ស្មារតីរួបរួមគ្នា «ខ្មែរជួយខ្មែរ ខ្មែរតែមួយ»! តាមការអំពាវនាវរបស់ក្រសួងសាធារណការ និងដឹកជញ្ជូន ក្រុមហ៊ុន វឌ្ឍនៈ គ្រុប បាននាំមកនូវអំណោយ ដើម្បីយកទៅគាំទ្រដល់វីរកងទ័ពឈរជើងនៅសមរភូមិមុខ ការពារបូរណភាពទឹកដី និងជួយបងប្អូនប្រជាពលរដ្ឋភៀសសឹក ដោយសារសង្គ្រាមឈ្លានពានដ៏ឃោឃៅរបស់យោធាថៃ ទីស្តីការក្រសួង៖ នារសៀលថ្ងៃព្រហស្បតិ៍ ទី១៨ ខែធ្នូ ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីប្រគល់-ទទួលអំណោយសប្បុរសធម៌ពី អ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ គ្រុប ដោយបានឧបត្ថម្ភ ថវិកាចំនួន ១០ ០០០ដុល្លារ អង្ករ ១ ០០០ប៉ាវ (១ប៉ាវស្មើ១០គីឡូ) ទឹកបរិសុទ្ធ V-Active ១ ០០០កេស ភេសជ្ជះ V-Cola ១ ០០០កេស ដើម្បីចូលរួមជាមួយក្រសួងសាធារណការនិងដឹកជញ្ជូន នាំយកទៅប្រគល់ជូនដល់វីរកងទ័ពដ៏អង់អាចក្លាហាន និងបងប្អូនប្រជាពលរដ្ឋភៀសសឹក ដោយសារសង្គ្រាមឈ្លានពានដ៏ឃោឃៅគ្មានមនុស្សធម៌ពីសំណាក់យោធាថៃ។ នេះជាទឹកចិត្តដ៏ធំធេងដែលបានបង្ហាញនូវការគោរពស្រឡាញ់ ផ្តល់កម្លាំងចិត្តដល់វីរភាពកងទ័ពការពារជាតិរបស់យើង និងជាការគាំទ្រដល់វីរកងទ័ពជួរមុខកម្ពុជាដ៏អង់អាចក្លាហាន ក្នុងន័យបង្ហាញពីខឿនការពារជាតិ និងចលនាគាំទ្រក្នុងស្មារតីខ្មែរតែមួយ ជាពិសេសការគិតគូរដល់បងប្អូនប្រជាពលរដ្ឋភៀសសឹក ដែលបាននិងកំពុងជម្លៀសចេញពីផ្ទះសម្បែងមកទីកន្លែងសុវត្ថិភាព៕