ពិធី​បើកការដ្ឋានស្ថាបនាស្ពានតភ្ជាប់រវាងទីក្រុងកោះពេជ្រ និងទីក្រុងកោះនរា នឹង​ត្រូវ​ធ្វើ​ឡង​នៅ​​​ថ្ងៃ​ទី​២៦ ខែតុលា​​ខាង​មុខ។ នេះបើតាម​​ប្រសាសន៍ ​សម្តេច​តេជោ ហ៊ុន សែន​​ នាយករដ្ឋមន្រ្តីនៃព្រះរាជាណាចក្រកម្ពុជា​បាន​​ថ្លែងនៅ​ក្នុងពិធី​សម្ពោធមជ្ឈមណ្ឌលកម្សាន្ត ខ្នាតយក្សដំបូងគេនៅកម្ពុជា «ព្រីនស៍ ម៉ាណ័រ» នៅស្រុកកៀនស្វាយ ខេត្តកណ្តាល នាថ្ងៃទី៧ ខែតុលានេះ។ “ខ្ញុំនឹងទៅបើកការដ្ឋានស្ថាបនាស្ពានតភ្ជាប់រវាងទីក្រុងកោះពេជ្រ និងទីក្រុងកោះនរាហ៍ ដើម្បីសម្រួលចរាចរណ៍ពីស្រុកគៀនស្វាយទៅកាន់ទីក្រុងភ្នំពេញ”។ សម្តេច​បន្ថែម​។ ក្រុមហ៊ុន OCIC បានទទួលគោលការណ៍អនុញ្ញាតពីរាជរដ្ឋាភិបាល ក្នុងការអភិវឌ្ឍកោះនរា នេះ ដែលមានទីតាំងស្ថិតក្នុងខណ្ឌច្បារអំពៅ រាធានីភ្នំពេញ នេះបើយោងតាមរយៈលិខិតលេខ ១០៨៥ សជណ.កស ចុះថ្ងៃទី ២៨ ខែតុលា ឆ្នាំ ២០១៨ របស់ទីស្តីការគណៈរដ្ឋមន្ត្រី។ ជាផ្នែកមួយនៃគម្រោងអភិវឌ្ឍន៍កោះនរារបស់ខ្លួន ក្នុងលិខិតដដែលនោះ មានបញ្ជាក់ថា ក្រុមហ៊ុន OCIC នឹងស្ថាបនាស្ពានបេតុងខ្សែកាបចំនួន ១ ខ្សែ ដើម្បីតភ្ជាប់ទីក្រុងកោះពេជ្រ ទៅគម្រោងអភិវឌ្ឍកោះនរា។ ក្រោយពីសាងសង់រួច ស្ពាននេះ នឹងជួយកាត់បន្ថយការកកស្ទះចរាចរណ៍របស់ប្រជាពលរដ្ឋនៅស្ពានមុនីវង្ស បានមួយកម្រិតធំ ពេលស្ថាបនារួច។ ជាពិសេសជាងនេះទៅទៀត នឹងជួ​យតភ្ជាប់គមនាគមន៍ និងសកម្មភាពសេដ្ឋកិច្ចពីតំបន់ជ្រោយចង្វារ តំបន់កោះពេជ្រ ទៅតំបន់បឹងស្នោះ និងច្បារអំពៅថែមទៀតផង។ យោងតាមអគ្គនាយករងក្រុមហ៊ុន OCIC លោក ទូច សំណាង ធ្លាប់បានថ្លែងថា ក្រុមហ៊ុន OCIC ​នឹងប្រែក្លាយកោះនរា តាមបណ្តោយទន្លេមេគង្គក្រោម (ខាងកើតទីក្រុងកោះពេជ្រ) ឲ្យក្លាយជាទីក្រុងពាណិជ្ជកម្មដ៏សម្បូរបែបមួយលាតសន្ធឹងលើទំហំផ្ទៃដីសរុបប្រមាណជា ១០០ ហិកតា តាមរយៈការចាក់ដី ថ្ម និងខ្សាច់បន្ថែម៕