កំពង់ធំ៖លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានក្រើនរំឭកមន្ត្រីទាំងអស់ ខិតខំប្រឹងប្រែងបម្រើប្រជារាស្ត្រ និងប្រកាន់ខ្ជាប់ អភិក្រមទាំង៥ និងអនុសាសន៍ របស់រាជរដ្ឋាភិបាល។ អភិក្រមទាំង៥ មាន ៖ ឆ្លុះកញ្ចក់ មុជទឹក ដុសក្អែល ព្យាបាល និងវះកាត់។ ក្នុងពិធីសំណេះសំណាលជាមួយមន្ត្រីរាជការ បុគ្គលិក និងកម្មករ នៃមន្ទីរសាធារណការ ខេត្តកំពង់ធំ កាលពីថ្ងៃទី១៣ ខែមីនា ឆ្នាំ២០១៩ លោក ស៊ុន ចាន់ថុល បានប្រសាសន៍ថា “មន្ត្រីទាំងអស់ ខិតខំប្រឹងប្រែងធ្វើការបម្រើប្រជារាស្ត្រឲ្យបានទ្វេដង ព្រមទាំងបានផ្ដាំផ្ញើឲ្យមន្ត្រីគ្រប់រូបប្រកាន់ខ្ជាប់ អភិក្រមទាំង៥ និងអនុសាសន៍ របស់សម្ដេចតេជោ ហ៊ុន សែន”។ រដ្ឋមន្ដ្រីសាធារណការ ក៏បានលើកឡើងពីគម្រោងកំពុងអនុវត្ត និងគម្រោងដែលនឹងត្រូវអនុវត្ត លើហេដ្ឋារចនាសម្ព័ន្ធដឹកជញ្ជូនសំខាន់ៗមួយចំនួន ដើម្បីលើកកម្ពស់គុណភាព និងពង្រីកផ្លូវពី២គន្លង ទៅ៤គន្លង និងគម្រោងសាងសង់ផ្លូវល្បឿនលឿនពីភ្នំពេញ ទៅខេត្តព្រះសីហនុ និងគម្រោងសាងសង់ស្ពានមួយចំនួន។ លោកថា ហេដ្ឋារចនាសម្ព័ន្ធដឹកជញ្ជូនដើរតួនាទីយ៉ាងសំខាន់ក្នុងការលើកកម្ពស់ជីវភាពរស់នៅរបស់ប្រជាពលរដ្ឋ ក៏ដូចជាសេដ្ឋកិច្ចជាតិទាំងមូលផងដែរ។ រដ្ឋមន្ដ្រីបន្ដថា ផែនការ១០០ថ្ងៃរួមមាន៖ ការដាក់ដំណើរការសាលាបង្រៀនបើកបររថយន្តធុនធ្ងន់ យុទ្ធនាការជិះកង់ពិនិត្យមើលផ្លូវខូច និងកម្មវិធីថែទាំផ្លូវ (ROAD CARE Mobile App) ជាដើម ត្រូវខិតខំបន្ថែមទៀត។ ជាមួយគ្នានេះដែរ លោក សុ៑ន ចាន់ថុល ថ្លែងអំណរគុណ និងកោតសរសើរយ៉ាងជ្រាលជ្រៅ ដល់ថ្នាក់ដឹកនាំមន្ទីរ និងមន្ត្រីទាំងអស់ ដែលបានខិតខំប្រឹងប្រែង អស់ពីកម្លាំងកាយចិត្ត ក្នុងបុព្វហេតុបម្រើជាតិមាតុភូមិ និងបានផ្ដាំផ្ញើមន្ត្រីទាំងអស់រួបរួមសាមគ្គីសហការគ្នាថែមទៀត ៕