កាលពីថ្ងៃទី៥ ខែវិច្ឆិកា ឆ្នាំ២០២០ម្សិលមិញនេះ ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ថ្លែងក្នុងពិធីសម្ពោធបើកឱ្យប្រើប្រាស់ជាផ្លូវការមជ្ឈមណ្ឌលសំបកកង់ និងថែទាំយានយន្ត "ថាយផ្ល័ស"របស់ក្រុមហ៊ុនវើលដ៏ប្រ៊ីដ ខាសូលូសិន បានបង្ហើបឲ្យដឹងថា ក្នុង១ ឆ្នាំកម្ពុជាខាតបង់លុយប្រហែល ៣៥០លានដុល្លារ ដោយសារគ្រោះថ្នាក់ចរាចរណ៍។ ឯកឧត្តមបានបញ្ជាក់ថា ក្នុង១ ឆ្នាំកម្ពុជាបានបាត់បង់ថវិកាជាតិ និង​​ឯកជនប្រហែល ៣៥០លានដុល្លារ ដោយសារគ្រោះថ្នាក់ចរាចរណ៍ ខណៈជាមធ្យមក្នុងមួយថ្ងៃមានអ្នកស្លាប់ដោយសារគ្រោះថ្នាក់ចរាចរណ៍ចំនួន៥នាក់ និងរបួសពី ១០-១៥នាក់។ ឯកឧត្តមក៏បានបញ្ជាក់ពីមូលហេតុមួយធំដែលបណ្តាលឲ្យមានគ្រោះថ្នាក់ចរាចរណ៍ផងដែរ នោះគឺកត្តាមកពីមនុស្ស (អ្នកបើកបរ) ដូចជា អត់គោរពច្បាប់ចរាចរណ៍ បើកហួសកំណត់ល្បើននៃច្បាប់ អត់ពាក់មួកសុវត្ថិភាព អត់ពាក់ខ្សែក្រវ៉ាត់សុវត្ថិភាព ប្រើគ្រឿងញៀនគ្រឿងស្រវឹងពេលបើកបរ វាជែងដោយគ្មានការប្រុងប្រយ័ត្នជាដើម៕