ក្រសួងសាធារណការ និងដឹកជញ្ជូនរៀបចំសិក្ខាសាលាដើម្បីលើកកម្ពស់គុណភាព និងប្រសិទ្ធភាពនៃការរៀបចំផែនការយុទ្ធសាស្ត្រថវិកាក្នុងក្របខណ្ឌនៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុ សាធារណៈ និងទិសដៅយុទ្ធសាស្ត្រនៃការកែទម្រង់ប្រព័ន្ធថវិកានៅកម្ពុជា សៀមរាប៖ ថ្ងៃព្រហស្បតិ៍ ៥កើត ខែអាសាឍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៥ ខែមិថុនា ឆ្នាំ២០២០ ឯកឧត្ដម សួង ហេង រដ្ឋលេខាធិការនៃក្រសួងសាធារណការ និងដឹកជញ្ជូន បានអញ្ជើញជា អធិបតីក្នុងពិធីបើកសិក្ខាសាលាផ្សព្វផ្សាយសារាចរណែនាំ ស្ដីពីការរៀបចំផែនការយុទ្ធសាស្ត្រថវិកាឆ្នាំ ២០២១-២០២៣ និងការរៀបចំផែនការថវិកាសម្រាប់ការគ្រប់គ្រងឆ្នាំ២០២១ ដល់អង្គភាពថវិកាក្រសួង សាធារណការ និងដឹកជញ្ជូន ដោយមានការចូលរួមពីមន្ត្រីជាន់ខ្ពស់ក្រសួងសាធារណការនិងដឹកជញ្ជូន គ្រូឧទ្ទេសមកពីក្រសួងសេដ្ឋកិច្ច និងហិរញ្ញវត្ថុ និងមន្រ្តីជំនាញនៃមន្ទីរសាធារណការ និងដឹកជញ្ជូនទាំង ២៥រាជធានី-ខេត្ត ។ សិក្ខាសាលានេះរៀបចំឡើងដើម្បីផ្សព្វផ្សាយសារាចរណែនាំរបស់រាជរដ្ឋាភិបាលលេខ. ០៣ សរណន ចុះថ្ងៃទី០៩ ខែមិថុនា ឆ្នាំ២០២០ ស្ដីពីការរៀបចំផែនការយុទ្ធសាស្ត្រថវិកាឆ្នាំ២០២១-២០២៣ និង សារាចរណែនាំរបស់រាជរដ្ឋាភិបាលលេខ.០៤ សរណន ចុះថ្ងៃទី០៩ ខែមិថុនា ឆ្នាំ២០២០ ស្ដីពីការរៀបចំ សេចក្ដីព្រាងច្បាប់ ស្ដីពីហិរញ្ញវត្ថុសម្រាប់គ្រប់គ្រងឆ្នាំ២០២១ ដល់អង្គភាពថវិកាក្រសួងសាធារណការ និងដឹកជញ្ជូនឱ្យបានយល់ស៊ីជម្រៅពីសារាចរណែនាទាំងនេះ និងដើម្បីបង្កើនសមត្ថភាព និង លទ្ធភាពក្នុងការធ្វើឱ្យផែនការយុទ្ធសាស្ត្រថវិកា និងផែនការថវិកាក្លាយជាឧបករណ៍ដ៏សំខាន់ សំដៅសម្រេចឱ្យបាននូវផែនការ និងគោលនយោបាយរបស់ក្រសួង និងរាជរដ្ឋាភិបាល។ ឯកឧត្ដមរដ្ឋលេខាធិការបានមានប្រសាសន៍ថា ដើម្បីលើកកម្ពស់គុណភាព និងប្រសិទ្ធភាពក្នុងការរៀបចំ ផែនការយុទ្ធសាស្ត្រថវិកាក្នុងក្របខណ្ឌនៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ និង ទិសដៅយុទ្ធសាស្ត្រនៃការកែទម្រង់ប្រព័ន្ធថវិកានៅកម្ពុជា វាទាមទារឱ្យមានការចូលរួមពីគ្រប់បណ្ដាភាគី ពាក់ព័ន្ធទាំងអស់ប្រកបដោយទំនួលខុសត្រូវ ភាពច្បាស់លាស់ តម្លាភាព និងគណនេយ្យភាព សំដៅឱ្យ ការរៀបចំផែនការយុទ្ធសាស្ត្រថវិកា និងផែនការថវិកានេះ ក្លាយជាវិធានការដ៏សំខាន់មួយសម្រាប់លើក កម្ពស់ប្រសិទ្ធភាពនៃការរៀបចំ និងការបែងចែកនូវធនធានថវិកាប្រកបដោយសមធម៌ និរន្តរភាព និងការ អភិវឌ្ឍ ព្រមទាំងសមស្របតាមកម្មវិធីកែទម្រង់ស៊ីជម្រៅរបស់រាជរដ្ឋាភិបាល។ ថ្លែងក្នុងពិធីបិទសិក្ខាសាលានេះ ឯកឧត្ដម វ៉ាស៊ឹម សុរិយ៉ា បានមានប្រសាសន៍ថា ការរៀបចំផែនការថវិកា ចូលដល់ដំណាក់កាលទី៤ហើយ ជាគោលការណ៍ អង្គភាពថវិកានឹងរំកិលរហូតដល់ថ្នាក់នាយកដ្ឋាន ដូច បាននិងកំពុងអនុវត្តជាក់ស្ដែងនៅក្រសួងអប់រំ យុវជន និងកីឡា និងក្រសួងសុខាភិបាល។ ជាមួយគ្នានោះផងដែរ ឯកឧត្ដមអនុរដ្ឋលេខាធិការបានផ្ដាំផ្ញើឱ្យមានការគ្រោងចំណាយសម្រាប់ឆ្នាំ២០២១ ដូចជាការគ្រោងបើកវគ្គបណ្ដុះបណ្ដាល ការជ្រើសរើសមន្ត្រីក្របខណ្ឌថ្មី កិច្ចប្រជុំថ្នាក់ឧត្ដមមន្ត្រី និង រដ្ឋមន្ត្រីដឹកជញ្ជូន ជាពិសេស នាយកដ្ឋាន និងអង្គភាពដែលទើបបង្កើតថ្មីៗ។ រាល់គម្រោងចំណាយទាំង អស់ត្រូវមានសំណើគម្រោងជាលក្ខណៈវិទ្យាសាស្ត្រច្បាស់លាស់។ ឯកឧត្ដមអនុរដ្ឋលេខាធិការ បានសម្ដែងនូវក្ដីសង្ឃឹមយ៉ាងមុតមាំថា៖ ការសួរដេញដោល ការផ្ដល់មតិ យោបល់ និងការផ្លាស់ប្តូរបទពិសោធន៍ទៅវិញទៅមករវាងសិក្ខាកាមនិងគ្រូឧទ្ទេស នឹងផ្ដល់នូវចំណេះដឹង និងបទពិសោធន៍បន្ថែមទៀតក្នុងការបំពេញបន្ថែមនូវចំណុចខ្វះខាតដែលកើតមានឡើង ជាពិសេសនឹង ជំរុញឱ្យការរៀបចំយុទ្ធសាស្រ្តថវិកា និងផែនការថវិការបស់ក្រសួងសាធារណការ និងដឹកជញ្ជូនកាន់តែ មានប្រសិទ្ធភាពខ្ពស់ថែមទៀត៕