[Rasmei Kampuchea Daily News] - តាមរយៈវីដេអូពីចម្ងាយ ទេសរដ្ឋមន្ត្រី ស៊ុន ចាន់ថុល ប្រាប់រដ្ឋមន្ត្រីដឹកជញ្ជូនអាស៊ាន-ចិន ពីវិធានការប្រយុទ្ធប្រឆាំងមេរោគកូវីដ១៩របស់រដ្ឋាភិបាលកម្ពុជា
ភ្នំពេញ: លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានប្រាប់រដ្ឋមន្ត្រីដឹកជញ្ជូនអាស៊ាន-ចិន ពីវិធានការប្រយុទ្ធប្រឆាំងនិងគ្រប់គ្រងមេរោគកូវីដ១៩ របស់រដ្ឋាភិបាលកម្ពុជានិងស្ថានភាពកម្ពុជាក្នុងពេលកូវីដ១៩រាតត្បាត។លោកទេសរដ្ឋមន្ត្រីបានលើកឡើងពីវិធានការប្រយុទ្ធកូវីដនេះ ក្នុងពេលលោកដឹកនាំគណៈប្រតិភូក្រសួងចូលរួមកិច្ចប្រជុំរដ្ឋមន្ត្រីដឹកជញ្ជូនអាស៊ាន-ចិន តាមរយៈវីដេអូពីចម្ងាយទាក់ទងនឹងវិធានការប្រយុទ្ធប្រឆាំងមេរោគកូវីដ១៩ក្នុងវិស័យដឹកជញ្ជូន (the ASEAN-CHINA Transport Ministers’ meeting on COVID-19)កាលពីទី១៦ ខែកក្កដា ឆ្នាំ២០២០ នៅទីស្ដីការក្រសួង។
កិច្ចប្រជុំនេះដឹកនាំដោយសហប្រធាន លោក Dato Abdul Mutalib Yusof រដ្ឋមន្ត្រីក្រសួងទំនាក់ទំនងព័ត៌មាននិងដឹកជញ្ជូននៃប្រទេសព្រុយណេ និងលោក Li Xiaopeng រដ្ឋមន្ត្រីក្រសួងដឹកជញ្ជូន នៃសាធារណរដ្ឋប្រជាមានិតចិន ដោយផ្តោតជាសំខាន់លើវិធានការប្រយុទ្ធប្រឆាំងនឹងមេរោគកូវីដ១៩ ក្នុងវិស័យដឹកជញ្ជូន។ថ្លែងទៅកាន់អង្គប្រជុំនាឱកាសនោះលោកទេសរដ្ឋមន្ត្រីបានគូសបញ្ជាក់ថា៖កម្ពុជាបានរកឃើញអ្នក ផ្ទុកមេរោគកូវីដ១៩លើកដំបូងនៅថ្ងៃទី២៧ ខែមករា ឆ្នាំ២០២០ជាករណីនាំចូល គិតរហូតមកដល់ពេលនេះកម្ពុជាមានអ្នកឆ្លងមេរោគនេះចំនួន១៦៦ករណី ក្នុងនោះអ្នកជំងឺចំនួន១៣៣នាក់ត្រូវបានជាសះ ស្បើយ៣៣នាក់កំពុងទទួលការព្យាបាល។ ដោយឡែក អ្នកស្លាប់ដោយសារមេរោគនេះមិនទាន់កើតមាន នៅឡើយទេ។
លោកទេសរដ្ឋមន្ត្រីក៏បានលើកឡើងផងដែរអំពីវិធានការបិទច្រកទ្វារឆ្លងកាត់ព្រំដែនជាបណ្ដោះអាសន្នដោយមានការឯកភាពរវាងប្រទេសជិតខាងក្នុងនោះមានការអនុវត្តតាមគោលការណ៍ចំនួនបីចំណុច ទីមួយត្រូវផ្ទេរទំនិញពីរថយន្តដឹកទំនិញរបស់ប្រទេសនាំចេញទៅកាន់រថយន្តដឹកទំនិញរបស់ប្រទេស នាំចូលនៅត្រង់ទីតាំងកំណត់មួយ ទីពីរត្រូវប្ដូររ៉ឺម៉កសណ្ដោងនៅត្រង់ទីតាំងកំណត់នោះ និងទីបី កំណត់ចំនួនរថយន្តចេញចូលច្បាស់លាស់តាមពេលម៉ោងជាក់លាក់ និងការកំណត់ចំនួនមនុស្សច្រើន បំផុតក្នុងមួយរថយន្តចំនួនពីរនាក់ ដើម្បីទប់ស្កាត់ការរីករាលដាលមេរោគនេះ។ជាមួយគ្នានោះដែរ លោកស៊ុន ចាន់ថុល បានបន្តថា៖ មេរោគកូវីដ១៩ បានជះឥទ្ធិពលអវិជ្ជមានដល់វិស័យដឹកជញ្ជូនទាំងផ្លូវគោក ផ្លូវទឹក និងផ្លូវអាកាសនៅទូទាំងពិភពលោករួមទាំងកម្ពុជាផងដែរ និងធ្វើឱ្យវិស័យនេះមានការធ្លាក់ចុះគួរឱ្យកត់សម្គាល់ ពោលគឺនៅក្នុងរយៈពេល៦ខែដើមឆ្នាំ២០២០នេះកម្ពុជាទទួលបានអ្នកដំណើរចំនួន១,៩៥លាននាក់ ធ្លាក់ចុះ៦៨% និងទំនិញចំនួន២៥.០០០ តោន ធ្លាក់ចុះ៣០%ប្រៀបធៀបនឹងរយៈពេលដូចគ្នាក្នុងឆ្នាំ២០១៩
ទេសរដ្ឋមន្ត្រី បានមានប្រសាសន៍ថា៖ ផលិតផលក្នុងស្រុកសរុបរបស់កម្ពុជាត្រូវបានគេប៉ាន់ ប្រមាណថាមានកំណើនអវិជ្ជមាន៥,៥% នៅឆ្នាំនេះធៀបនឹងកំណើនវិជ្ជមានជាមធ្យម៧%ក្នុងរយៈពេល២០ឆ្នាំចុងក្រោយនេះ ហើយវិស័យដែលរងផលប៉ះពាល់ច្រើនជាងគេគឺវិស័យទេសចរណ៍ និងវិស័យកាត់ ដេរ។
ស្របពេលជាមួយគ្នានេះដែរ រាជរដ្ឋាភិបាលកម្ពុជាបានចាត់វិធានការមួយចំនួនដើម្បីជំរុញសេដ្ឋកិច្ច និងគាំទ្រដល់វិស័យឯកជនក្នុងកំឡុងពេលមានជំងឺរាតត្បាតនេះ ក្នុងនោះរួមមានការបង្កើតកម្មវិធីសង្គម ផ្សេងៗជាច្រើនដើម្បីចូលរួមកាត់បន្ថយការលំបាករបស់ប្រជាពលរដ្ឋដែលងាយរងគ្រោះបំផុត ហើយរំពឹងថាអត្រាកំណើនផលិតផលក្នុងស្រុកសរុបនឹងកើនឡើងដល់ប្រហែល៥% នៅឆ្នាំក្រោយ។
ជាងនេះទៀត លោកទេសរដ្ឋមន្ត្រី បានគូសបញ្ជាក់ថា៖ទោះបីជាមានឥទ្ធិពលអវិជ្ជមានពីមេរោគកូវីដ១៩ ទៅលើសេដ្ឋកិច្ចរបស់កម្ពុជាក៏ដោយ ក៏រាជរដ្ឋាភិបាលនៅតែបន្តកសាងហេដ្ឋារចនាសម្ព័ន្ធដើម្បីជួយអភិវឌ្ឍសេដ្ឋកិច្ចសង្គម កាត់បន្ថយថ្លៃដើមនៃការដឹកជញ្ជូននិងភស្តុភារកម្មផងដែរ។
លោកទេសរដ្ឋមន្ត្រីបានថ្លែងអំណរគុណ និងការកោតសរសើរយ៉ាងជ្រាលជ្រៅចំពោះដៃគូអភិវឌ្ឍន៍ និងវិស័យឯកជនដែលបានបន្តសាងសង់ផ្លូវនិងស្ពានជាច្រើនខ្សែ និងផ្លូវល្បឿនលឿនតភ្ជាប់ពីភ្នំពេញទៅ កំពង់ផែសមុទ្រក្រុងព្រះសីហនុផងដែរ៕
