ឯកឧត្តមទេសរដ្ឋមន្ត្រី ស៊ុន ចាន់ថុល អញ្ជើញផ្ដល់បទសម្ភាសន៍ជាមួយទូរទស្សន៍-វិទ្យុអាស៊ីអាគ្នេយ៍ ក្នុង ការថតផលិតខ្សែភាពយន្តឯកសារអំពី “អព្ភូតហេតុកម្ពុជា (Cambodian Miracle)” ថ្ងៃព្រហស្បតិ៍ ៦រោច ខែអស្សុជ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៨ ខែតុលា ឆ្នាំ២០២០ នៅ ទីស្តី ការក្រសួង ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញផ្តល់បទសម្ភាសន៍ជាមួយទូរទស្សន៍-វិទ្យុអាស៊ីអាគ្នេយ៍ ក្រោមប្រធានបទ “អព្ភូតហេតុកម្ពុជា (Cambodian Miracle)” ។ កិច្ចសម្ភាសន៍នេះធ្វើឡើងក្នុងគោលបំណងដើម្បីឱ្យសាធារណជនបានយល់ច្បាស់ពីសារៈសំខាន់នៃសន្តិភាពក្នុងការអភិវឌ្ឍប្រទេសជាតិមាតុភូមិ និងចូលរួមថែរក្សាឱ្យបានគង់វង្សទោះក្នុងតម្លៃណាក៏ដោយ និងដឹងគុណសន្តិភាពផងដែរ។ ថ្លែងទៅកាន់ទូរទស្សនិកជននាឱកាសនោះ ឯកឧត្តមទេសរដ្ឋមន្ត្រី បានគូសបញ្ជាក់អំពីការរីកចម្រើនលើ វិស័យសាធារណការ និងដឹកជញ្ជូន ក្រោមស្នាព្រះហស្ថដឹកនាំរបស់ព្រះករុណាព្រះបរមរតនកោដ្ឋ ដែល សម័យនោះ ការអភិវឌ្ឍហេដ្ឋារចនាសម្ព័ន្ធដឹកជញ្ជូនមានសន្ទុះយ៉ាងខ្លាំងដូចជា៖ ផ្លូវថ្នល់ ផ្លូវរថភ្លើង កំពង់ផែទន្លេ កំពង់ផែសមុទ្រ អាកាសយានដ្ឋានជាតិនិងអន្តរជាតិ។ ឈានចូលដល់សម័យសាធារណរដ្ឋខ្មែរ ក្រោមការដឹកនាំរបស់លោកសេនាប្រមុខ លន់ នល់ សង្គ្រាម បានផ្ទុះឡើង ហេដ្ឋារចនាសម្ព័ន្ធផ្លូវថ្នល់ត្រូវបានបំផ្លិចបំផ្លាញដោយសារសង្គ្រាម ជាពិសេសស្ពានជ្រោយ ចង្វារ ត្រូវបានបំផ្លាញដោយសារការទម្លាក់គ្រាប់បែក ផ្លូវរថភ្លើងត្រូវបានខូចខាតស្ទើរតែទាំងស្រុង កំពង់ផែ ក្រុងព្រះសីហនុត្រូវបានប្រើប្រាស់ដើម្បីដឹកសព្វាវុធបម្រើក្នុងសង្គ្រាមប៉ុណ្ណោះ។ ក្រោយមកទៀត វិស័យសាធារណការ និងដឹកជញ្ជូន ក្រោមការដឹកនាំរបស់របបកម្ពុជាប្រជាធិបតេយ្យ (របបខ្មែរក្រហម) ដឹកនាំដោយប៉ុលពត ប្រព័ន្ធហេដ្ឋារចនាសម្ព័ន្ធផ្លូវថ្នល់ត្រូវបំផ្លិចបំផ្លាញស្ទើរគ្មានសល់ យានយន្តដែលបន្សល់ទុកពីសម័យសង្គមរាស្រ្តនិយមត្រូវបានកម្ទេចចោល។ ប៉ុន្តែក្រោយពីកម្ពុជាត្រូវបានរំដោះចេញពីរបបប្រល័យពូជសាសន៍ដ៏ឃោរឃៅយង់ឃ្នង ឈានចូលដល់ សម័យព្រះរាជាណាចក្ររាជាណាចក្រទី២ ប្រព័ន្ធហេដ្ឋារចនាសម្ព័ន្ធបណ្តាញផ្លូវថ្នល់ត្រូវបានអភិវឌ្ឍរីក ចម្រើនឥតឈប់ឈរពីមួយថ្ងៃទៅមួយថ្ងៃ ក្រោមការដឹកនាំប្រកបដោយគតិ បណ្ឌិតរបស់សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងក្រោមម្លប់សន្តិភាពក្នុងដំបូល តែមួយ។ ឯកឧត្តមទេសរដ្ឋមន្ត្រីបានថ្លែងថា៖ នៅសម័យកាលព្រះរាជាណាចក្រទី២នេះ នយោបាយ ឈ្នះឈ្នះ របស់សម្ដេចតេជោនាយករដ្ឋមន្ត្រី បាននាំមកនូវការបង្រួបបង្រួមជាតិ ប្រទេសជាតិមានការរីកចម្រើន រាជរដ្ឋាភិបាលមានឱកាសកសាងផ្លូវ ស្ពាន សាលារៀន មន្ទីរពេទ្យ វត្តអារាម ជាពិសេស សុខសន្តិភាព ដែលរកបានដោយលំបាក បានផ្ដល់ឱកាសឱ្យរាជរដ្ឋាភិបាលខិតខំប្រឹងប្រែងទាក់ទាញ ទេសចរណ៍រាប់ លាននាក់មកលេងកម្ពុជា ទាក់ទាញវិនិយោគិនបណ្ដាក់ទុននៅកម្ពុជា អនុញ្ញាតឲ្យរាជរដ្ឋាភិបាលស្វែង រកទីផ្សារបរទេស យកកសិផលទៅលក់ដើម្បីបង្កើតការងារធ្វើជូនបងប្អូនប្រជាពលរដ្ឋ។ លើសពីនេះទៀត ឯកឧត្តមទេសរដ្ឋមន្ត្រី បានវាយតម្លៃខ្ពស់ចំពោះសារៈសំខាន់នៃកត្តាសុខសន្តិភាពដែល នាំមកនូវការរីកចម្រើនជូនសង្គមជាតិ គ្មានសុខសន្តិភាព គ្មានស្ថិរភាពនយោបាយ យើងមិនអាចទាក់ ទាញវិនិយោគិន មិនអាចកសាងប្រទេសជាតិមាតុភូមិយើងបានទេ ដូច្នេះយើងទាំងអស់គ្នាជាប្រជាពល រដ្ឋត្រូវតែអរគុណសន្តិភាព។ ជាមួយគ្នានោះផងដែរ ឯកឧត្ដមទេសរដ្ឋមន្ត្រី បានគូសបញ្ជាក់ផងដែរអំពីការរីកចម្រើនលើវិស័យហេដ្ឋា រចនាសម្ព័ន្ធផ្លូវថ្នល់ ផ្លូវដែក ផ្លូវទឹក និងផ្លូវអាកាស ដែលក្នុងនោះ៖ ផ្លូវថ្នល់បាននឹងកំពុងធ្វើឱ្យប្រសើរឡើង ពីផ្លូវពីរគន្លងទៅបួនគន្លង គម្រោងសាងសង់ផ្លូវល្បឿនលឿន គម្រោងសាងសង់ផ្លូវនៅប៉ែកពាយព្យ ប្រទេសទៅកាន់កំពង់ផែសមុទ្រដើម្បីកាត់បន្ថយពេលវេលានៃការដឹកជញ្ជូនទៅកាន់កំពង់ផែទឹកជ្រៅ និងផែនការមេដឹកជញ្ជូនតាមផ្លូវទឹក ជាដើម។ ឯកឧត្តមទេសរដ្ឋមន្ត្រីបានក្រើនរំលឹកឡើងវិញនូវប្រសាសន៍ដ៏ថ្លៃថ្លារបស់សម្ដេចតេជោនាយករដ្ឋមន្ត្រី ដែលបានផ្ដល់អាទិភាពលើការអភិវឌ្ឍវិស័យចំនួនបួន ក្នុងនោះរួមមាន៖ ផ្លូវ ទឹក ភ្លើង ធនធានមនុស្ស ដើម្បីជួយជំរុញ កសាង និងអភិវឌ្ឍប្រទេសជាតិឲ្យកាន់តែមានការរីកចម្រើនឡើង។ ទាក់ទងនឹងវិស័យដឹកជញ្ជូន ឯកឧត្តមទេសរដ្ឋមន្ត្រី បានសម្តែងនូវមោទនភាពចំពោះការដាក់ឱ្យដំណើរ ការប្រព័ន្ធស្វ័យប្រវត្តិកម្មអនឡាញ ដើម្បីផ្ដល់សេវាសាធារណៈជូនដល់បងប្អូនប្រជាពលរដ្ឋប្រកបដោយ ប្រសិទ្ធភាព តម្លាភាព និងទាន់ពេលវេលា យោងតាមអនុសាសន៍ដ៏ខ្ពង់ខ្ពស់របស់សម្ដេចតេជោ នាយក រដ្ឋមន្ត្រី។ ឆ្លៀតក្នុងឱកាសនោះផងដែរ ឯកឧត្តមទេសរដ្ឋមន្ត្រី បានអំពាវនាវឲ្យបងប្អូនប្រជាពលរដ្ឋរួបរួមគ្នាអម ដំណើរជាមួយរាជរដ្ឋាភិបាលការពារសុខសន្តិភាពឱ្យបានជាដាច់ខាតដើម្បីបន្តរួបរួមគ្នាកសាងប្រទេសជាតិមាតុភូមិឲ្យបានរុងរឿងចូលរួមចំណែកកាត់បន្ថយភាពក្រីក្រ៕