(ភ្នំពេញ)៖ ការដាក់តាំងបង្ហាញប្រព័ន្ធបច្ចេកវិទ្យារបស់ក្រសួងសាធារណការ និងដឹកជញ្ជូន ធ្វើឡើងរយៈពេល ៣ថ្ងៃ ពីថ្ងៃទី២២ ដល់ថ្ងៃទី២៤ ខែកុម្ភៈ នៅមជ្ឈមណ្ឌលសហប្រតិបត្តិការកម្ពុជា-ជប៉ុនហៅកាត់ CJCC នៅក្នុងកម្មវិធីមហោស្រពគីហ្សូណា ជប៉ុន-កម្ពុជា ឆ្នាំ២០១៩។ ថ្លែងប្រាប់ក្រុមអ្នកសារព័តមានពេលអញ្ជើញចូលរួមកម្មវិធីនៅព្រឹកថ្ងៃទី២២ ខែកុម្ភៈនេះ លោកជំទាវ មឹន មាណវី រដ្ឋលេខាធិការ និងជាអគ្គលេខាធិការ គណៈកម្មាធិការជាតិសុវត្ថិភាពចរាចរណ៍ផ្លូវគោក បានលើក​ថា ក្រសួងសាធារណការបាននិងកំពុងលើកកម្ពស់សុវត្ថិភាពចរាចរណ៍ផ្លូវគោកនៅកម្ពុជា តាមរយៈការបង្កើតប្រព័ន្ធផ្សេងៗ ដែលបង្កលក្ខណៈងាយស្រួលដល់ប្រជាពលរដ្ឋ។ លោកជំទាវបញ្ជាក់ថា ខណៈដែលបច្ចុប្បន្ន ដែលមានអ្នកស្លាប់ប្រមាណ ៤ ទៅ ៥នាក់ ក្នុងមួយថ្ងៃដោយសារគ្រោះថ្នាក់ចរាចរណ៍ ដូច្នេះ ការចូលរួមពីសាធារណជនលើសុវត្ថិភាពចរាចរណ៍ ពិតជាមានសារៈសំខាន់ ព្រោះថាអ្នកគ្រប់គ្នាសុទ្ធតែប្រើប្រាស់ផ្លូវថ្នល់។ គួរបញ្ជាក់ថា នៅក្នុងកម្មវិធីដាក់តាំងបង្ហាញប្រព័ន្ធបច្ចេកវិទ្យារយៈពេល ៣ថ្ងៃនេះ ក្រសួងសាធារណការ បានផ្សព្វផ្សាយសុវត្ថិភាពចរាចរណ៍ផ្លូវគោក និងចែកមួកសុវត្ថិភាពដល់សាធារណជន និងសិស្ស និស្សិត ដោយធ្វើការឆ្លើយសំណួរផ្សេងៗពាក់ព័ន្ធនឹងសុវត្ថិភាពចរាចរណ៍ និងច្បាប់ចរាចរណ៍ផ្លូវគោកនៅកម្ពុជា។ ក្រៅពីនេះ ក្រសួងក៏មានការដាក់តាំងបង្ហាញពីប្រព័ន្ធស្វ័យប្រវត្តិកម្មចុះបញ្ជីយានជំនិះ ត្រួតពិនិត្យលក្ខណៈបច្ចេកទេសយានជំនិះ ប្រឡងយកបណ្ណបើកបរ កម្មវិធីយល់ដឹងអំពីទ្រឹស្តីនៃការបើកបរ, កម្មវិធីព័ត៌មានសាធារណការ និងដឹកជញ្ជូន និងកម្មវិធី​ថែទាំផ្លូវ (ROAD CARE mobile app) ក្នុងគោលដៅផ្សព្វផ្សាយអំពីសមិទ្ធផល និងសេវាសាធារណៈរបស់ក្រសួងផងដែរ៕