ថ្នាក់ដឹកនាំកំពូលនៃប្រទេសកម្ពុជា ឡាវ និងវៀតណាម បានឯកភាពគ្នាយ៉ាងមោះមុតក្នុងការរុញច្រានគម្រោងតភ្ជាប់ហេដ្ឋារចនាសម្ព័ន្ធរូបវន្ត និងថាមពល។ កិច្ចពិភាក្សានេះធ្វើឡើងក្នុងជំនួបអាហារពេលព្រឹកជាប្រពៃណី អមជាមួយកិច្ចប្រជុំកំពូលអាស៊ានលើកទី៤៨ នាព្រឹកថ្ងៃទី៨ ខែឧសភា ឆ្នាំ២០២៦ នៅកោះសេប៊ូ ហ្វីលីពីន។សម្តេច ហ៊ុន ម៉ាណែត នាយករដ្ឋមន្ត្រីកម្ពុជា រួមជាមួយនាយករដ្ឋមន្ត្រីឡាវ និងវៀតណាម បានកំណត់យក «ការតភ្ជាប់» ជាសរសៃឈាមយុទ្ធសាស្ត្រ។ ថ្នាក់ដឹកនាំទាំងបីចាត់ទុកការបន្តពង្រឹងទំនាក់ទំនងក្នុងបរិការណ៍ពិភពលោកដ៏ស្មុគស្មាញនេះ ថាមានសារៈសំខាន់មិនអាចខ្វះបាន។ ពាក់ព័ន្ធនឹងការតភ្ជាប់ផ្លូវគោក សម្ដេច ហ៊ុន ម៉ាណែត បានជំរុញឱ្យអាជ្ញាធរកម្ពុជា និងវៀតណាម ពន្លឿនការកំណត់ទីតាំងតភ្ជាប់រវាងផ្លូវល្បឿនលឿនភ្នំពេញ-បាវិត និងផ្លូវល្បឿនលឿនហូជីមិញ-ម៉ុកបៃ។ ការសម្រេចបាននូវការតភ្ជាប់នេះ នឹងក្លាយជាច្រករបៀងសេដ្ឋកិច្ចដ៏សំខាន់សម្រាប់លំហូរទំនិញ និងទេសចរណ៍រវាងប្រទេសទាំងពីរ។ ជាមួយប្រទេសឡាវ សម្ដេច បានស្នើឱ្យអាជ្ញាធរពាក់ព័ន្ធពន្លឿនការជ្រើសរើសទីតាំងជាក់លាក់ ដើម្បីសាងសង់ស្ពានឆ្លងកាត់ទន្លេរពៅ និងទន្លេសេឡាំផាវ។ ស្ពាននេះនឹងជួយបង្កលក្ខណៈងាយស្រួលដល់ការធ្វើដំណើរឆ្លងកាត់ព្រំដែន និងការផ្លាស់ប្តូរទំនិញរវាងប្រជាជននៃប្រទេសទាំងពីរឱ្យកាន់តែប្រសើរឡើង។ ក្រៅពីផ្លូវថ្នល់ វិស័យថាមពលក៏ជាចំណុចស្នូលនៃកិច្ចសហប្រតិបត្តិការនេះដែរ។ សម្ដេចធិបតីបានដាក់ចេញនូវគំនិតផ្ដួចផ្ដើមក្នុងការអភិវឌ្ឍគម្រោងតភ្ជាប់បណ្ដាញអគ្គិសនីរវាងប្រទេសទាំងបី។ គម្រោងនេះនឹងផ្ដោតលើការប្រើប្រាស់បណ្ដាញបញ្ជូនអគ្គិសនីដែលមានស្រាប់ ដើម្បីធានាបាននូវស្ថិរភាពថាមពលក្នុងតំបន់។ ថ្នាក់ដឹកនាំបានឯកភាពលើការជំរុញវិស័យទេសចរណ៍ និងការវិនិយោគបន្ថែមទៀត។ ក្នុងនោះរួមមានការរៀបចំកញ្ចប់ផលិតផលទេសចរណ៍រួមគ្នា និងការបង្កើនជើងហោះហើរត្រង់ទៅវិញទៅមក។ ជាមួយគ្នានេះ សម្ដេចធិបតីក៏បានអញ្ជើញថ្នាក់ដឹកនាំឡាវ និងវៀតណាម ចូលរួមកិច្ចប្រជុំកំពូលហ្វ្រង់កូហ្វូនី ដែលកម្ពុជានឹងធ្វើជាម្ចាស់ផ្ទះក្នុងខែវិច្ឆិកាខាងមុខ៕