ចុះធ្វើការត្រួតពិនិត្យគុណភាពផ្លូវជាតិលេខ៣៣ ក្រោយពីបានដាក់ឱ្យប្រើប្រាស់រយៈពេលជិត ១ឆ្នាំ ដើម្បីធានាការប្រើប្រាស់បានយូរអង្វែង និងស្របតាមបទដ្ឋានបច្ចេកទេស កំពត៖ នាថ្ងៃពុធ ទី២១ ខែតុលា ឆ្នាំ២០២៥ ឯកឧត្តម ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញដឹកនាំក្រុមការងារចុះពិនិត្យបច្ចេកទេស លើគម្រោងលើកកម្រិតគុណភាពផ្លូវជាតិលេខ៣៣ ដោយមានការចូលរួមពីក្រុមការងារបច្ចេកទេសរបស់ក្រុមហ៊ុនសាជីវកម្មស្ពាន និងថ្នល់ចិន (CRBC) និងតំណាងក្រុមហ៊ុនទីប្រឹក្សាបច្ចេកទេសក្វាងចូវ វ៉ាងអាន ផងដែរ។ បេសកកម្មនាឱកាសនេះធ្វើឡើងក្នុងគោលបំណងដើម្បីពិនិត្យស្ថានភាព នឹងគុណភាពផ្លូវក្រោយពីបញ្ចប់ការសាងសង់រយៈពេលជិត ១ឆ្នាំកន្លងមកនេះ ហើយជាលទ្ធផលក្រុមការងារពិនិត្យឃើញថាស្ថានភាពគុណភាពល្អប្រសើរ។ ឯកឧត្តមរដ្ឋលេខាធិការ បានធ្វើការណែនាំដល់ក្រុមហ៊ុនសាងសង់ ត្រូវបន្តយកចិត្តទុកដាក់ឱ្យបានខ្ពស់បំផុត និងតម្រូវឱ្យក្រុមហ៊ុនសាងសង់ត្រូវធ្វើការកែលម្អឡើងវិញនៅចំនុចខូចខាតមួយចំនួនដែលកើតចេញសកម្មភាពមនុស្ស ក្រោយពីដាក់ឱ្យប្រើប្រាស់មកនេះ មុនបញ្ចប់សុពលភាពផងដែរ និងបានសំណូមពរដល់អ្នកប្រើប្រាស់ផ្លូវថ្នល់នេះទាំងអស់ មេត្តាចូលរួមថែរក្សាផ្លូវថ្នល់របស់យើង ដោយកុំរំលោភដីយកចំណីថ្នល់ និងគោរពច្បាប់ចរាចរណ៍ឱ្យបានខ្ជាប់ខ្ជួនផងដែរ។ គួររម្លឹកផងដែរថា៖ គម្រោងពង្រីក និងលើកកម្រិតគុណភាពផ្លូវជាតិលេខ៣៣ ត្រូវបានប្រកាសបើកការដ្ឋានជាផ្លូវការ កាលពីថ្ងៃទី៣០ ខែធ្នូ ឆ្នាំ២០២២ និងបានសម្ភោធដាក់អោយប្រើប្រាស់រួមគ្នា ជាមួយនឹងផ្លូវជាតិលេខ ៣១ ៤១ ក្រោមអធិបតីភាព សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នាថ្ងៃទី ២៩ ខែមេសា ឆ្នាំ ២០២៥ ។ គម្រោងនេះមានប្រវែងប្រមាណ ៥២,៥៧ គីឡូម៉ែត្រ តភ្ជាប់ពីខេត្តកំពត (បំបែកពីផ្លូវជាតិលេខ៣ ត្រង់ចំណុចគ.ម១៤៨+១០០) ទៅកាន់ច្រកលក (ព្រំដែនកម្ពុជា-វៀតណាម) ឆ្លងកាត់ភូមិសាស្រ្តស្រុកទឹកឈូ និងស្រុកកំពង់ត្រាច នៃខេត្តកំពត ហើយឆ្លងកាត់ភូមិសាស្រ្ត ក្រុងកែប និងស្រុកដំណាក់ចង្អើរ នៃខេត្តកែប៕