វគ្គបណ្តុះបណ្តាល ស្តីពី "ការរៀបចំផែនការលទ្ធកម្ម" ជូនដល់ក្រុមការងារលទ្ធកម្មនៅតាមអង្គភាពថវិកា ក្រោមឱវាទក្រសួងសាធារណការ និងដឹកជញ្ជូន ដែលមានអ្នកចូលរួមប្រមាណ ១៤០ នាក់ កំពត៖ ថ្ងៃទី១៨-១៩ ខែវិច្ឆិកា ឆ្នាំ២០២៥ ឯកឧត្តម វ៉ាស៊ឹម សុរិយា អនុរដ្ឋលេខាធិការ តំណាងលោកជំទាវ កុយ សុដានី រដ្ឋលេខាធិការប្រចាំការ និងជាប្រធានក្រុមការងារកែទម្រង់ការគ្រប់គ្រងហិរញវត្ថុសាធារណៈក្រសួងសាធារណការ និងដឹកជញ្ជូន អញ្ជើញជាអធិបតី ក្នុងវគ្គបណ្តុះបណ្តាល ស្តីពី «ការរៀបចំផែនការលទ្ធកម្ម» ជូនក្រុមលទ្ធកម្មនៅតាមអង្គភាពថវិកា ក្រោមឱវាទក្រសួងសាធារណការ និងដឹកជញ្ជូន។ កម្មវិធីនេះរៀបចំដោយក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈរបស់ក្រសួងសាធារណការ និងដឹកជញ្ជូន ដែលមានការអញ្ជើញចូលរួមពីថ្នាក់ដឹកនាំក្រសួង មន្ត្រីជំនាញទទួលបន្ទុកលទ្ធកម្ម ដែលមានសិក្ខាកាមមកពីអង្គភាពថវិកាក្រោមឱវាទក្រសួងប្រមាណ ១៤០នាក់។ វគ្គបណ្តុះបណ្តាលនេះត្រូវបានរៀបចំឡើង ក្នុងគោលបំណងដើម្បីផ្តល់ជាមូលដ្ឋានសំខាន់ៗលើការរៀបចំផែនការលទ្ធកម្មប្រចាំឆ្នាំ ព្រមទាំងផ្តល់ជាពុទ្ធិក្នុងការជួយជ្រោមជ្រែងដល់មន្រ្តីទទួលបន្ទុកកិច្ចការលទ្ធកម្មនៅតាមអង្គភាពថវិកាផងដែរ សរុបចំនួន ៣៨អង្គភាព ក្នុងនោះ នៅថ្នាក់កណ្តាល ចំនួន ១៣អង្គភាព និងនៅ ថ្នាក់មូលដ្ឋានចំនួន ២៥អង្គភាព គឺមន្ទីរសាធារណការ និងដឹកជញ្ជូនទាំង ២៥ រាជធានី-ខេត្ត។ ការរៀបចំវគ្គបណ្តុះបណ្តាលនេះក៏ជាផ្នែកមួយនៃការអនុវត្តសកម្មភាពនៅក្នុងការងារកែទម្រង់ការគ្រប់គ្រងហិរញ្ញវត្ថុសាធារណៈរបស់ក្រសួង ហើយកន្លងមក វគ្គបណ្តុះបណ្តាលបែបនេះត្រូវបានរៀបចំជាបន្តបន្ទាប់ដូចភ្លៀងរលឹម ក្នុងទិសដៅ ពង្រឹងប្រសិទ្ធភាព អនុវត្តការងាររបស់អង្គភាពថវិការបស់រដ្ឋបាលកណ្តាលរបស់ក្រសួង ដែលនឹងក្លាយទៅជាអង្គភាពថវិកាអាណាប័កផ្ទេរសិទ្ធិពេញលេញ នឹងមានសមត្ថភាពអនុវត្តតួនាទី ភារកិច្ច សិទ្ធិអំណាច និងការទទួលខុសត្រូវរបស់ខ្លួនឱ្យបានច្បាស់លាស់តាមបទបញ្ញតិជាធរមាន៕