ភ្នំពេញ៖ បន្ទាប់ពីឃើញហានិភ័យនៃគ្រោះថ្នាក់ចរាចរណ៍លើដងវិថី និងបំផ្លាញផ្លូវមកពីការដឹកលើសទម្ងន់ របស់រថយន្តតទ្រុងខុសលក្ខណៈបច្ចេកទេសជារៀងរាល់ថ្ងៃ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានប្តេជ្ញាចិត្តយ៉ាងមុតមាំថា នៅឆ្នាំ២០១៩នេះ នឹងចុះត្រួតពិនិត្យកន្លែងកែច្នៃរយថន្ដខុសបច្ចេកទេស ដើម្បីឈានទៅដល់បិទកន្លែងទាំងនោះឲ្យអស់។ របាយការណ៍របស់អគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោក បានឲ្យដឹងថា ត្រីមាសទី៣ ឆ្នាំ២០១៨ កន្លងមកក្រុមការងារត្រួតពិនិត្យយានយន្ត កែច្នៃខុសលក្ខណៈបច្ចេកទេសថ្នាក់ជាតិ និងថ្នាក់ខេត្ត បានត្រួតពិនិត្យយានយន្តទូទាំងប្រទេសចំនួន ៥៥.៧៣៧គ្រឿង ក្នុងនោះ បានកាត់ទ្រុងចំនួន១៦៦គ្រឿង , ដោះរានតក្រោយរថយន្តចំនួន១៨១គ្រឿង និងរថយន្តគ្មានស្លាកលេខចំនួន១២៩គ្រឿង។ ក្នុងពិធីបើកសន្និបាទបូកសរុបការងាររបស់ក្រសួងសាធារណការឆ្នាំ២០១៨ និងលើកទិសដៅការងារឆ្នាំ២០១៩ នៅថ្ងៃទី៩ ខែមករា ឆ្នាំ២០១៩ លោក ស៊ុន ចាន់ថុល មានប្រសាសន៍ថា “យើងមានកន្លែងកែច្នៃឡានរាប់រាយកន្លែង អត់មានច្បាប់ទំលាប់ទេ ដូច្នេះខ្ញុំនឹងឲ្យមន្ទីរសាធារណការខេត្ត-ក្រុង២៥នេះ ត្រួតពិនិត្យហើយបិទកន្លែងកែច្នៃយានយន្ដដែលគ្មានច្បាប់ ទំលាប់ត្រឹមត្រូវ ហើយត្រូវតែបិទហើយ” ។ លោកបន្ដថា ដើម្បីកាត់បន្ថយគ្រោះចរាចរណ៍ ក្រសួងនឹងបន្ដសហការជាមួយកំពង់ផែស្វយ័តព្រះសីហនុ និងកំពង់ផែស្វយ័តភ្នំពេញដើម្បីឲ្យពួកគាត់ចុះជួយត្រួតពិនិត្យរថយន្ដដឹកទំនិញ មិនមានលក្ខណៈត្រឹមត្រូវ ដើម្បីកុំឲ្យពួកគាត់ចូលកំពង់ផែ ឬកុំដាក់ទំនិញនៅលើរថយន្ដទាំងនោះ ក្នុងការបញ្ចៀសគ្រោះថ្នាក់ផ្សេងៗ។ ឆ្លៀតឱកាសនោះដែរ រដ្ឋមន្ត្រីក្រសួងសាធារណការ ក៏បានលើកឡើងថា ក្នុង១ឆ្នាំៗ រាជរដ្ឋាភិបាលចំណាយថវិការាប់រាយលានដុល្លារ ដើម្បីជួសជុលកែលម្អប្រព័ន្ធហេដ្ឋា រចនាសម្ព័ន្ធនៅកម្ពុជា ដូច្នេះលោកក៏បានអំពាវទៅដល់អ្នកដឹកទំនិញលើសទម្ងន់ទាំងអស់ត្រូវបញ្ឈប់ជាបន្ទាន់។ សូមរំលឹកថា សម្តេចតេជោ ហ៊ុន សែន នាយករដ្ឋមន្ដ្រីកម្ពុជា បានដាក់ចេញបទបញ្ជាឲ្យចាត់វិធានការដ៏តឹងរឹងបំផុតចំពោះរថយន្តតទ្រុងខុសលក្ខណៈបច្ចេកទេសពោលគឺគ្រប់ រថយន្តតទ្រុងមិនអាចធ្វើចរាចរលើដងវិថីបានឡើយ បើមានធ្វើចរាចរកន្លែងណា ត្រូវចាប់កាត់កន្លែងនោះ។ សម្តេចបញ្ជាក់ថា ប្រតិបត្តិការកាត់រថយន្តតទ្រុងខុសបច្ចេកទេសនេះ មិនមានការដកថយនោះឡើយ ហើយទឹកដីណា គឺថ្នាក់ដឹកនាំនៃខេត្តនោះ ជាអ្នកចាត់ការមិនចាំបាច់ក្រសួងសាធារណការទេ។ សម្ដេចតេជោ ក៏ឲ្យភាគីពាក់ព័ន្ធចុះពិនិត្យមើលយានដ្ឋានទាំងឡាយណាដែលនៅបន្តកែច្នៃរថយន្ត ឬតទ្រុងរថយន្តខុសច្បាប់នេះផងដែរ បើមិនគោរពតាមច្បាប់ទេ គឺបិទចោលតែម្តងទៅ៕