រដ្ឋាភិបាលកម្ពុជា បាននិងកំពុងជំរុញដៃគូអភិវឌ្ឍន៍ទាំងក្នុង និងក្រៅប្រទេស ឱ្យមកវិនិយោគលើគម្រោងហេដ្ឋារចនាដឹកជញ្ចូនជាង ៣០០ គម្រោង ទូទាំងប្រទេសកម្ពុជា ខណៈផែនការមេភស្តុភារកម្មដែលរៀបចំដោយក្រសួងសាធារណការ និងដឹកជញ្ជូន ក៏កំពុងត្រូវបានបញ្ចប់ផងដែរ។ នេះបើយោងតាមប្រសាសន៍របស់ ឯកឧត្តមទេសរដ្ឋមន្រ្តីស៊ុន ចាន់ថុល រដ្ឋមន្រ្តីក្រសួងសាធារណការនិងដឹកជញ្ជូន ក្នុងសុន្ទរកថាតាមប្រព័ន្ធវីដេអូពីចម្ងាយ ក្នុងវេទិកាវិនិយោគហេដ្ឋារចនាសម្ព័ន្ធនិងសំណង់លើកទី១១ កាលពីថ្ងៃទី ២ ធ្នូ កន្លងមកនេះ។ ឯកឧត្តម បានមានប្រសាសន៍ថា៖ «បច្ចុប្បន្ន យើងកំពុងសម្រេចជាចុងក្រោយលើផែនការមេការតភ្ជាប់ប្រព័ន្ធភស្តុភារកម្មនិងប្រព័ន្ធដឹកជញ្ចូន។ យើងក៏បានកំណត់អត្តសញ្ញាណគម្រោងហេដ្ឋារចនាសម្ព័ន្ធដឹកជញ្ជូនជាង ៣០០ គម្រោងរួចហើយ។ ដូច្នេះយើងជំរុញឱ្យដៃគូអភិវឌ្ឍន៍ទាំងអស់ចូលរួមផ្តល់ហិរញ្ញប្បទាន និងវិនិយោគលើគម្រោងទាំងនេះ»។ ឯកឧត្តម បន្ថែមថា ផែនការមេនេះមានគោលបំណងចង់ធ្វើឱ្យកម្ពុជាក្លាយជាមជ្ឈមណ្ឌលដឹកជញ្ចូនគោលក្នុងតំបន់ នាពេលអនាគតដ៏ខ្លីខាងមុខនេះ។ ទោះជាយ៉ាងណាក្ដី ឯកឧត្តមទេសរដ្ឋមន្រ្តីស៊ុន ចាន់ថុល មិនបានបញ្ជាក់ពីទិន្នន័យលម្អិតនៃគម្រោងទាំង ៣០០ នេះទេ។ គួរបញ្ជាក់ផងដែរថា បើយោងតាមប្រសាសន៍ឯកឧត្តម ទោះមានវិបត្តិកូវីដក៏ដោយ គម្រោងអភិវឌ្ឍហេដ្ឋារចនាសម្ព័ន្ធធំៗ រូមមាន ផ្លូវ១០ ខ្សែ ព្រលានយន្តហោះ ២ កន្លង និងស្ពានធំមួយខ្សែ នៅដំណើរការដោយរលូន គ្មានពន្យារពេល ហើយក៏មានគម្រោងជាច្រើនទៀតកំពុងសិក្សា។ នៅក្នុងសុន្ទរកថាឯកឧត្តម ក៏បានថ្លែងអំណរគុណយ៉ាងជ្រាលជ្រៅចំពោះដៃគូទាំងអស់រួមមានចិន ជប៉ុន កូរ៉េ WorldBank ធនាគារអភិវឌ្ឍន៍អាស៊ី និងដៃគូដទៃទៀត ដែលតែងតែគាំទ្រដល់ប្រទេសកម្ពុជា ជាពិសេសក្នុងការស្ដារហេដ្ឋារចនាសម្ព័ន្ធ ។