ភ្នំពេញៈ រដ្ឋបាលរាជធានីភ្នំពេញ បានបន្តឲ្យកម្លាំងចុះធ្វើការផ្លាស់ប្ដូរប្រព័ន្ធលូ នៅតាមមហាវិថីតូចធំនៅក្នុងមូលដ្ឋានរាជធានីភ្នំពេញ ដើម្បីបង្ហូទឹកបានលឿនជាងមុន ព្រោះពេលភ្លៀងម្ដងៗ តែងតែលិចរហូតមកធ្វើអោយបងប្អូន ប្រជាពលរដ្ឋ ពិបាកធ្វើដំណើរ និងដើម្បីសោភ័ណភាពនៅក្នុងទីក្រុងភ្នំពេញផងដែរ ។ ជាក់ស្ដែង នៅតំបន់ខាងជើងរមណីយដ្ឋានវត្តភ្នំ រាជធានីភ្នំពេញ ផ្លូវលេខ ៤៧ រដ្ឋបាលរាជធានីភ្នំពេញ បន្តគម្រោងការពារទឹកជំនន់ និងកែលម្អប្រព័ន្ធប្រឡាយលូ ក្នុងរាជរាធានីភ្នំពេញ ជំហានទី៤ ដាក់បណ្តាញលូមេ ដើម្បីដោះស្រាយទឹកលិច ដូច្នេះតំបន់នោះមានការប្រឈមនឹងការធ្វើដំណើរចរាចរណ៍ចង្អៀត ព្រោះស្ថានភាពផ្លូវមួយចំហៀងជាការដ្ឋាន សូមគ្រប់អ្នកបញ្ជាយានយន្តយោគយល់ អធ្យា​ស្រ័យគ្នា និងចូលរួមគោរព នគរបាលចរាចរណ៍ឈរជើងនៅទីតាំងនេះ បញ្ជៀសចរាចរណ៍។ បន្ថែមពីលើនោះផងដែររដ្ឋបាលរាជធានីភ្នំពេញ ក៏ដូចជាគណៈបញ្ជាការឯកភាពខណ្ឌទាំង ១៤ខណ្ឌនៅក្នុងរាជធានីភ្នំពេញក៏បានសំណូមពរដល់បងប្អូនប្រជាពលរដ្ឋដែលមានទីលំនៅនៅជាប់ដងផ្លូវជាពិសេសនៅចំណុចដែលមានការដ្ឋានផ្លាស់ប្ដូរប្រព័ន្ធលូនៅចំពីមុខផ្ទះរបស់បងប្អូនសូមបងប្អូនមេត្តាជួយយោគយល់នៅការកក់ស្ទះ និងជួយរៀបចំទុកដាក់សំរាមឱ្យមានរបៀបរៀបរយនិងពិនិត្យមើលគំរបលូនៅមុខផ្ទះរាល់ពេលដែលមានមេឃភ្លៀងធ្លាក់ខ្លាំងនិងសូមជួយសំអាតដើម្បីកុំអោយមានសំរាមហូរចូលដល់មាត់លូនោះអាចបង្កឲ្យមានការកកស្ទះ៕