ថ្ងៃអង្គារ ១១កើត ខែមាឃ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៤ ខែកុម្ភៈ ឆ្នាំ២០២០ នៅទីស្ដីការក្រសួង ឯកឧត្តម ប៉េង ពោធិ៍នា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងកិច្ចប្រជុំពិភាក្សាលើការចុះប្រមូលព័ត៌មាន ដើម្បីរៀបចំផែនការសវនកម្ម និងធ្វើសវនកម្មលើរបាយការណ៍ហិរញ្ញវត្ថុរបស់ក្រសួងសាធារណការ និងដឹកជញ្ជូន សម្រាប់ការិយបរិច្ឆេទ ២០១៩ ដោយមានការចូលរួមពីថ្នាក់ដឹកនាំ និងអង្គភាពពាក់ព័ន្ធក្រោមចំណុះទីស្ដីការក្រសួងទាំងមូល។ កិច្ចប្រជុំនេះធ្វើឡើងដើម្បីពិភាក្សាលើការរៀបចំផែនការសវនកម្ម និងកម្មវិធីចុះធ្វើសវនកម្មរបស់គណៈប្រតិភូសវនកម្មជាតិ នៅក្រសួងសាធារណការ និងដឹកជញ្ជូន សំដៅឱ្យប្រព័ន្ធគ្រប់គ្រងក្រសួងទាំងមូលប្រព្រឹត្តទៅតាមនិយាមនិងបទដ្ឋានគតិយុត្តជាតិ ក៏ដូចជាដើម្បីធានាឱ្យបាននូវប្រសិទ្ធភាពការងារខ្ពស់តាមគោលនយោបាយ និងចក្ខុវិស័យរបស់រាជរដ្ឋាភិបាលដែលបានកំណត់។ ឯកឧត្ដមរដ្ឋលេខាធិការ បានសម្ដែងនូវការស្វាគមន៍ និងសហការខ្ពស់ជាមួយគណៈប្រតិភូ ដោយបានចាត់មន្ត្រីពាក់ព័ន្ធដើម្បីសម្របសម្រួល សំដៅឱ្យការធ្វើសវនកម្មនេះប្រព្រឹត្តទៅមានតម្លាភាព និងប្រសិទ្ធភាព ព្រមទាំងឆ្លើយតបទៅនឹងវត្ថុបំណង និងកម្មវិធីដែលបានកំណត់។ ឯកឧត្ដម ឡុង អាទិច្ចបូរា ប្រធានគណៈប្រតិភូបានសម្ដែងការកោតសរសើរ និងវាយតម្លៃខ្ពស់លើការគ្រប់គ្រងហិរញ្ញវត្ថុ នាឆ្នាំកន្លងមក ព្រមទាំងបានស្នើសុំការសហការឱ្យបានគ្រប់ជ្រុងជ្រោយបន្ថែមទៀតដើម្បីឱ្យការធ្វើសវនកម្មនេះប្រព្រឹត្តទៅទទួលបានលទ្ធផលតាមការគ្រោងទុក។ ឯកឧត្តមរដ្ឋលេខាធិការបានថ្លែងអំណរគុណយ៉ាងជ្រាលជ្រៅ ដល់គណៈប្រតិភូសវនកម្មជាតិ ដែលបានចំណាយពេលវេលាដ៏មមាញឹក ដើម្បីមកធ្វើសវនកម្មនៅក្រសួង ដើម្បីជួយបំពេញចំណុចខ្វះខាតមួយចំនួនខណៈពេលបំពេញភារកិច្ច និងផ្ដល់អនុសាសន៍ល្អៗ ដែលជាឈ្នាន់ក្នុងការអភិវឌ្ឍខ្លួនឱ្យកាន់តែល្អប្រពៃថែមទៀត៕