ផ្លូវជនបទប្រវែង ៤០ គីឡូម៉ែត្រ នៅក្នុងស្រុកចំនួន ២ នៃខេត្តកំពង់ឆ្នាំង ត្រូវ​បានប្រកាស​បើកការដ្ឋានសាងសង់​លើកកម្រិតគុណភាពពីផ្លូវក្រាលល្បាយដីទៅជាផ្លូវក្រាលកៅស៊ូពីរជាន់និងក្រាលបេតុង។ ផ្លូវលំ​ជនបទ​ដែលត្រូវ​បើកការដ្ឋានសាងសង់​លើកកម្រិត​ទៅ​ជា​ផ្លូវ​ក្រាលកៅស៊ូពីរជាន់ (DBST) និងក្រាលបេតុងមាន​ចំនួន ៦ ខ្សែ ស្ថិតនៅក្នុងស្រុកទឹកផុស និងស្រុកកំពង់ត្រឡាច ខេត្តកំពង់ឆ្នាំង។ថ្លែងនៅ​ក្នុង​ពិធីបើកការដ្ឋាន​សាងសង់​ផ្លូវទាំង ៦​ ខ្សែ នៅភូមិស្រែអ៊ុក ឃុំតាំងក្រសាំង ស្រុកទឹកផុស លោក ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ​បានលើកឡើង​អំពីគោលនយោបាយអភិវឌ្ឍន៍ជនបទ ដែលមានចក្ខុវិស័យ “កសាងសង្គមជនបទកម្ពុជាឱ្យមានវិបុលភាពប្រកបដោយបរិយាបន្ន និងចីរភាពទាំងផ្នែកសេដ្ឋកិច្ច សង្គមកិច្ច និងវប្បធម៌”។ លោករដ្ឋមន្រ្តីបាន​គូស​បញ្ជាក់ថា​ ក្រសួងកំពុងយកចិត្តទុកដាក់លើការលើកកម្រិតគុណភាពការអភិវឌ្ឍ​ហេដ្ឋារចនាសម្ព័ន្ធ និងគមនាគមន៍ជនបទដូចពាក្យស្លោក “មានផ្លូវគឺមានក្តីសង្ឃឹម” ដើម្បីចូលរួម​លើកកម្ពស់ជីវភាពពលរដ្ឋនៅតាមជនបទ​ ក្នុង​ការ​នាំកម្ពុជា​ឈានខ្ពស់​ជាប្រទេសមានចំណូលខ្ពស់នៅឆ្នាំ២០៥០ ។ក្រសួងអភិវឌ្ឍន៍ជនបទ កំពុង​អនុវត្ត​គម្រោងគាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករ និងពាណិជ្ជូនីយកម្មកសិកម្ម (SAAMBAT) ដែលជាម្រោងកិច្ចសហប្រតិបត្តិការរវាងរាជរដ្ឋាភិបាលកម្ពុជាជាមួយដៃគូអភិវឌ្ឍន៍ មានដូចជាៈ (IFAD), (EIB) និង(EU-AIF)។ លោក អ៊ុក ពញ្ញា រដ្ឋលេខាធិការ និងជានាយកគម្រោងបាន​គូស​បញ្ជាក់ថា​ ក្រោមកិច្ចសហការរវាងរាជរដ្ឋាភិបាលកម្ពុជាជាមួយដៃគូអភិវឌ្ឍន៍ ក្រសួងអភិវឌ្ឍន៍ជនបទបានកំពុងអនុវត្ត​គម្រោង​ស្ថាបនាផ្លូវក្រាលកៅស៊ូពីរជាន់ និងបេតុងសរុបចំនួន ៦៦ ខ្សែ ប្រវែងសរុប ៥៣៧ គ.ម, ការ​កែលម្អផ្សារ​សហគមន៍​ចំនួន ៦ ផ្សារ ការ​សាងសង់កំពង់ដសហគមន៍ចំនួន ៤ និងការ​សាងសង់កន្លែងប្រមូលផ្តុំផលិតផលសម្រាប់បណ្តុំកសិករចំនួន ៥ កន្លែងនៅក្នុងខេត្តចំនួន១២ រួមមាន៖ ខេត្តកំពត តាកែវ កណ្តាល ស្វាយរៀង កំពង់ចាម កំពង់ធំ ព្រះវិហារ ស្ទឹងត្រែង បន្ទាយមានជ័យ បាត់ដំបង ពោធិ៍សាត់ និងខេត្តកំពង់ឆ្នាំង៕