តស់! ទៅបោះតង់នៅទឹកធ្លាក់ លែងអង លែងឃិន ទឹកធ្លាក់ លែងអង លែងឃិន គឺជារមណីយដ្ឋានដែលមានទឹកជ្រោះហូរធ្លាក់កម្ពស់ខ្ពស់ជាងគេនៅក្នុងភូមិសាស្ត្រស្រុកអូររាំង ខេត្តមណ្ឌលគិរី។ ភាគច្រើនគេហៅថា ទឹកធ្លាក់ លែងអង លែងឃិនដោយសារតែទីនេះ មានទឹកធ្លាក់ចំនួនពីរ លែងអងគឺនៅខាងលើ ចំណែកទឹកធ្លាក់លែងឃិន គឺនៅខាងក្រោម។ ពាក្យលែងអង លែងឃិនមានន័យថា ទឹកធ្លាក់អូន ទឹកធ្លាក់បង ដែលប្រែចេញពីភាសាដើមរបស់បងប្អូនជនជាតិភាគតិចយើងបានហៅតគ្នា។ ចំពោះទឹកធ្លាក់តំបន់នេះយើងអាចដើរលំហែបែបលក្ខណៈល្បាតតាមព្រៃភ្នំ គយគន់សម្រស់ធម្មជាតិពណ៌បៃតង ជាមួយខ្យល់អាកាសល្អបរិសុទ្ធ បោះតង់ មើលថ្ងៃរះថ្ងៃលិច និងទស្សនាសត្វដំរី។ ទឹកធ្លាក់លែងឃិន គឺមានលក្ខណៈទឹកហូរជាល្បាក់ជម្រាល ផ្នែកខាងក្រោមមានអាងស្ដុកទឹកយ៉ាងធំដែលអាចអោយអាចយើងហែលងូតលេងបាន ជាមួយដើមឈើធំៗជាម្លប់យ៉ាងត្រជាក់ ទឹកធ្លាក់ នៃតំបន់មួយនេះ ក្រៅពីសម្រស់ធម្មជាតិដ៏ស្រស់ស្អាតយើងក៏អាចសាកល្បងភ្លក់នូវរសជាតិម្ហូបតាមតំបន់របស់ជនជាតិភាគតិច ដ៏មានឱជារសឈ្ងុយឆ្ងាញ់ថែមទៀតផង ដូចជាសម្លព្រងបំពង់ឫស្សីស្រស់ ស្រាបិទក្នុងឪទិនជាដើម។ សូមជម្រាបថា ទឹកធ្លាក់ លែងអង លែងឃិន គឺមានទីតាំងស្ថិតនៅភូមិពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី ដែលមានចម្ងាយ ២៦គីឡូម៉ែត្រពីក្រុងសែនមនោរម្យ និងចម្ងាយប្រមាណ ៤គីឡូម៉ែត្រ ពីផ្លូជាតិលេខ៧៦ ដោយធ្វើដំណើរតាមច្រកចូលផ្លូវលំក្រហម នៅផ្នែកខាងឆ្វេងដៃរ៕ ប្រភពពី៖ PuSmey ពូស្មី