ភ្នំពេញ ថ្ងៃទី២២ ខែមេសា ឆ្នាំ២០១៩ — បន្ទាប់ពី ពិធីតភ្ជាប់មុខតំណស្ពានមិត្តភាពកម្ពុជា-ថៃ (ស្ទឹងបត់-បានណងអៀន) និងបើកការ​ដ្ឋានសាងសង់ អគារច្រកទ្វារព្រំដែនអន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ៥រួចមក​ប្រមុខរាជរដ្ឋាភិបាលនៃប្រទេសទាំងពីរបានអញ្ជើញធ្វើជាសាក្សីក្នុងពិធីចុះហត្ថលេខាលើកិច្ចព្រមព្រៀងប្រតិបត្តិការរួមគ្នាលើការដឹកជញ្ជូនតាមផ្លូវដែក ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ​ព្រះរាជា​ណាចក្រកម្ពុជា និង ឯកឧត្ដម ប្រាយុទ្ធ ចាន់អូចា នាយករដ្ឋមន្ត្រី នៃព្រះរាជាណាចក្រថៃ ដោយ​មានការចូលរួម ពីគណៈប្រតិភូ នៃប្រទេសទាំងពីរ ដែលជាការបើកទំព័រ ប្រវត្តិសាស្ត្រថ្មីមួយ​ទៀត សម្រាប់ កម្ពុជា-ថៃ ក្នុងការតភ្ជាប់ផ្លូវដែកសារជាថ្មី ក្រោយពីបានកាត់ផ្តាច់ដោយសារ​សង្គ្រាម។ក្នុងពិធីចុះហត្ថលេខាលើកិច្ចព្រមព្រៀងប្រតិបត្តិការរួមគ្នាលើការដឹកជញ្ជូនតាមផ្លូវដែកឆ្លងកាត់ព្រំដែនកម្ពុជា-ថៃ និងពិធីប្រគល់-ទទួល ក្បាលរថភ្លើង (DMU) ដែលជាអំណោយ​របស់រាជរដ្ឋាភិបាល នៃព្រះរាជាណាចក្រថៃ ជូនរាជរដ្ឋាភិបាលនៃព្រះរាជាណាចក្រកម្ពុជា កាលពីព្រឹកថ្ងៃទី២២ ខែមេសា ឆ្នាំ២០១៩ ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្រ្ដី​ក្រសួងសាធារណការ និងដឹកជញ្ជូនបានមានប្រសាសន៍ថា កិច្ចព្រមព្រៀងប្រតិបត្តិការរួម គ្នាលើការដឹកជញ្ជូនឆ្លងកាត់ព្រំដែនតាមផ្លូវដែក និងការតភ្ជាប់ផ្លូវដែកកម្ពុជា និងថៃ ពិតជា នាំមកនូវកាលានុវត្តភាពថ្មី សម្រាប់វិស័យដឹកជញ្ជូនតាមផ្លូវដែក ដែលជាមធ្យោបាយដឹក ជញ្ជូនទំនិញដ៏ស័ក្តិសិទ្ធិ មានតម្លៃថោក និងមានសុវត្ថិភាពខ្ពស់ រួមចំណែកក្នុងការ​អភិវឌ្ឍ​ខឿនសេដ្ឋកិច្ចជាតិរបស់ប្រទេសទាំងពីរ និងរួមចំណែកក្នុងការតភ្ជាប់ និងអភិវឌ្ឍន៍តំបន់​អាស៊ាន និងមហាអនុតំបន់មេគង្គផងដែរ។ ជាមួយគ្នានេះដែរ ឯកឧត្តមទេសរដ្ឋមន្រ្ដីបាន​បន្ដថា រាជរដ្ឋាភិបាលនៃព្រះរាជាណាចក្រថៃ ក៏បានផ្ដល់អំណោយក្បាលរថភ្លើង (DMU) ចំនួន០១គ្រឿង មានទូដឹកអ្នកដំណើរចំនួន៤ ដែលអាចផ្ទុកអ្នកដំណើរបានរហូតដល់ ៣២០​នាក់ ជូនព្រះរាជាណាចក្រកម្ពុជា៕