱ្យអ្នកទទួលការអនុវត្តគម្រោង និងភាគី ADB ត្រូវស្នើមករដ្ឋបាលខេត្ត ដោះស្រាយជាបន្ទាន់ បើមានការរាំងស្ទះណាមួយដែលត្រូវឱ្យរដ្ឋបាលខេត្តជាអ្នកដោះស្រាយ ដើម្បីឱ្យគម្រោងអនុវត្តន៍ទៅបានឆាប់រហ័ស ។ ២-សូមឱ្យអ្នកទទួលការសាងសង់ និង តំណាង ADB ពន្លឿនការសាងសង់លូអក្សរអ៊ុយឱ្យបានឆាប់រហ័ស និងរួចរាល់ក្នុងរដូវប្រាំងនេះ។ សូមបញ្ជាក់ថា ដើម្បីបំពេញតម្រូវការពលរដ្ឋ ក៏ដូចជាភ្ញៀវទេសចរ សម្រួលការធ្វើដំណើរកុំឱ្យកកស្ទះ រដ្ឋបាលខេត្តកំពតបាននិងកំពុងសាងសង់ស្ពានត្រើយកោះ ដែលមានសភាពចាស់ទ្រុឌទ្រោម និងបានកំពុងសិក្សា ដាក់សំណើទៅរាជរដ្ឋាភិបាល ដើម្បីសុំសាងសង់ស្ពានឆ្លងកាត់ព្រែកកំពង់បាយមួយ បន្ថែមទៀតផងដែរ៕
