ក្រសួងសាធារណការ និងដឹកជញ្ជូន រៀបចំសិក្ខាសាលាស្តីពី “ការធ្វើសមាហរណកម្មថវិកាចរន្ត និងថវិកាវិនិយោគហិរញ្ញប្បទាន ដោយថវិកាថ្នាក់ជាតិ (គម្រោងវិនិយោគផ្ទាល់)” ដល់អង្គភាពពាក់ព័ន្ធ និងអង្គភាពក្រោមឱវាទក្រសួង ដើម្បីបង្កើនប្រសិទ្ធភាពការរៀបចំផែនការយុទ្ធសាស្ត្រថវិកា២០២១-២០២៣ និងផែនការថវិកាឆ្នាំ២០២១ ស្របតាមការកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៣ គឺការផ្សារភ្ជាប់ថវិកាទៅនឹងគោលនយោបាយ ២០១៦ -២០២០ សៀមរាប៖ ថ្ងៃសៅរ៍ ១៣រោច ខែអាសាឍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៨ ខែកក្កដា ឆ្នាំ២០២០ ឯកឧត្ដម សួង ហេង រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយ ស្តីពី "ការធ្វើសមាហរណកម្មថវិកាចរន្ត និងថវិកាវិនិយោគហិរញ្ញប្បទាន ដោយថវិកាថ្នាក់ជាតិ (គម្រោងវិនិយោគផ្ទាល់)" ដល់អង្គភាពពាក់ព័ន្ធ និងអង្គភាពក្រោមឱវាទក្រសួងសាធារណការ និងដឹកជញ្ជូន ដោយមានការចូលរួមពីមន្ត្រីជាន់ខ្ពស់ក្រសួង កងវិស្វកម្ម អង្គភាពជំនាញ និងមន្រ្តីជំនាញនៃមន្ទីរសាធារណការ និងដឹកជញ្ជូនទាំង២៥រាជធានី-ខេត្ត ។ សិក្ខាសាលានេះ ត្រូវបានរៀបចំឡើងដោយក្រសួងសាធារណការ និងដឹកជញ្ជូន សហការជាមួយក្រសួងសេដ្ឋកិច្ច និងហិរញ្ញវត្ថុ ក្នុងគោលបំណងបណ្តុះបណ្តាល និងពង្រឹងសមត្ថភាពបន្ថែមលើការធ្វើសមាហរណកម្មថវិកាចរន្ត (ការជួសជុលថែទាំ) និងថវិកាវិយោគហិរញ្ញប្បទាន (គម្រោងវិយោគផ្ទាល់) ឱ្យបានយល់ស៊ីជម្រៅ និងដើម្បីបង្កើនសមត្ថភាព និងលទ្ធភាពក្នុងការធ្វើឱ្យផែនការយុទ្ធសាស្ត្រថវិកា និងផែនការថវិកាប្រចាំឆ្នាំក្លាយជាឧបករណ៍ដ៏សំខាន់ សំដៅសម្រេចឱ្យបាននូវផែនការ និងគោលនយោបាយរបស់ក្រសួង និងរាជរដ្ឋាភិបាល ប្រកបដោយប្រសិទ្ធភាព គុណភាព និងទាន់ពេលវេលា។ ថ្លែងនៅក្នុងកម្មវិធីបើកសិក្ខាសាលា ឯកឧត្ដមរដ្ឋលេខាធិការ បានមានប្រសាសន៍ថា៖ ដើម្បីលើកកម្ពស់គុណភាព និងប្រសិទ្ធភាពក្នុងការរៀបចំផែនការយុទ្ធសាស្ត្រថវិកាក្នុងក្របខណ្ឌនៃការអនុវត្តកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ និងទិសដៅយុទ្ធសាស្ត្រនៃការកែទម្រង់ប្រព័ន្ធថវិកានៅកម្ពុជា ទាមទារឱ្យមានការចូលរួមពីគ្រប់បណ្ដាភាគីពាក់ព័ន្ធទាំងអស់ ប្រកបដោយទំនួលខុសត្រូវ ភាពច្បាស់លាស់ តម្លាភាព និងគណនេយ្យភាព សំដៅឱ្យការរៀបចំផែនការយុទ្ធសាស្ត្រថវិកា ២០២១-២០២៣ និងផែនការថវិកាប្រចាំឆ្នាំ២០២១នេះ ក្លាយជាវិធានការដ៏សំខាន់មួយសម្រាប់លើកកម្ពស់ប្រសិទ្ធភាពនៃការរៀបចំ និងការបែងចែកនូវធនធានថវិកាប្រកបដោយសមធម៌ និរន្តរភាព និងការអភិវឌ្ឍ ព្រមទាំងសមស្របតាមគោលនយោបាយ និងកម្មវិធីកែទម្រង់ស៊ីជម្រៅរបស់រាជរដ្ឋាភិបាល ក្នុងកិច្ចការងារកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៣ គឺការផ្សារភ្ជាប់ថវិកាទៅនឹងគោលនយោបាយ ២០១៦ -២០២០។ ឯកឧត្តមរដ្ឋលេខាធិកា ក៏បានគូសបញ្ជាក់ផងដែរថា ក្រសួងសាធារណការ និងដឹកជញ្ជូន ក្រោមការដឹកនាំរបស់ឯកឧត្តមទេសរដ្ឋមន្ត្រី ស៊ុន ចាន់ថុល បានដាក់ចេញនូវទិសដៅចំនួនពីរធំៗគឺ ធ្វើផ្លូវឱ្យមានគុណភាពរឹងមាំ ប្រើប្រាស់ជាប់បានយូអង្វែង និងការបណ្តុះបណ្តាលមន្ត្រីរាជការក្រោមឱវាទក្រសួងឲ្យមានសមត្ថភាពគ្រប់គ្រាន់។ ឯកឧត្ដមរដ្ឋលេខាធិការ បានសម្ដែងនូវក្ដីសង្ឃឹមយ៉ាងមុតមាំថា៖ ការសួរដេញដោល ការផ្ដល់មតិយោបល់ និងការផ្លាស់ប្តូរបទពិសោធន៍ទៅវិញទៅមករវាងសិក្ខាកាមនិងគ្រូឧទ្ទេស នឹងផ្ដល់នូវចំណេះដឹង និងបទពិសោធន៍បន្ថែមទៀតក្នុងការបំពេញបន្ថែមនូវចំណុចខ្វះខាតដែលកើតមានឡើង ជាពិសេសនឹងជំរុញឱ្យការរៀបចំផែនការយុទ្ធសាស្រ្តថវិកា ២០២១-២០២៣ និងផែនការថវិកាប្រចាំឆ្នាំ២០២១ បស់ក្រសួងសាធារណការ និងដឹកជញ្ជូន កាន់តែមានប្រសិទ្ធភាពខ្ពស់ថែមទៀត៕