ថ្ងៃសុក្រ ៦កើត ខែផល្គុន ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៨ ខែកុម្ភៈ ឆ្នាំ២០២០ នៅទីស្ដីការក្រសួង ឯកឧត្ដម តូច ចាន់កុសល រដ្ឋលេខាធិការប្រចាំការក្រសួងសាធារណការ និងដឹកជញ្ជូនតំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញជាអធិបតីក្នុងពិធីបើកវគ្គបណ្ដុះបណ្ដាលស្ដីពីការគ្រប់គ្រងវត្តមាន និងប្រើប្រាស់ម៉ាស៊ីនស្កែនម្រាមដៃ ដោយមានការចូលរួមពីថ្នាក់ដឹកនាំ និងមន្ត្រីរាជការក្រោមឱវាទក្រសួង។ វគ្គបណ្ដុះបណ្ដាលនេះធ្វើឡើង ដើម្បីបំពាក់បំប៉ននូវចំណេះដឹងផ្នែកបច្ចេកវិទ្យា នៃការប្រើប្រាស់ម៉ាស៊ីនស្កែនម្រាមដៃដល់មន្ត្រីទទួលបន្ទុកការងារគ្រប់គ្រងវត្តមានមន្ត្រីរាជការ និងមន្ត្រីជាប់កិច្ចសន្យាតាមអង្គភាពនីមួយៗក្រោមឱវាទទីស្ដីការក្រសួង សំដៅឱ្យពួកគាត់មានសមត្ថភាពគ្រប់គ្រាន់ក្នុងការប្រើប្រាស់ និងធ្វើរបាយការណ៍វត្តមានប្រចាំខែនៅក្នុងអង្គភាពរបស់ខ្លួនបានយ៉ាងស្ទាត់ជំនាញ។ ថ្លែងក្នុងសុន្ទរកថាបើកនាពេលនោះ ឯកឧត្ដមរដ្ឋលេខាធិការប្រចាំការ បានមានប្រសាសន៍ថា៖ ព័ត៌មានវិទ្យាដើរតួយ៉ាងសំខាន់ និងមិនអាចខ្វះបានក្នុងការជួយសម្រួល និងពន្លឿនកិច្ចប្រតិបត្តិការងារប្រចាំថ្ងៃ។ លើសពីនេះទៀត ព័ត៌មានវិទ្យាបង្ហាញនូវសុក្រិតភាព និងតម្លាភាពខ្ពស់ តួយ៉ាងម៉ាស៊ីនស្កែនម្រាមដៃនេះនឹងកត់ត្រាយ៉ាងច្បាស់លាស់នូវពេលវេលាចូល-ចេញពីការងារ និងចំនួនម៉ោង ដែលមន្ត្រីម្នាក់ៗបាន បម្រើការតាមថ្ងៃនីមួយៗ។ លើសពីនេះទៀត ការស្កែនម្រាមដៃចេញ-ចូល និងចំនួនម៉ោងបម្រើការងារប្រចាំថ្ងៃ គឺជាលក្ខខណ្ឌមួយក្នុងចំណោមលក្ខខណ្ឌនានា ដែលអាចប្រើប្រាស់ក្នុងការវាយតម្លៃជ្រើសរើសមន្ត្រីឆ្នើមប្រចាំខែបានយ៉ាងមានសុក្រិតភាព និងតម្លាភាព។ ឯកឧត្ដមរដ្ឋលេខាធិការប្រចាំការបានថ្លែងនូវការកោតសរសើរដល់ថ្នាក់ដឹកនាំនៃនាយកដ្ឋានបុគ្គលិក និងនាយកដ្ឋានព័ត៌មានវិទ្យា និងទំនាក់ទំនងសាធារណៈ ដែលបានសហការគ្នាយ៉ាងជិតស្និទ្ធក្នុងការរៀបចំនីតិវិធីគ្រប់គ្រងវត្តមានមន្ត្រីរាជការតាមរយៈការប្រើប្រាស់ប្រព័ន្ធបច្ចេកវិទ្យាព័ត៌មានវិទ្យានេះ ព្រមទាំងផ្ដាំផ្ញើរឱ្យថ្នាក់ដឹកនាំ និងមន្ត្រីរាជការទាំងអស់ចូលរួម និងអនុវត្តដោយស្មារតីទទួលខុសត្រូវ និងមានប្រសិទ្ធភាពខ្ពស់បំផុត៕