ផ្លូវទៅតំបន់អេកូទេសចរណ៍ជីផាតក្នុងស្រុកថ្មបាំង ខេត្តកោះកុង បានវិវឌ្ឍន៍ពីផ្លូវដីក្រួសក្រហមទៅជាផ្លូវក្រាលកៅស៊ូ ដែលសម្រួលបានការធ្វើដំណើររបស់ភ្ញៀវទេសចរទៅកម្សាន្ត លែងពិបាកដូចមុនបានគ្រប់រដូវមិនថារដូវប្រាំងឬរដូវវស្សា។ ផ្តល់បទសម្ភាសន៍តាមទូរសព្ទដល់កម្ពុជាថ្មីនៅព្រឹកនេះ លោក អៀង ដារ៉ាវុធ ប្រធានមន្ទីរអភិវឌ្ឍន៍ជនបទខេត្តកោះកុងបានបង្ហាញពីវឌ្ឍនភាពនៃការស្ថាបនាផ្លូវទៅកាន់តំបន់អេកូទេសចរណ៍ជីផាត ដែលលោកបានបញ្ជាក់ថាគឺជិតរួចរាល់ជាស្ថាពរហើយ ពោលគឺសម្រេចបានជាង ៩០% ដោយនៅសល់ការងារបន្តិចបន្តួចប៉ុណ្ណោះ។ លោកថា តាមរយៈសមិទ្ធផលផ្លូវនេះ ប្រជាពលរដ្ឋក្នុងមូលដ្ឋានមានការអបអរសាទរ និងគាំទ្រយ៉ាងខ្លាំង ខណៈដែលផ្លូវទៅតំបន់អេកូទេសចរណ៍ជីផាតគឺជាខ្សែផ្លូវទេសចរណ៍ដ៏សំខាន់មួយ ដែលទាក់ទាញភ្ញៀវទេសចរចាប់អារម្មណ៍ទៅកម្សាន្តយ៉ាងច្រើន។ ពាក់ព័ន្ធផ្លូវទៅជីផាតដើម្បីធានាឱ្យផ្លូវថ្មីនេះអាចប្រើប្រាស់បានយូរអង្វែង គឺទាមទារយ៉ាងចាំបាច់នូវការចូលរួមសហការថែរក្សាពីសំណាក់ប្រជាពលរដ្ឋ និងអាជ្ញាធរពាក់ព័ន្ធ។ លោក អៀង ដារ៉ាវុធ បានបញ្ជាក់ថា ហានិភ័យចម្បងនិងធំបំផុតដែលធ្វើឱ្យផ្លូវឆាប់ខូច គឺការដឹកជញ្ជូនលើសទម្ងន់ ពីរថយន្តធុនធ្ងន់ប្រកបអាជីវកម្មនានាដូចជា រថយន្តដឹកដី ដឹកខ្សាច់ និងដឹកថ្ម។ លោកសំណូមពរដល់ម្ចាស់អាជីវកម្មទាំងអស់ឱ្យដឹកជញ្ជូនត្រឹមទម្ងន់ដែលបានកំណត់ ព្រោះប្រសិនបើគ្មានការសហការទេ ផ្លូវអាចនឹងរងការខូចខាតទាំងស្រុងក្នុងរយៈពេលត្រឹមតែមួយទៅពីរឆ្នាំប៉ុណ្ណោះ។ ស្របពេលដែលផ្លូវទៅតំបន់ទេសចរណ៍ជីផាតសាងសង់ស្ទើររួចរាល់ ១០០% ពលរដ្ឋក៏ស្នើឱ្យសាងសង់ស្ពានឆ្លងកាត់ដៃព្រែកជីផាតបន្ថែម ខណៈអាជ្ញាធរបញ្ជាក់ថាកំពុងធ្វើការដោះស្រាយតាមដំណាក់កាល។ លោក អៀង ដារ៉ាវុធ បានឆ្លើយតបថា «បច្ចុប្បន្នគឺមិនទាន់អាចសន្យា ១០០% នឹងសាងសង់ភ្លាមៗបានទេ ប៉ុន្តែអាជ្ញាធរកំពុងខិតខំប្រឹងប្រែងស្វែងរកអង្គការជាដៃគូ និងកញ្ចប់ថវិកា ដើម្បីយកមកកសាងជូនប្រជាពលរដ្ឋនាពេលខាងមុខ»៕