ថ្ងៃព្រហស្បតិ៍ ៦កើត ខែពិសាខ ឆ្នាំកុរ ឯកស័ក ព.ស.២៥៦២ ត្រូវនឹងថ្ងៃទី០៩ ខែឧសភា ឆ្នាំ២០១៩ នៅទីស្ដីការក្រសួងសាធារណការ និងដឹកជញ្ជូន ឯកឧត្ដមទេសរដ្ឋមន្ត្រី ស៊ុន ចាន់ថុល បានអញ្ជើញជាអធិបតីក្នុងពិធីប្រកាសសុពលភាពថ្នាក់ដឹកនាំក្រសួងទើបត្រូវបានតែងតាំងថ្មី និងការបែងចែកភារកិច្ច ថ្នាក់ដឹកនាំក្រសួងទើបតែងតាំងថ្មី ដោយមានការចូលរួមពីមន្ត្រីរាជការក្រោមឱវាទក្រសួង។ ឆ្លៀតក្នុងឱកាសនោះដែរ ឯកឧត្ដមទេសរដ្ឋមន្ត្រី បានគូសបញ្ជាក់អំពីគម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់នៅកម្ពុជា និងការសាងសង់ស្ថានីយបូមទឹកដែលមានសមត្ថភាពចម្រោះទឹកកខ្វក់ឱ្យបានទាន់ពេលវេលា និងបានស្នើឱ្យគ្រប់មន្ទីររាជធានី-ខេត្តទាំងអស់ សហការគ្នាធ្វើផែនការមេក្នុងការអភិវឌ្ឍប្រព័ន្ធប្រព្រឹត្តកម្មទឹកកខ្វក់ សំដៅធ្វើឱ្យប្រសើរឡើងនូវស្ថានភាពសុខុមាលភាព និងអនាម័យប្រជាពលរដ្ឋ។ ឯកឧត្តមទេសរដ្ឋមន្ត្រី បានសម្តែងនូវការអបអរសាទរ និងបានជំរុញលើកទឹកចិត្តដល់ថ្នាក់ដឹកនាំក្រសួង ទើបត្រូវបានតែងតាំងថ្មីទាំងអស់ ឱ្យខិតខំប្រឹងប្រែងបំពេញការងារឱ្យបានទ្វេដង និងប្រកបដោយភាពទទួលខុសត្រូវខ្ពស់ តាមមុខតំណែងរបស់ខ្លួនដើម្បីជាផលប្រយោជន៍ដល់ក្រសួង និងប្រទេសជាតិទាំងមូល។ ជាមួយគ្នានេះផងដែរ ឯកឧត្ដមទេសរដ្ឋមន្ត្រី បានជម្រាបជូនអង្គប្រជុំអំពីដំណើរទស្សនកិច្ចរបស់គណៈប្រតិភូ ក្រុមហ៊ុនសាជីវកម្មសាងសង់ផ្លូវដែកចិន (CRCC) មកកាន់កម្ពុជា ដើម្បីធ្វើការសិក្សាលើការអភិវឌ្ឍផ្លូវដែក ដែលមានស្រាប់របស់កម្ពុជា (ភាគខាងត្បូង និងភាគខាងជើង) ការសិក្សាផ្លូវរថភ្លើងដឹកអ្នកដំណើរធុនស្រាល (Monorail) និងការសិក្សាផ្លូវរថភ្លើងក្រោមដី (Subway) នៅរាជធានីភ្នំពេញ ហើយរាយការណ៍ជូនរាជរដ្ឋាភិបាល ដើម្បីជ្រើសរើសយកប្រព័ន្ធដឹកជញ្ជូនណាមួយដែលមានប្រសិទ្ធភាពអាចកាត់បន្ថយការកកស្ទះចរាចរណ៍ នៅក្នុងរាជធានីភ្នំពេញ។ ឯកឧត្ដមទេសរដ្ឋមន្ត្រី ក៏បានលើកឡើងផងដែរទាក់ទងនឹងគម្រោងសាងសង់កំពង់ផែ គម្រោងសាងសង់ ផ្លូវលេខ ៧១C គម្រោងសាងសង់ផ្លូវលេខ១០ គម្រោងសម្ពោធដាក់ឱ្យប្រើប្រាស់ផ្លូវលេខ៥៥ គម្រោងកំពុង ដំណើរការសាងសង់ផ្លូវល្បឿនលឿនភ្នំពេញ-ក្រុងព្រះសីហនុ ដើម្បីបញ្ចប់ឱ្យបានរួចរាល់នៅខែកញ្ញា ឆ្នាំ២០២២ មុនកិច្ចប្រជុំកំពូលអាស៊ាន ដែលគ្រោងនឹងប្រព្រឹត្តទៅនៅក្រុងព្រះសីហនុ ៕