[Tnaot News] - ក្រសួងសាធារណការគ្រោងរៀបចំឲ្យមានការយកប្រាក់ពីបណ្តារសណ្ឋាគារ និងផ្ទះពលរដ្ឋ នៅក្រុងព្រះសីហនុ ដើម្បីដោះស្រាយបញ្ហាប្រព័ន្ធលូទឹក
2019-08-23
Go to the website published Tnaot News
ក្នុងឱកាសបើកសិក្ខាសាលាស្តីពីលទ្ធផល នៃការរៀបចំផែនការមេ និងពិនិត្យលទ្ធភាពគម្រោងអភិវឌ្ឍន៍ប្រព័ន្ធទឹកកង្វក់នៅទីក្រុងព្រះសីហនុ ដែលធ្វើឡើងនៅសណ្ឋាគារសុខាភ្នំពេញកាលពីព្រឹកមិញ លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូនបានឲ្យដឹងថា ក្រសួងគ្រោងនឹងរៀបចំឲ្យមានការបង់ប្រាក់ពីសណ្ឋាគារ និងផ្ទះប្រជាពលរដ្ឋ ក្រោយដាក់ឲ្យដំណើរការនូវប្រព័ន្ធលូរ និងប្រព័ន្ធចម្រោះទឹកកង្វក់នៅក្នុងក្រុងព្រះសីហនុ។
លោក ស៊ុន ចាន់ថុល បានលើកឡើងថា ដើម្បីដោះស្រាយបញ្ហាទឹកកង្វក់នៅក្រុងព្រះសីហនុដែលកំពុងមានការអភិវឌ្ឍន៍ យើងនឹងរៀបចំអាងចម្រោះទឹកកង្វក់នៅលើផ្ទៃដីប្រមាណ១៨ហិកតា ដោយអាចចម្រោះទឹកកង្វក់បានប្រមាណ៨ម៉ឺនម៉ែត្រគូបនៅក្នុងមួយថ្ងៃ។ ជាមួយគ្នានេះ យើងក៏ត្រូវការលូមេដើម្បីរំដោះទឹកកង្វក់ប្រវែង១៥៧គីឡូម៉ែត្រ ព្រមទាំងលូរងប្រវែងប្រមាណ២០០គីឡូម៉ែត្រថែមទៀត។
ដូច្នេះដើម្បីឲ្យគម្រោង នៃប្រព័ន្ធរំដោះទឹកកង្វក់មាននិរន្តរភាពបាន ក្រសួងកំពុងសិក្សាក្នុងការយកប្រាក់ពីសណ្ឋាគារធំៗ ក៏ដូចជាផ្ទះប្រជាពលរដ្ឋនៅក្នុងក្រុងព្រះសីហនុ ក្រោមការវិនិយោគរបស់ក្រុមហ៊ុនចិនមួយ។
តែយ៉ាងណាក៏ដោយ សម្រាប់គម្រោងនេះ លោកបានស្នើឲ្យមន្រ្តីបច្ចេកទេស ក្រុមហ៊ុន ក៏ដូចជាភាគីពាក់ព័ន្ធ រួមគ្នាធ្វើការពិភាក្សាឲ្យបានល្អិតល្អន់អំពីគម្រោងនេះ៕
