ផ្លូវទៅតំបន់អេកូទេសចរណ៍ស្ទឹងអារ៉ែងកំពុងស្ថាបនាជាផ្លូវកៅស៊ូ និងបេតុង ដែលក្នុងពេលដ៏ខ្លីខាងមុខនេះនឹងប្រែក្លាយតំបន់អេកូទេសចរណ៍តំបន់ព្រៃភ្នំនេះជាគោលដៅទេសចរដ៏ទាក់ទាញក្នុងខេត្តកោះកុង ក្រោយពេលផ្លូវស្ថាបនារួចរាល់ផ្តល់ភាពងាយស្រួលសម្រាប់ទេសចរធ្វើដំណើរទៅមក។លោក អៀង ដារ៉ាវុធ ប្រធានមន្ទីរអភិវឌ្ឍន៍ជនបទខេត្តកោះកុងបានប្រាប់កម្ពុជាថ្មីថា គម្រោងស្ថាបនាផ្លូវទៅតំបន់ស្ទឹងអារ៉ែងចែកចេញជា ៣ កំណាត់ ចាប់ចេញពីផ្លូវជាតិលេខ ៤៨ ដែលមានប្រវែងសរុបប្រមាណ ៥២ គីឡូម៉ែត្រ។លោកថា វឌ្ឍនភាពនៃការស្ថាបនាសម្រាប់កំណាត់ចេញពីផ្លូវជាតិលេខ ៤៨ ត្រង់ផ្លូវបំបែកគីឡូម៉ែត្រលេខ ១១៥ ដល់ទីរួមស្រុកថ្មបាំងដែលមានប្រវែង ២៦ គីឡូម៉ែត្រ សម្រេចបានប្រហែល ៩០% ខណៈកំណាត់ពីស្រុកថ្មបាំងដល់ស្ទឹងអារ៉ែងប្រវែង ១៦ គីឡូម៉ែត្រ ទើបបើកការដ្ឋានសាងសង់គ្រោងចំណាយពេលប្រហែល ១ ឆ្នាំ។ កន្លងទៅផ្លូវប្រវែងជាង ១០ គីឡូម៉ែត្រក្នុងស្រុកថ្មបាំង ដែលជាគម្រោងរបស់រដ្ឋាភិបាល តាមរយៈក្រសួងអភិវឌ្ឍន៍ជនបទបានសាងសង់បញ្ចប់រួចរាល់។ នេះបើតាមលោក អៀង ដារ៉ាវុធ ប្រធានមន្ទីរអភិវឌ្ឍន៍ជនបទខេត្តកោះកុង។លោក អៀង ដារ៉ាវុធ បានបញ្ជាក់ថា ផ្លូវដែលសាងសង់នេះជាផ្លូវយុទ្ធសាស្ត្រដ៏សំខាន់ សម្រាប់តភ្ជាប់ទៅតំបន់ទេសចរណ៍ក្នុងស្រុកថ្មបាំង។ ផ្លូវនេះនឹងជួយអភិវឌ្ឍន៍ដល់ស្រុកថ្មបាំង ធ្វើឲ្យជីវភាពប្រជាជនរីកចម្រើនតាមរយៈវិស័យទេសចរណ៍ ខណៈស្រុកថ្មបាំងរាប់សិបឆ្នាំមកហើយមិនមានផ្លូវធ្វើដំណើរបានងាយស្រួលនោះទេ។ បើតាមមន្រ្តីរូបនេះ តាមគម្រោងផ្លូវដែលកំពុងស្ថាបនានេះថ្ងៃខាងមុខក៏អាចតភ្ជាប់ផ្លូវមួយខ្សែ ដែលគ្រោងសាងសង់ចេញតំបន់ទេសចរណ៍ខ្នងផ្សារក្នុងខេត្តកំពង់ស្ពឺ ដែលនឹងអាចតភ្ជាប់សម្រួលការធ្វើដំណើរទៅបណ្ដាខេត្តផ្សេងៗនៅភាគកណ្តាល៕