ជំនួបសម្តែងការគួរសម និងពិភាក្សាការងារជាមួយប្រតិភូរបស់សមាគមសុវត្ថិភាព និងសុខភាពឧស្សាហកម្មម៉ាឡេស៊ី ទីស្តីការក្រសួង៖ នាថ្ងៃ សុក្រ ទី២៦ ខែធ្នូ ឆ្នាំ២០២៥ លោកជំទាវ មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោក បានដឹកនាំមន្រ្តីនៃនាយកដ្ឋានសុវត្ថិភាពចរាចរណ៏ជួបជាមួយប្រតិភូរបស់សមាគមសុវត្ថិភាព និងសុខភាពឧស្សាហកម្មម៉ាឡេស៊ី (Malaysia Industrial Safety and Health Association) ហៅកាត់ថា MiSHA ដឹកនាំដោយ លោក Abd Mutalib Abd Gapar អនុប្រធានសមាគម និងដោយមានការចូលរួមពី ឯកឧត្តម គង់ សុវណ្ណ ទីប្រឹក្សាគណៈកម្មាធិការជាតិសុវត្ថិភាពចរាចរណ៍ផ្លូវគោក ប្រធាននាយកដ្ឋានសុវត្ថិភាពចរាចរណ៍ផ្លូវគោក លោក លោកស្រីអនុប្រធាននាយកដ្ឋាន លោកស្រីប្រធានការិយាល័យនៃនាយកដ្ឋានសុវត្ថិភាពចរាចរណ៍ផ្លូវគោក តំណាងអង្គការខេមសេហ្វ និងមន្ត្រីពាក់ព័ន្ធផងដែរ។ គោលបំណងនៃជំនួបនេះ គឺដើម្បីស្វែងយល់ពីការអនុវត្តការងារ ដោយមានការធ្វើបទបង្ហាញអំពីការងារផ្សេងៗដែលសមាគម MiSHA បានធ្វើការជាមួយភាគីពាក់ព័ន្ធ នឹងផ្នែកសុខភាពនិងសុវត្ថិភាពសាធារណៈ និងការលើកកម្ពស់ការយល់ដឹងតាមរយៈការចុះអប់រំដោយផ្ទាល់នៅទីសាធារណៈ សាលារៀន និងតាមស្ថានីយ៍ទូរទស្សន៍ជាដើម។ បន្ថែមពីនេះ ក៏បានផ្តល់ព័ត៌មានអំពីការដែល MISHA សម្រេចផ្តល់ពានរង្វាន់ប្រចាំឆ្នាំ ២០២៥ ដល់អង្គការ CamSafe ដែល ដែលមានស្នាដៃក្នុងការជួយការងារផ្នែកសុវត្ថិភាពទូទៅនៅក្នុងប្រទេសកម្ពុជា ហើយ CamSafe របស់កម្ពុជា ក៏នឹងក្លាយជាសមាជិកនៃក្រុមការងារវាយតម្លៃរបស់ MISHA នៅឆ្នាំបន្តបន្ទាប់ទៀត។ លោកជំទាវរដ្ឋលេខាធិការ បានសម្តែងនូវក្តីសោមនស្សរីករាយ ដែលបានទទួលជួបពិភាក្សា ស្វែងយល់អំពីការចែករំលែកព័ត៌មានសំខាន់ៗ មុខងារនិងតួនាទីរបស់សមាគម MiSHA ក្នុងវិស័យសុខភាព និងសុវត្ថិភាពសាធារណៈ ព្រមទាំងឯកភាពពិនិត្យលទ្ធភាពគាំទ្រ ការផ្តួចផ្តើមកិច្ចសហប្រតិបត្តិការរួមគ្នានាពេលអនាគត៕