ភ្នំពេញ ៖ លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួង សាធារណការ និងដឹកជញ្ជូន បានបើកកិច្ចប្រជុំ ពិភាក្សា ដើម្បីត្រៀមលក្ខណៈរៀបចំ កិច្ចប្រជុំលើកទី៧ នៃគណៈកម្មាធិការរួមការងារ ឆ្លងកាត់ព្រំដែន ក្របខណ្ឌមហា អនុតំបន់មេគង្គ នាទីស្ដីការក្រសួង កាលថ្ងៃទី៦ ខែមីនា ឆ្នាំ២០១៩ ។ កិច្ចប្រជុំនេះ មានគោលបំណងពិនិត្យវឌ្ឍនភាព នៃការត្រៀមរៀបចំរបស់គណៈកម្មការ និងអនុគណៈកម្មការនីមួយៗ ព្រមទាំងពិភាក្សា និងបំពេញបន្ថែមលើចំណុចខ្វះខាត មួយចំនួន សំដៅឲ្យការរៀបចំកិច្ចប្រជុំនេះ ប្រព្រឹត្តដោយភាពរលូន និងទទួលបានលទ្ធផលជាផែ្លផ្កាខ្ពស់។ រដ្ឋមន្ដ្រីសាធារណការ ក៏បានផ្ដាំផ្ញើមន្ត្រីទទួលបន្ទុកតាមគណៈកម្មការ និងអនុគណៈកម្មការទាំងអស់ យកចិត្តទុកដាក់បំពេញការងាររបស់ខ្លួន ប្រកបដោយទំនួលខុសត្រូវខ្ពស់ និងប្រកាន់យកឥរិយាបទថ្លៃថ្នូរ ក្នុងនាមតំណាងឲ្យកម្ពុជាទាំងមូល។ សូមរំលឹកថា កិច្ចប្រជុំលើកទី៧ នៃគណៈកម្មាធិការរួមការងារឆ្លងកាត់ដែន ក្របខណ្ឌមហាអនុតំបន់មេគង្គ នឹងប្រព្រឹត្តទៅនៅលើទឹកដីខេត្តសៀមរាប ចាប់ពីថ្ងៃទី១២-១៣ មីនា មានការចូលរួមពីតំណាងមកពីប្រទេសកម្ពុជា , ថៃ , មីយ៉ាន់ម៉ា , វៀតណាម និងឡាវ ព្រមទាំងធនាគារអភិវឌ្ឍន៍អាស៊ី (ADB) អង្គការ GIZ និងអង្គការ DEFAT ៕